وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا بايانداماسىندا مەملەكەت باسشىسىنىڭ تاپسىرماسى بويىنشا بالالاردى زورلىق-زومبىلىقتان, ءسۋيتسيدتىڭ الدىن الۋ, ولاردىڭ قۇقىقتارى مەن ءال-اۋقاتىن قامتاماسىز ەتۋ بويىنشا كەشەندى جوسپار ازىرلەنگەنىن ايتتى.
«مينيسترلىك زاڭنامالىق بازانى جەتىلدىرۋدە, ونىڭ ىشىندە بالانىڭ جابىرلەنۋدەن قورعانۋ قۇقىعى بەكىتىلدى. بالالار اراسىنداعى جابىرلەۋدىڭ الدىن الۋ ەرەجەسى, مەكتەپتەردىڭ پسيحولوگيا قىزمەتتىڭ جۇمىس ەرەجەسى, بالالارعا قاتىستى زورلىق-زومبىلىق پەن قاتىگەزدىك فاكتىلەرىن انىقتاۋ جانە ولارمەن جۇمىس ىستەۋ الگوريتمى قابىلداندى. ەلىمىزدىڭ ءار وڭىرىندە بالا قۇقىقتارى جونىندەگى ۋاكىلدەر جۇمىس ىستەپ جاتىر. بالالار مەن ولاردىڭ اتا-انالارىنا جەدەل كومەك كورسەتۋ ءۇشىن «بالا قورعاۋ» تەلەگرام-چاتى جۇمىس ىستەيدى. ايتا كەتەيىك, بۇل شارالاردىڭ بارلىعى بالالاردىڭ قاۋىپسىزدىگىن قامتاماسىز ەتۋدە بىرىڭعاي تاسىلدەردى قالىپتاستىرۋعا باعىتتالعان», دەلىنگەن وقۋ-اعارتۋ مينيسترلىگى ءباسپاسوز قىزمەتىنىڭ حابارلاماسىندا.
قىزىلوردا وبلىسى ءبىلىم باسقارماسىنىڭ باسشىسى مەيرامبەك شەرماعانبەتتىڭ ايتۋىنشا, كامەلەتكە تولماعاندار اراسىندا قۇقىق بۇزۋشىلىقتىڭ الدىن الۋ بويىنشا بىرقاتار شارا قابىلدانعان. بارلىق ءبىلىم بەرۋ ۇيىمدارىندا مەكتەپ پەن اتا-انالاردىڭ ءوزارا ءىس-قيمىلى قولعا الىنعان. اتا-انالار مەن اعا ۇرپاقتى تارتا وتىرىپ ادامي قۇندىلىقتاردى رۋحاني-ادامگەرشىلىك تاربيەلەۋ جانە دامىتۋ بويىنشا جۇمىستار جۇرگىزىلۋدە.
وقۋ-اعارتۋ ءمينيسترى عاني بەيسەمباەۆ وسكەلەڭ ۇرپاقتى تاربيەلەۋدەگى نەگىزگى اسپەكتىلەردى اتاپ ءوتتى. سونداي-اق وسى باعىتتا قابىلدانىپ جاتقان شارالارعا توقتالدى. مينيسترلىك بالالاردى وقىتۋ, تاربيەلەۋ جانە دامىتۋدا وتباسى مەن مەكتەپ اراسىنداعى ءوزارا ءىس-قيمىلدى كۇشەيتۋگە باعىتتالعان «اتا-انالار اكادەمياسى» جالپىۇلتتىق مادەني-ءبىلىم بەرۋ جوباسىن ازىرلەۋدە.
كەزدەسۋ سوڭىندا مينيستر توعىز جاستاعى جانسەرىك ءالىمنىڭ ۇستازى مەن اتا-اناسىنا العىس حاتتار تابىس ەتتى. وقۋشى توتەنشە جاعداي كەزىندە باۋىرلارىن ورتتەن امان الىپ شىعىپ, ەرجۇرەكتىك تانىتتى. سونداي-اق كەزدەسۋدە قۇقىق قورعاۋ ورگاندارىنىڭ وكىلدەرى, اۋداندىق ءماسليحات دەپۋتاتتارى, اتا-انالار كوميتەتتەرى مەن قامقورشىلىق كەڭەستەرىنىڭ توراعالارى ءسوز الىپ, وي ءبولىستى.
ايتا كەتەيىك, اتا-انالار جانە جۇرتشىلىقپەن وسىنداي كەزدەسۋلەر ەلىمىزدىڭ بارلىق وڭىرلەرىندە جالعاسادى.
