ءىس-شاراعا تۇركيا ەلىنىڭ ازاماتى, ونەر جاناشىرى يىلماز وكۋكلۋ مەن سەليم يۋحاي قاتىستى. كەش بارىسىندا گازەت باسشىلىعى قوناقتارعا باسىلىمنىڭ تاريحى, قازىرگى تىنىس-تىرشىلىگى تۋرالى باياندادى. «قازاق گازەتتەرى» جشس باس ديرەكتورىنىڭ ءبىرىنشى ورىنباسارى ۆلاديمير كۋرياتوۆ تۇركى الەمىنىڭ ادەبيەتىن ەرەكشە قۇرمەتتەيتىنىن ايتىپ, قازىرگى زامانعى اقىن-جازۋشىلاردىڭ شىعارمالارىن, ولەڭ جولدارىن قازاق تىلىنە اۋدارۋدى ۇسىندى. مۇنداعى ماقسات – ءتۇبى ءبىر تۇركى ەلدەرىنىڭ ىنتىماق-بىرلىگىن نىعايتا ءتۇسۋ.
سونىمەن قاتار, رەداكتسيا قىزمەتكەرلەرى, اقىن-جازۋشىلار دا ءوز ەڭبەكتەرىن تۇرىك, ازەربايجان تىلدەرىنە اۋدارۋدى ۇسىندى.
ادەبي كەش اياسىندا مادەنيەت سالاسىنىڭ ۇزدىگى, كۇيشى قايرات ايتباي قوناقتارعا «تاتتىمبەتتىڭ شەرتپە كۇيىن» ورىندادى. سونىمەن قاتار, ابزال ماقاش «ساعىندىم» ءانىن دومبىرامەن تامىلجىتا ورىنداپ, جانىبەك ءاليمان, دۇيسەنالى الىماقىن, باتىرحان سارسەنحان, ايتولعان ءجۇنىسحان اكبار گوشالىنىڭ ولەڭدەرىن ناقىشىنا كەلتىرىپ وقىپ بەردى.
كەش سوڭىندا شەتەلدىك مەيماندار «ارامىزدى كاسپي قيىپ جاتسا دا, قىل وتپەيدى» دەپ, وزدەرىمەن بىرگە ال كەلگەن سىيلىقتارىن تابىستاپ, ەستەلىككە سۋرەتكە ءتۇسىپ تارقاستى.
ايتا كەتەيىك, استانادا وتكەن «Eurasian Book Fair-2023» كورمە-جارمەڭكەسى اياسىندا اقىن, حالىقارالىق «الاش» ادەبي سىيلىعىنىڭ لاۋرەاتى اكبار گوشالىنىڭ «تۇراننىڭ ءبىر ءتۇپ جۋسانى» اتتى كىتابىنىڭ تۇساۋى كەسىلدى. اتاعان كىتاپتى اۋدارعان «الاش» ادەبي سىيلىعىنىڭ لاۋرەاتى تاناكوز تولقىنقىزى: «ومىردە اقىندار كوپ. بىراق تۋما ادامدىق بولمىسىن ءومىر بويى ساقتاپ وتەتىن اقىندار از. مەن اكبار گوشالىنى سول ادامدىق بيىك تۇعىرعا قونعان, ءوزى قانداي بولسا, ولەڭى سونداي مارتەبەلى اقىندار ساناتىنا جاتقىزامىن. ءبىز اكبارمەن ەرتە كەزدەن تانىسساق تا, ونىڭ شىعارماشىلىعى جونىندە ماردىمدى دۇنيە بىلمەپپىن. «تۇراننىڭ ءبىر ءتۇپ جۋسانى» اتتى كىتاپتى اۋدارۋ بارىسىندا اكباردىڭ ۇلكەن اقىن ەكەنىنە كوزىم جەتتى», دەپ پىكىر بىلدىرگەن ەدى.
