كەيىنگى جىلدارى ءبىرتۇرلى ەسكەرتكىشتەر كۇرت كوبەيدى. ارىستاي كەۋدەسىنە قوندىرا سالعان بارماقتاي عانا باسى بار قوناەۆتى, قۋشيعان قوس تىزەسى ەڭسەلى تۇرقىنا جاراسپايتىن اقسەلەۋدى, مىقىننان جۇرداي بوپ مايىسىپ تۇرعان مۇقاعاليدى كورگەندە امالسىز مۇسىنشىلەردىڭ شەبەرلىگى مەن تالانتىنا دا كۇمان كەلتىرە باستايسىڭ. سوراقىلىعى مەن قوراشتىعى جاعىنان اقسەلەۋ سەيدىمبەك ەسكەرتكىشى بارىنەن اسىپ ءتۇستى. قۋسىرىلعان كەۋدە, قۋشيعان تىزە, قىسقا بۇت. وتىرىسى دا مانسىزدەۋ. قوعام قارسىلىعىنان سوڭ تۇعىرىنان تايدىرىلدى. كۇزەلىپ, تۇزەلىپ, قايتا قونا جاتار.
بىزدىڭشە, ەسكەرتكىش دەگەنىڭىز سويلەپ تۇرۋعا ءتيىس ەدى. مۇندايدا قىرعىز قىزى تاميلانىڭ تالانتىنا ەرىكسىز باس يەسىڭ. تاميلا ماماتوۆا سومداپ شىققان شىڭعىس ايتماتوۆ تۇلعاسى ءا دەگەننەن اق كوز جانارىڭا سىيىپ كەتەدى. شىڭعىستىڭ بولمىسى, شىڭعىستىڭ دەگدار پاراساتى جارق ەتە قالعانداي بولادى. تاميلانىڭ قاي تۋىندىسىن قاراساڭىز دا ءتىرى تۇلعا سىزگە قاراپ تۇرعانداي كۇي كەشەسىز. قىرعىزستانداعى ۇلىبريتانيا ەلشىلىگىندە تۇرعان – ەليزاۆەتا II پاتشايىم, كوركەم سۋرەت اكادەمياسىنىڭ الدىندا ورنالاسقان – «سەمەتەي» مونۋمەنتى, شولپون-اتاداعى مۇحتار اۋەزوۆ ءبيۋستى – وسى تاميلانىڭ تۋىندىلارى. اۋەزوۆ ءبيۋستىن قىرعىزستانعا ساپارىندا پرەزيدەنتىمىز قاسىم-جومارت توقاەۆتىڭ ءوزى بارىپ اشقانى دا بەلگىلى. تالانتتى اقىنىمىز ميراس اسان قىرعىز قىزىنا ارناپ جىر دا جازدى:
«قاي عاسىردان شىعا كەلدىڭ ھاس كەرىم,
حوردىڭ قىزى, حوش كەرىم!
جۇزىندەيسىڭ اق سەمسەردىڭ جارق ەتكەن,
ىزىندەيسىڭ كەستەنىڭ!
قاي عاسىردان كەلە جاتسىڭ, قوس بۇرىم,
قوم سۋلارداي بۇلعاقتاپ!
تالاس بۇرىم,
بىشكەك بۇرىم,
وش بۇرىم,
ورگەن سۇلۋ سىمباتتاپ!
قاي ءداۋىردىڭ جۇمباعىسىڭ شەشپەگەن,
قاي قالامنىڭ جىرلارىسىڭ جازباعان؟
ەڭلىكگۇلسىڭ ەش جاھاندا وسپەگەن,
قىزىل شوقسىڭ وي-وشاقتا مازداعان!»
جوق, بۇگىنگى ماقالامىز استە تاميلا تۋرالى ەمەس ەدى. بىراق اڭگىمە اۋانىنىڭ ءوزى وسىعان جەتەلەپ اكەلدى. بىزدە وعان قارسىلىق ەتە الارلىق كۇش تاپشى. تاقىرىپ, تاقىرىپتى الديلەگەن سانا, ساناعا باعىنعان ساۋساق, ساۋساق ۇشىنان توگىلگەن وي مەن مازمۇن ءوزى-اق ءسوزدىڭ سوڭىن تاميلاعا اكەپ تىرەپ تاستاعانى...
جازۋشى دۋلات يسابەكوۆتىڭ «ەسكەرتكىش» دەگەن اڭگىمەسى ەسكە تۇسەدى. اڭگىمە جەلىسى بويىنشا كەڭەستىك قازاقستاندا تۇڭعىش تەرى يلەۋشىگە ەسكەرتكىش قويىلاتىن بولىپ, تۇپنۇسقاسىن جاساۋ ءۇشىن مۇسىنشىلەر كەيىپكەردىڭ ۇرپاعى اشتەن جەلدىباەۆتى اۋرەلەيتىن ەدى عوي. اقىرىندا ەسكەرتكىش مەجەلى مەرزىمدە بىتپەي قالىپ, تۇعىرعا اشتەننىڭ ءوزى شىقپاۋشى ما ەدى. تۇرقى اتاسى مەلدەننەن اۋماي قالعان. قوس قولىمەن قوي تەرىسىن تىك شانشىپ كوتەرىپ تۇر. كەلگەن قوناقتار كوزدەرىن جۇمىپ, اۋىزدارىن اشادى. ءسىرا, مۇنداي ەسكەرتكىش كورمەگەندەرىنە كوپ بولعان. بىراق وسى تۇعىرعا اشتەندى شىعارۋ ءۇشىن رايكومنىڭ شەندىلەرى نە ىستەمەدى دەسەڭىزشى. كەشە عانا كوشە كەزىپ, ساندالىپ جۇرگەن ادامدى تۇعىرعا شىق, تىرىلەي ءمۇسىن بولىپ قاتىپ قال, كىرپىگىڭدى قاقپا, ەل-جۇرتقا ەت-جۇرەكتى پەندە ەكەنىڭدى سەزدىرمە دەۋ وڭاي بولىپ پا ەدى؟ مۇندايدا باعى تاسىپ, بەدەلى ءوسىپ تۇرعانىن پايدالانىپ قالماسا اشتەن اشتەن بولا ما؟ رايكوم باسشىلارى كەشە عانا سانتەحنيك بولىپ, جايىنا جۇرگەن جىگىتتىڭ استى-ۇستىنە ءتۇسىپ, كۇن سايىن «سارىاعاشىن» تاسىپ بايەك بولدى دا قالدى. بايەك بولدى – بەر جاعى, ازاپقا ءتۇستى-اۋ, ازاپقا! سوندا دا قىرسىقتىعى بىتە مە اشتەن شىراقتىڭ؟
ءبىزدىڭ ەسكەرتكىشتەرىمىزدىڭ دە سيقى تۇزەلمەسە, وندا ءار اۋىلدان ءبىر-ءبىر اشتەن ىزدەۋگە تۋرا كەلەتىن سياقتى. اشەكەڭ تابىلار-اۋ, ونى تۇعىرعا شىعارۋ ءۇشىن بولاتىن ابىگەردى ايتساڭىزشى.
