سپورتتىق ءىس-شارانىڭ اشىلۋ سالتاناتىنا استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ, قالالىق سپورتتىق بۇقارالىق ءىس-شارالاردى وتكىزۋ ديرەكتسياسىنىڭ باسشىسى باقتيار ماسانوۆ جانە استانا قالاسى اكىمدىگىنىڭ №4 بالالار مەن جاسوسپiرiمدەر مامانداندىرىلعان وليمپيادالىق رەزەرۆ سپورت مەكتەبىنىڭ باسشىسى نۇربول جارقىنبەكوۆ قاتىستى.
جارىستىڭ اشىلۋى ءراسىمىن سالتاناتتى تۇردە قالالىق سپورت باسقارماسىنىڭ باسشىسى سامات جىلقىباەۆ اشىپ, جاس سپورتشىلارعا جوعارى جەتىستىكتەرگە جەتۋىنە ساتتىلىك تىلەپ, جىلى لەبىزىن ءبىلدىردى.
«بىرىنشىلىك قالامىزدا جىل سايىن ءداستۇرلى تۇردە وتكىزىلىپ تۇرادى. دوداعا قاتىسۋعا قازاقستاننىڭ ءار وڭىرىنەن 400-دەن اسا سپورتشى قاتىسۋدا. وزدەرىڭىزدى بۇگىنگى جارىستا كورگەنىمە قۋانىشتىمىن. ەڭ مىقتىلار بۇگىن جەڭىسكە جەتسىن», دەدى قالالىق سپورت باسقارماسىنىڭ باسشىسى سامات جىلقىباەۆ.
ءداستۇرلى تۇردە وتەتىن جۇزۋدەن اشىق بىرىنشىلىككە ەلىمىزدىڭ 26 وبلىسىمەن قاتار رەسپۋبليكالىق ماڭىزى بار قالارىنان 400-دەن اسا قاتىسۋشىلار باس قوستى.
جەڭىمپازدار مەن جۇلدەگەرلەر ءتورت كۇنگە جالعاساتىن بىرىنشىلىك بارىسىندا انىقتالادى. ياعني ولار, ءار قاشىقتىقتاعى ۇزدىك ناتيجەلەر بويىنشا جەكە انىقتالسا, چەمپيوناتتىڭ ۇزدىك سپورتشىلارى ءار ءجۇزۋ ستيلىندە ۇزدىك ناتيجە بويىنشا FINA ۇپايلىق كەستەسى بويىنشا كۋبوكتارمەن ماراپاتتالادى.
جارىستىڭ العاشقى كۇنى ەستافەتالىق جارىس – باتتەرفلياي, ەركىن جۇزۋدەن 100, 200, 800 مەتر جانە براسس, ارقامەن ءجۇزۋ 50 مەتر ارا قاشىقتىقتا بويىنشا ءوربيدى. ال جارىستىڭ ەكىنشى, ءۇشىنشى جانە ءتورتىنشى كۇندەرى سپورتتىق باسەكە كەرىسىنشە تاسىلمەن جۇرگىزىلدى. ياعني 50 مەتر ارا قاشىقتىقتا ەركىن ءجۇزۋ, باتتەرفلياي, كەشەندى ءجۇزۋ, ال ارقامەن ءجۇزۋ جانە براسس 100 مەتر بويىنشا ۇزدىكتەردى انىقتايدى.
سپورت سالاسى ماماندارىنىڭ سوزىنشە, اشىق بىرىنشىلىكتە ۇزدىك كورىنگەن سپورتشىلار الداعى الەمدىك, رەسپۋبليكالىق دەڭگەيلى جارىستاردا ەل نامىسىن قورعايدى.
ايتا كەتەيىك, جارىس Barys Arena Pool وليمپيادالىق باسسەينىنىڭ بازاسىندا 29 ساۋىرگە دەيىن جالعاسادى.
