بايقوڭىر اۋدانىندا ەكولوگيالىق ايلىقتى ۇيىمداستىرۋ جانە وتكىزۋ شەڭبەرىندە اۋدان اۋماعىن جيناۋعا بارلىق ۇيىم مەن مەكەمە, كاسىپورىندار, شوب جانە بازارلار, الەۋمەتتىك نىساندار جانە باسقا دا مەكەمەلەر مەن باسقارمالار تۇگەل دەرلىك قاتىستى. ارقايسىسى جىلداعى ءتارتىپ بويىنشا وزدەرىنە تيەسىلى اۋماقتى جيىپ-تەرىپ, تاپ-تۇيناقتاي ەتىپ تازالاپ شىقتى.
اكىمدىك اپپاراتىنىڭ قىزمەتكەرلەرى سەنبىلىك تياناقتى اتقارىلۋى ءۇشىن اۋەلى بىرقاتار ۇيىمدارمەن بىرلەسىپ, ىرگەلەس جانە بەكىتىلگەن اۋماقتاردا قاجەتتى ءىس-شارا تۇرلەرىن كورسەتە وتىرىپ, 5000-نان استام حابارلامانى قۇلاقتاندىرۋ جانە تاراتۋ بويىنشا اۋقىمدى جۇمىس جۇرگىزدى.
ناتيجەسىندە, اۋدان بويىنشا سەنبىلىككە بارلىعى 10 مىڭنان استام ادام قاتىستى. كوشەلەر بويىنداعى قوقىستاردى جيناپ, تيەپ اكەتۋگە 100-دەن اسا ارنايى تەحنيكا جۇمىلدىرىلدى.
ۇلكەن سەنبىلىك شەڭبەرىندە اۋدان تۇرعىندارىنىڭ ءبارىنىڭ جان-جۇرەگىن جىلىتىپ, قۋانىشقا بولەگەن ىزگىلىگى مول ءبىر شارانى ارنايى ايتىپ وتكىمىز كەلەدى. بايقوڭىر اۋدانىنىڭ ورتالىق الاڭداردىڭ ءبىرى – جۇمابەك تاشەنوۆ كوشەسى بويىنداعى ساياباققا اعاش وتىرعىزۋ راسىمىنە استانا قالاسى ءماسليحاتىنىڭ حاتشىسى ەرلان كاناليموۆ باستاعان ەلوردا دەپۋتاتتارى, اۋدان اكىمى ەرلان جاۋلىباەۆ ارنايى كەلىپ, ءوز قولدارىمەن كوشەت ەكتى.
استانانى جاسىل جەلەكپەن اباتتاندىرۋدىڭ يگىلىكتى شاراسىنا بايقوڭىر اۋدانىنىڭ اۋماعىنداعى ءۇندىستان, تۇرىكمەنستان ەلشىلىكتەرىنىڭ وكىلدەرى, قالالىق باسقارما باسشىلارى, جازۋشىلار وداعىنىڭ مۇشەلەرى, اۋداندىق ارداگەرلەر كەڭەسىنىڭ مۇشەلەرى, سونداي-اق «جاس ساربازدار» جاسوسپىرىمدەر اسكەري-پاتريوتتىق ورتالىعىنىڭ ورەندەرى جانە اۋداننىڭ بەلسەندى تۇرعىندارى قاتىستى. بۇل كورىنىس بىزگە قازاق حالقىنىڭ ءبىرتۋار تۇلعاسى جۇمابەك تاشەنوۆكە كورسەتىلىپ جاتقان تاعزىم قۇرمەتىندەي اسەر ەتتى.
نەگىزى, جالپىقالالىق سەنبىلىگى اياسىندا «بايقوڭىر» اۋدانىنىڭ بارلىق دەرلىك اۋماعىندا اعاش وتىرعىزىلىپ, جانعا جىلى يگى شارا اۋقىمدى تۇردە ۇيىمداستىرىلدى. كورسەتىلگەن ساياباققا بارلىعى 100-دەن اسا كوشەت ەگىلىپ, ونىڭ اۋماعى قوقىستاردان تازارتىلدى. سەنبى تاڭىن سەرپىندى سەنبىلىكتەن باستاعان, ىزگى ىسكە قاتىسۋشىلاردىڭ بارلىعىنا ىستىق تاعام ۇسىنىلىپ, كوڭىلدى كونتسەرتتىك نومىرلەر قويىلدى. بۇل مادەني-رۋحاني شارا كەلۋشىلەرگە ەرەكشە كوڭىل كۇي سىيلادى.
بۇلارمەن بىرگە ج.تاشەنوۆ, م.عابدۋللين, ا.پۋشكين جانە 191 كوشەسىنە, وعان قوسا قارۋلى كۇشتەردىڭ «ۇلتتىق اسكەري-پاتريوتتىق ورتالىعى» رمم جانە تولەگەن ايبەرگەنوۆ اتىنداعى №16 ورتا مەكتەپ اۋماقتارى بويىنشا 1205 بىرلىك كولەمىندە جاسىل جەلەك وتىرعىزىلدى.
سول كۇنى بايقوڭىر اۋدانى اۋماعىنداعى جالپى سەنبىلىككە بارلىعى 10 مىڭنان اسا ادام قاتىسىپ, 1200-دەن اسا اعاش وتىرعىزىلدى.
