زۇلكارىم اعا ۇزىن بويلى, الىپ تۇلعالى, كەلبەتتى جىگىت بولعان. التايدا, ورىستار اراسىندا ەرجەتكەندىكتەن, ورىس ءتىلىن جاقسى مەڭگەرگەن. ول مىنەزى اشىق-جارقىن, ورتاسىندا بەدەلى بار, بالالايكادا شەبەر وينايتىن جىگىتتىڭ سۇلتانى بولىپتى. ەندى عانا ەل شەتىنە جەتىپ, وتباسىن قۇرماقشى بولىپ جۇرگەن جەرىنەن بۇكىل ارمان-ماقساتىنىڭ تاس تالقانىن شىعارىپ, الدىمەن اسكەرگە, سودان كەيىن سوعىسقا الىپ كەتەدى. بۇل كەڭەس-فين سوعىسى ەدى. زۇلكارىم اعا كارەلياداعى 1046-اتقىشتار پولكىنىڭ 289-اتقىشتار ديۆيزياسىنىڭ قاتارىندا فيندەرگە قارسى مايدانعا تاپ بولادى. بۇل ورماندى, باتپاقتى ولكەدە قانشاما قاندى مايدان بولعانى تۋرالى مۇراعاتتا ساقتالعان «بوەۆوي پۋت» دەگەن انىقتامادان كورۋگە بولادى. انىقتامادا كورسەتىلگەندەي, زۇلكارىم كارسۇلتان ۇلى سول 289-ديۆيزيا قاتارىندا 1941 جىلدىڭ 26 ماۋسىمىنان باستاپ, 1944 جىلدىڭ 7 شىلدەسىنە دەيىن بارلىق شايقاستا بولىپ, ەرلىك كورسەتكەن. وسىنداي شايقاستار اراسىندا ءجۇرىپ زۇلكارىم كارسۇلتان ۇلى كەڭەس وداعى قىرىپ-جويعان بايدىڭ بالاسى بولسا دا, سول ەلدىڭ ۇكىمەتى ءۇشىن جانىن اياماي جاۋىنگەرلىك, ازاماتتىق بورىشىن ادال وتەدى. كۇش-جىگەرىنىڭ جانە ءتىل بىلگەندىگىنىڭ ارقاسىندا اسكەري باسشىلار ونى ءبىرىنشى پۋلەمەت روتاسىنىڭ كومانديرى ەتىپ قويادى.
ينتەرنەتتە اعامىزدىڭ جەرلەنگەن جەرى ناقتى كورسەتىلمەگەن. ىزدەستىرۋ بارىسىندا زۇلكارىم اعامىزدىڭ سوڭعى شايقاستارىنىڭ ءبىرى كۋوليسما دەگەن اۋىل ماڭىندا بولعاندىعى بەلگىلى بولدى. وسى اقپارات شىققاننان كەيىن تۋىسقان باۋىرىمىز رينات اسحات ۇلى ارنايى ىزدەۋشىلەر مەن جەرگىلىكتى اسكەري كوميسساريات ارقىلى اتاسىنىڭ زيراتى رەسەي مەن فينليانديانىڭ اراسىنداعى بەيتاراپ اۋماقتا ەكەنىن انىقتايدى. «مەن كوپ ادامنان سۇراستىرىپ ءجۇرىپ, ەرىكتى ىزدەستىرۋشىلەرگە شىقتىم. ولار بار ءمان-جايدى ايتىپ, ەشبىر مەملەكەتتىڭ, نە رەسەيدىڭ, نە فينليانديانىڭ شەكارالىق زاڭىن بۇزباي, بۇرىنعى اسكەري ىزدەرمەن قالاي ءجۇرۋ كەرەك ەكەندىگىن ءتۇسىندىرىپ بەردى», دەيدى رينات. باۋىرلاستار زيراتىنا اپاراتىن جەرگىلىكتى جول ىزدەۋشى ميحايل دەگەن فين جىگىتى دە تابىلا كەتەدى. بۇل جىگىتتىڭ ءوزى دە چەشەن سوعىسىنا قاتىسقان ادام ەكەن. ميحايل باۋىرلاستار زيراتىنىڭ ورنالاسقان جەرىن, وندا قانشا جاۋىنگەر جەرلەنگەنىن, ولاردىڭ ىشىندە كوماندير زۇلكارىم كارسۇلتان ۇلىنىڭ ەسىمى بار ەكەنىن انىقتاپ, اعانىڭ زيراتىنا ءوزى باستاپ اپاراتىنىنا سەندىردى.
تۇعىرعا قادالعان تاباقشادا ءارتۇرلى ۇلتتان 30 ەردىڭ اتى-ءجونى جازىلعان ەكەن. ءبارى دەرلىك 1899-1927 جىلدارى تۋعان ازاماتتار. بۇل – 1944 جىلى شىلدە مەن تامىز ايىندا قازا بولعان 289-اتقىشتار ديۆيزياسىنىڭ جاۋىنگەرلەرى مەن كومانديرلەرىنىڭ ءتىزىمى. زۇلكارىم اعانىڭ ەسىمىنىڭ قارسى الدىندا «1920-29.07.44» دەگەن جازۋ تۇر. بار-جوعى 24-اق جاستا بولعان ەكەن...
ەڭ وكىنىشتىسى, قازاق جاۋىنگەرى ءۇش جارىم جىل قاندى قىرعىننان امان شىعىپ, سوعىستىڭ اياقتالۋىنا التى ايداي عانا ۋاقىت قالعاندا قازا تاپقان. سۇيگەنىنە قوسىلا الماي, ارماندا كەتتى, ارتىندا ۇرپاق قالمادى. ەل قورعاۋ جولىندا ەرلىكپەن قازا تاپقان وسىنداي باتىرلارىمىزدىڭ ەسىمىن ماڭگىلىك ەل جۇرەگىندە ساقتاۋ ماقساتىندا ەڭ بولماسا تۋعان ولكەسى – سەمەي قالاسىنىڭ ءبىر كوشەسىنە زۇلكارىم كارسۇلتان ۇلىنىڭ اتى بەرىلسە, وشكەنىمىز جانعانداي بولار ەدى...
ماريا جۇماقانقىزى,
پەداگوگيكا عىلىمدارىنىڭ
كانديداتى
