شىنىن ايتۋ كەرەك, سەسسيا ەرەكشە اتموسفەرادا ءوتتى. پرەزيدەنت قوعامداعى تۇراقتىلىق پەن بىرلىكتى ارتتىرۋداعى اسسامبلەيانىڭ رولىنە جان-جاقتى توقتالدى. تەرەڭ ويلار ايتىلدى. بۇل بۇگىنىمىزبەن بىرگە, كەلەشەك دامۋىمىز ءۇشىن اسا ماڭىزدى. مەملەكەت باسشىسى ءوز سوزىندە جالپىۇلتتىق بىرلىكتى نىعايتۋدىڭ جولدارىن ۇسىندى. ەتنوسارالىق كەلىسىمدى نىعايتۋ, ۇلت بىرلىگىن بەكەمدەۋ نەگىزگى باسىمدىق بولىپ قالا بەرەدى. مەملەكەتىمىزدە ءار ەتنوستىڭ مادەنيەتى مەن ءتىلىن دامىتۋعا, ءداستۇرىن دارىپتەۋگە بارلىق مۇمكىندىك بار.
پرەزيدەنت: ء«بىز ءبارىمىز – ءبىر وتباسىمىز. بۇگىندە ازاماتتارىمىزدىڭ بارلىعى وزدەرىن ۇلكەن ءارى ءبىرتۇتاس قازاق وتباسىنىڭ, شىن مانىندە, قازاق ۇلتىنىڭ مۇشەسى سەزىنەدى. بۇل – جالپىۇلتتىق بىرەگەيلىگىمىزدىڭ تاعى ءبىر جارقىن كورىنىسى», دەدى. راسىمەن دە, قازاقستان – ءبىرتۇتاس مەملەكەت, ىنتىماعى جاراسقان ەل. پرەزيدەنت ورتاق قۇندىلىقتاردىڭ توڭىرەگىنە توپتاسىپ, وسى بەرەكە-بىرلىگىمىزدى ارتتىرۋعا شاقىردى. وسى ورايدا بەس باسىمدىقتى اتاپ ءوتتى. ءبىرىنشى – بىرلىگىمىز بەن ىنتىماعىمىزعا سىزات تۇسىرۋگە باعىتتالعان كەز كەلگەن ارانداتۋشىلىقتىڭ جولىن كەسۋ. ەكىنشى – ەتنوالەۋمەتتىك شيەلەنىستىڭ سالدارىن جويۋ. ءۇشىنشى – كوپمادەنيەتتى ورتانى دامىتۋ جانە بارلىق ازاماتتاردىڭ مەملەكەتتىك ءتىلدى مەڭگەرۋى. ءتورتىنشى – اسسامبلەيانىڭ ساياسي پارتيالارمەن جانە مەملەكەتتىك ورگاندارمەن ءوزارا ءىس-ارەكەتىن كۇشەيتۋ. بەسىنشى – مەملەكەتتىك ەتنيكالىق ساياساتتى بىرىزدەندىرۋ جانە دايەكتى جۇزەگە اسىرۋ.
مەملەكەت باسشىسىنىڭ جۇرگىزىپ وتىرعان ساياساتى دا, قولعا العان رەفورمالارى دا وسىعان باعىتتالعان. ادىلدىككە باستاعان جول كۇللى ۇلتىمىزدى ۇيىستىرىپ وتىر. «مەن بۇعان دەيىن دە ايتتىم: ەلىمىزدىڭ تاۋەلسىزدىگى جانە اۋماقتىق تۇتاستىعى بارىنەن قىمبات. ەل بىرلىگى وسى مىزعىماس قۇندىلىقتارمەن قاتار تۇرۋعا ءتيىس. سوندا عانا بولاشاعىمىز باياندى بولادى», دەدى مەملەكەت باسشىسى.
حالقىمىز «بىرلىك ءتۇبى – بەرەكە»دەپ بەكەر ايتپاعان. سوندىقتان پرەزيدەنت ايتقانداي, ءبارىمىز ءبىر تۋدىڭ استىنا بىرىكسەك قانا, تاۋەلسىزدىگىمىز باياندى بولادى. وسى جولدا بار كۇش-جىگەرىمىزدى سالايىق!
ەرلان قوشانوۆ,
ءماجىلىس توراعاسى
