كوميتەت توراعاسىنىڭ باسشىلىعىمەن وتكەن وتىرىسقا ىشكى ىستەر ءمينيسترىنىڭ ورىنباسارى - قر ۇلتتىق ۇلانىنىڭ باس قولباسشىسى گەنەرال-مايور ەركىن بوتاقانوۆ جانە ونىڭ باعىتتار بويىنشا ورىنباسارلارى, سونداي-اق باس قولباسشىلىقتىڭ باس باسقارمالارىنىڭ باسشىلارى قاتىستى.
وتىرىس بارىسىندا ۇلتتىق ۇلان باس قولباسشىسىنىڭ ءبىرىنشى ورىنباسارى – باس شتاب باستىعى گەنەرال-مايور قايرات اقتانوۆ حالىق قالاۋلىلارىن قۇقىقتىق ءتارتىپ اسكەرلەرىنىڭ قازىرگى جاعدايى مەن دامۋ پەرسپەكتيۆالارى تۋرالى ەگجەي-تەگجەيلى حاباردار ەتتى. سونىمەن قاتار ولارعا قىزمەتتىك-جاۋىنگەرلىك مىندەتتەردى ورىنداۋ كەزىندە اسكەرلەردىڭ تىنىس-تىرشىلىگىنە ەلەۋلى اسەر ەتەتىن بىرقاتار پروبلەما ايتىلدى.
اتاپ ايتقاندا, استانا قالاسىندا ۇلتتىق ۇلان اۆيابازاسىن, ۇلىتاۋ وبلىسىنىڭ جەزقازعان قالاسىندا جانە تۇركىستان وبلىسىنىڭ تۇركىستان قالاسىندا اسكەري قالاشىقتاردى سالۋعا اسكەرلەردى قوسىمشا قارجىلاندىرۋ ماسەلەلەرى قوزعالدى, سونداي-اق ارنايى ماقساتتاعى بولىمشەلەردى نىعايتۋ ءۇشىن قارجىلاندىرۋدى كەڭەيتۋ ماسەلەلەرى تالقىلاندى.
- مەملەكەت باسشىسى ق. توقاەۆ ۇلتتىق ۇلاندى ساندىق جانە ساپالىق جاعىنان جاراقتاندىرۋ مىندەتىن قويدى. ءبىر جىلدان بەرى بۇل جۇمىس جۇرگىزىلۋدە. ايتا كەتۋ كەرەك, ۇلتتىق ۇلان تەك رەسپۋبليكالىق بيۋدجەت ەسەبىنەن قارجىلاندىرىلادى جانە قوسىمشا قارجىلاندىرۋ كوزدەرى جوق. بۇعان دەيىن مەملەكەت باسشىسىنا ۇلتتىق ۇلان بيۋدجەتىنىڭ ۇلعايۋى تۋرالى باياندالعان بولاتىن, بىراق بۇل قارجى قاراجاتى اسكەرلەردىڭ شتات سانىن ۇلعايتۋعا كەتكەن بولاتىن. بولاشاقتا قارجى تاپشىلىعىنا تاپ بولامىز دەپ بولجانۋدا, - دەدى اسكەرلەردىڭ باس قولباسشىسى.
كوشپەلى وتىرىس بارىسىندا ۇلتتىق ۇلاننىڭ تىنىس-تىرشىلىگىنە قاتىستى باسقا دا ماسەلەلەر تالقىلاندى. قورىتىندىلاي كەلە, كوميتەت توراعاسى ايگۇل قۇسپان باستاعان كوميتەت مۇشەلەرى ۇلتتىق ۇلاننىڭ قىزمەتتىك-جاۋىنگەرلىك قىزمەتتىڭ بارلىق مىندەتتەرىن ورىنداۋعا دايىن ەكەندىگىنە كوز جەتكىزدى.
- ۇلتتىق ۇلاننىڭ قىزمەتىن ساپالى جانە جەدەل جۇزەگە اسىرۋ ءۇشىن شەشىلۋى قاجەت بىرقاتار ماسەلە بار. ءبىز ولاردى ءتۇرتىپ الدىق جانە ولاردى جۇزەگە اسىرۋعا كۇش سالامىز. كوشپەلى وتىرىستى ۇيىمداستىرعانى ءۇشىن العىس ايتقىم كەلەدى. ءبىز بۇگىن اسكەريلەردىڭ كوزىنەن ءپاتريوتيزمدى كوردىك. ءبىز اسكەري قارجىلاندىرۋ تاپشىلىعى ماسەلەسىن شەشەمىز دەپ ويلايمىز, - دەدى ايگۇل قۇسپان.
حالىق قالاۋلىلارى «بۇركىت» ارنايى ماقساتتاعى بولىمشەلەرىنىڭ نەگىزگى مىندەتتەرىمەن, ءبولىمنىڭ ينفراقۇرىلىمىمەن, كازارمالىق-تۇرعىن ءۇي قورىمەن, ماتەريالدىق-تەحنيكالىق جاراقتاندىرۋمەن, اسكەري تەحنيكامەن جانە قارۋ-جاراقپەن, سونداي-اق ۇلتتىق ۇلان ارنايى كۇشتەرىنىڭ دامۋ پەرسپەكتيۆالارىمەن كوزدەرىمەن تانىستى.
كەزدەسۋ قورىتىندىسى بويىنشا دەپۋتاتتار ۇلتتىق ۇلان اسكەرلەرىنىڭ قولباسشىلىعى تاراپىنان ايتىلعان ماسەلەلەردى شەشۋ ءۇشىن ولاردىڭ ودان ءارى زاڭنامالىق قىزمەتى بارىنشا پايدالانىلاتىنىنا سەندىردى.
