رەسەيلىك دومبىراشىلار بۇل كۇيدى قۇرمانعازى كەسەنەسىنىڭ الدىندا تارتتى. دومبىراشىلاردىڭ اراسىندا ەرەسەكتەر دە, بالالار دا بار.
«بيىل قازاقتىڭ ۇلى كومپوزيتورى, كۇيشى, دومبىراشى قۇرمانعازى ساعىرباي ۇلىنىڭ مەرەيتويىن اتاپ وتەمىز. وسىعان وراي بۇگىن ءبىز – استراحان وبلىسىنىڭ دومبىراشىلارى اتىراۋ وبلىسىنا چەللەندج جولدايمىز», دەيدى قۇرمانعازى اتىنداعى وڭىرلىك مادەني ورتالىعىنىڭ ديرەكتورى امانگەلدى ابىلعازيەۆ.
قۇرمانعازى ساعىرباي ۇلى رەسەي فەدەراتسياسىنداعى التىنجار اۋىلىندا جەرلەنگەن. بۇل اۋىل استراحان وبلىسىنىڭ ۆولودار اۋدانىندا ورنالاسقان.
«التىنجار اۋىلىندا 2005 جىلى قۇرمانعازى اتىنداعى ءوڭىرلىك مادەني ورتالىعى اشىلدى. قازىر اتالعان ورتالىق استراحان وبلىسىنداعى ماڭىزدى مادەني جانە تانىمال تۋريستىك نىساندارىنىڭ ءبىرىنە اينالدى. ءبىزدىڭ ورتالىققا الىس-جاقىن شەتەلدەردەن جىل سايىن 1000-عا جۋىق ادام كەلەدى. تۋريستەرگە قۇرمانعازى ساعىرباي ۇلىنىڭ, ونىمەن زامانداس بولعان قازاقتاردىڭ ءومىرى تۋرالى ماعلۇمات بەرەمىز» دەيدى امانگەلدى ابىلعازيەۆ.
ونىڭ ايتۋىنشا, ورتالىقتا ۇلى كۇيشىنىڭ شىعارماشىلىعى, ءومىرى تۋرالى سىر شەرتەتىن ەكسپوناتتار قويىلعان مۋزەي مەن تۋريستەر ءۇشىن قوناقۇي اشىلعان. ورتالىقتىڭ سامال» قازاق مۋزىكالىق ءانسامبلى مەن «بەلىي گورود» ورىس مۋزىكالىق انسامبلىندە 40-قا جۋىق ادام جۇمىس ىستەيدى. دەنى – قانداستارىمىز, اراسىندا 25 دومبىراشى بار.
