«ەلدەستىرمەك – ەلشىدەن» دەمەكشى, ەكىجاقتى بايلانىس ورناتىپ, بارلىق دەڭگەيدەگى قارىم-قاتىناستى جولعا قويۋعا قىزمەت ەتىپ جۇرگەن كۋۆەيتتىڭ قازاقستانداعى توتەنشە جانە وكىلەتتى ەلشىسى, دوكتور ومار ءال-كانداري ەكى ەل اراسىنداعى ىنتىماقتاستىقتى دامىتۋدىڭ ودان ارعى كەلەشەگىنە قاتىستى ويىمەن بولىسكەن ەدى.
«كۋۆەيت پەن قازاقستان اراسىنداعى ورتاق رۋحاني قۇندىلىقتار, سونداي-اق ستراتەگيالىق سەرىكتەستىككە نەگىزدەلگەن قارىم-قاتىناستار بىرلەسكەن كۇش-جىگەردىڭ ارقاسىندا دايەكتى تۇردە دامي بەرەتىنىنە سەنىمدىمىن. جالپى, كۋۆەيت پەن قازاقستاندى ديپلوماتيالىق قاتىناستار عانا ەمەس, تاريحي جانە ءدىني قاتىناستار دا بايلانىستىرادى. ەگەر جالپى قازاق-اراب قاتىناستارىن الساق, وندا كوپتەگەن يسلام عالىمى وسى ايماقتان, مىسالى, ءال-فارابي جانە باسقالارى شىققانىن اتاپ وتۋگە بولادى. سونداي-اق سۇلتان بايبارىس ءبىزدى ساياسي جانە اسكەري سالادا بايلانىستىرادى, ويتكەنى ول مىسىردىڭ بيلەۋشىسى ءارى اسكەري جەتەكشىسى بولدى», دەيدى ەلشى.
بىلتىر 24 ناۋرىزدا قازاقستاننىڭ سول كەزدەگى سىرتقى ىستەر ءمينيسترى مۇحتار تىلەۋبەردىنىڭ كۋۆەيت مەملەكەتىنە ءىسساپارى كۋۆەيت-قازاقستان اراسىنداعى ەكونوميكالىق جانە ساۋدا ىنتىماقتاستىق ماسەلەلەرىن تاعى ءبىر دەڭگەيگە كوتەرگەنى انىق. ساپار بارىسىندا بىرلەسكەن كوميتەتتىڭ 3 وتىرىسى ۇيىمداستىرىلدى. كەلەسى ءتورتىنشى باسقوسۋ جاقىندا كۋۆەيت مەملەكەتىندە وتەدى.
كۋۆەيت مەملەكەتى وڭىرلىك ۇيىمدار شەڭبەرىندە, اسىرەسە ورتالىق ازيا ستراتەگيالىق ديالوگى (GR5) جانە پارسى شىعاناعى ەلدەرىنىڭ ىنتىماقتاستىق كەڭەسى (پشەىك) شەڭبەرىندە قازاقستان رەسپۋبليكاسىمەن ىنتىماقتاستىقتى نىعايتۋعا ەرەكشە ءمان بەرەدى.
ونىڭ ۇستىنە, كۋۆەيت مەملەكەتى قازاقستان رەسپۋبليكاسى توراعالىعىنىڭ قولداۋىمەن 2022 جىلى قازاندا اوسشك كونفەرەنتسياسىنىڭ التىنشى ءسامميتى بارىسىندا ازياداعى ءوزارا ىقپالداستىق جانە سەنىم شارالارى جونىندەگى كەڭەسكە تولىققاندى مۇشە رەتىندە قوسىلدى. بۇل تۋرالى «ازياداعى ءوزارا ىقپالداستىق جانە سەنىم شارالارى جونىندەگى كەڭەسىنە كۋۆەيت ەلىنىڭ 28-مۇشە مەملەكەت رەتىندە كىرۋىن قۇپتايمىن. بۇل اوسشك وزەكتىلىگىن جانە ازياداعى ديالوگ پەن ىنتىماقتاستىقتى ودان ءارى نىعايتۋ قاجەتتىگىن تاعى ءبىر رەت كورسەتتى», دەگەن بولاتىن قازاقستان پرەزيدەنتى قاسىم-جومارت توقاەۆ اوسشك VI ءسامميتىنىڭ اشىلۋىندا.
سونىمەن قاتار كۋۆەيت مەملەكەتى ەكى ەل اراسىنداعى ينۆەستيتسيالىق جانە تۋريستىك ىنتىماقتاستىقتى جانداندىرۋعا ەرەكشە نازار اۋدارادى. وسىعان بايلانىستى كۋۆەيت پەن الماتى قالاسى اراسىندا تىكەلەي رەيستەر قاتىنايدى, ال استانادا كۋۆەيت ەلشىلىگى اشىلعان ساتتەن باستاپ كۋۆەيت مەملەكەتىنەن قازاقستان رەسپۋبليكاسىنا كەلەتىن تۋريستەردىڭ سانى ارتقانى بايقالادى.
«مادەنيەت سالاسىندا «Astana opera» وكىلدەرىنىڭ كۋۆەيت مەملەكەتىنە بارعان ساپارىن اتاپ ءوتۋ قاجەت. وندا ولار كۋۆەيت حالقىن قازاق مادەنيەتىمەن ەتەنە جاقىن تانىستىردى. البەتتە, كۋۆەيتتىڭ ۇلتتىق مادەني كەڭەسى قازاقستانمەن وسى سالاداعى قارىم-قاتىناسىن نىعايتۋعا نيەتتى. ونىڭ ۇستىنە ءبىلىم سالاسى دا نازاردان تىس قالمادى. ەلشىلىك دەڭگەيىندە ءبىز جەرگىلىكتى ۋنيۆەرسيتەتتەرمەن قارىم-قاتىناس ورناتۋعا تىرىسامىز. مىسالى, بۇرىنعى ەلشى تارەك ءال-فارادجدىڭ كەزىندە قازاق گۋمانيتارلىق زاڭ ۋنيۆەرسيتەتىندە «كۋۆەيت مەملەكەتى» اۋديتورياسى اشىلدى, بيىل ءبىز ول جەرگە كۋۆەيت مادەنيەتى تۋرالى جازىلعان كىتاپتاردى تارتۋ ەتتىك. ەۋرازيا ۇلتتىق ۋنيۆەرسيتەتىمەن بايلانىسىمىز تىعىز. دۇنيەجۇزىلىك اراب ءتىلى كۇنىن اتاپ وتەمىز, مادەني ءىس-شارالار ۇيىمداستىرامىز», دەدى كۋۆەيتتىڭ قازاقستانداعى توتەنشە جانە وكىلەتتى ەلشىسى, دوكتور ومار ءال-كانداري.
