دارحان قىدىرالى قازاقستان تاراپىنىڭ تالابى بويىنشا وكىلدىك اشقانى ءۇشىن كومپانياعا العىس ايتىپ, دميتري پىلەۆتىڭ جۇمىسىنا ساتتىلىك تىلەدى.
ەسكە سالا كەتەيىك, جۋىردا عانا الەۋمەتتىك جەلىنىڭ ينتەرفەيسى قازاقشالاندى. بۇل دا ەكى جاقتى جۇمىستىڭ ءبىر ناتيجەسى دەۋگە بولادى.
سونىمەن قاتار دارحان قىدىرالى كومپانيا وكىلدەرىنە 13 جاسقا دەيىنگى بالالاردىڭ Tiktok-تى پايدالانۋىنا شەكتەۋ قويۋ بويىنشا بىرلەسكەن جۇمىس جۇرگىزۋدى ۇسىندى.
مينيستر كيبەربۋللينگتىڭ جيىلەپ بارا جاتقانىنا, سونداي-اق سۋيتسيدكە يتەرمەلەيتىن ارەكەتتەرگە ەرەكشە نازار اۋداردى.
«مينيسترلىك وسىنداي مازمۇندى كونتەنتتى انىقتاۋ بويىنشا كۇشەيتىلگەن جۇمىس جۇرگىزۋدى جوسپارلاپ وتىر. ءبىز بالالار مەن جاستار اراسىندا ءسۋيتسيدتىڭ كوبەيۋىنە اكەلەتىن كونتەنتتى كورسەتۋدى شەكتەۋگە بىرگە كۇش سالۋىمىز كەرەك», دەدى دارحان قىدىرالى.
مينيستر قازىر تالقىلانىپ جاتقان «ينتەرنەت جارناما جانە ونلاين پلاتفورما تۋرالى» زاڭ جوباسىنىڭ ەرەكشەلىكتەرىنە توقتالىپ, زاڭنامادا ونلاين پلاتفورما يەلەرىمەن بىرگە جۇمىس ىستەۋ, قازاقشا كونتەنتتى مونەتيزاتسيالاۋ جانە مودەريزاتسيالاۋ, ينتەرفەيستەردى قازاقشالاۋ ماسەلەسى قاراستىرىلىپ وتىرعانىن ايتتى.
سەرگەي سوكولوۆ ءوز سوزىندە كومپانيا 13 جاسقا تولماعان جانداردىڭ TikTok پلاتفورماسىن پايدالانباۋىنا نازار اۋداراتىنىن اتاپ ءوتتى. جاس شەكتەۋلەرىن ساقتاۋ جانە كيبەربۋللينگتىڭ الدىن الۋ ءۇشىن مۇددەلى بيلىك ورگاندارىمەن, جۇرتشىلىقپەن جانە ساراپشىلارمەن بىرگە جۇمىس ىستەۋگە دايىن ەكەنىن ءبىلدىردى.
«اتاپ ايتقاندا, اقپان ايىندا ءبىز «قاۋىپسىزدىك اكادەمياسى» باعدارلاماسىنىڭ بولىگى رەتىندە ونلاين-بۋللينگكە قارسى كامپانيا باستادىق», دەدى سەرگەي سوكولوۆ.
ەستەرىڭىزگە سالا كەتەيىك, جۋىردا عانا اقدم «مەديا ەتيكا جانە بالالار قۇقىعىن قورعاۋ» تاقىرىبىندا دوڭگەلەك ۇستەل وتكىزىپ, اقپارات قۇرالدارىندا بالالارعا بايلانىستى حالىقارالىق جانە جەرگىلىكتى نورمالاردى ساقتاۋعا شاقىرىپ, ارنايى ۇسىنىم قابىلداعان بولاتىن.
