جۋىردا تاعى ءبىر جاعىمدى جاڭالىققا كۋا بولدىق. مادەنيەت جانە سپورت مينيسترلىگى «سپورتشىلار مەن جاتتىقتىرۋشىلارعا ءومىر بويى اي سايىنعى ماتەريالدىق قامسىزداندىرۋدى تولەۋ قاعيدالارىن بەكىتۋ, ولاردىڭ مولشەرىن بەلگىلەۋ تۋرالى» بۇيرىعىنىڭ جوباسىن ازىرلەدى. سوعان سايكەس الداعى ۋاقىتتا وليمپيادا, پاراليمپيادا جانە سۋردليمپيادانىڭ چەمپيوندارى مەن جۇلدەگەرلەرىنە, سونىمەن قاتار سپورتتىڭ وليمپيادالىق تۇرلەرى بويىنشا الەم چەمپيونى اتانعان سپورتشىلار مەن ولاردى دايىنداعان جاتتىقتىرۋشىلارعا 100 ايلىق ەسەپتىك كورسەتكىش (345 000 تەڭگە) كولەمىندە تولەماقى بەرىلەدى. ۇكىمەتتىڭ بۇل باستاماسىن ءبىز سپورتشىلار قاۋىمىنا كورسەتىلگەن زور قامقورلىق دەپ باعالادىق.
ودان بولەك, اسا ءىرى حالىقارالىق جارىستاردا جەڭىس تۇعىرىنا كوتەرىلگەن ورەندەردىڭ مەملەكەت تاراپىنان مول كولەمدە سىياقى الاتىنى بارشاعا ءمالىم. ماسەلەن, وليمپيا ويىندارىندا توپ جارعان ساڭلاققا 250 000 اقش دوللارى تابىس ەتىلسە, كۇمىس جانە قولا جۇلدەگەرلەر 150 000 جانە 75 000 دوللاردى ەنشىلەيدى. باسقا دا بايراقتى باسەكەلەردە تابىستى ونەر كورسەتكەن سپورتشىلارعا دا ماتەريالدىق تۇرعىدان اجەپتاۋىر كومەك كورسەتىلەدى. ارينە, ونىڭ بارلىعى دا سپورتشىلاردى جىگەرلەندىرىپ, ىنتالاندىرۋعا باعىتتالعان ءىس-شارالار ەكەنى تۇسىنىكتى.
دەسەك تە, وسى جەردە ەسكەرىلمەي جاتقان ءبىر ماسەلە بار. ول – سپورتشىلاردىڭ ۇلكەن سپورتپەن قوش ايتىسقاننان كەيىنگى تاعدىرى. ءبىزدى قىنجىلتاتىنى, ءداۋىرى ءجۇرىپ تۇرعان كەزىندە حالىقتىڭ قوشەمەتىنە بولەنىپ, ۇلدە مەن بۇلدەگە ورانعان دۇلدۇلدەر مانسابىن اياقتاعاننان كەيىن قوعامعا كەرەگى بولماي قالادى. ساڭلاقتاردىڭ جارىستار مەن سانسىز وقۋ-جاتتىعۋ جيىندارىندا جيعان مول تاجىريبەلەرى ەشكىمدى قىزىقتىرمايدى. سول سەبەپتى دە, سپورتشىلاردىڭ دەنى باسقا كاسىپتى تاڭدايدى. ماسەلەن, تامىر-تانىسى مىقتى, ەتى ءتىرى, ەپتى ازاماتتار بىردەن بەلدى ءبىر سپورتتىق مەكەمەنىڭ ديرەكتورلىعىنا تاعايىندالادى نەمەسە دەپۋتات بولىپ سايلانادى. كەيبىرەۋلەرى كاسىپكەرلىكپەن اينالىسسا, كەيبىرى بيزنەستە باعىن سىناپ كورەدى. سونداي-اق شەت مەملەكەتتەردە جاتتىقتىرۋشىلىق قىزمەت اتقارىپ جۇرگەندەر دە جوق ەمەس. ارينە, ۇلكەن سپورتتان قول ۇزگەننەن كەيىن لەزدە جاڭا ومىرگە بەيىمدەلىپ, ءوز جولدارىن اداسپاي تاپقان جىگىتتەر ءۇشىن ءبىز قۋانامىز.
دەگەنمەن دە, جاقسى قىزمەت پەن جايلى كرەسلو ەكەنىڭ بىرىنە بۇيىرا بەرمەيتىنى بەلگىلى. بايىپتاپ قاراساق, كۇنى كەشە عانا حالىقارالىق ارەنادا جاسىنداي جارقىلداپ, قازاقتىڭ كوك بايراعىن بيىكتە جەلبىرەتكەن ساڭلاقتارىمىزدىڭ ءبىرازى بۇل كۇندەرى ءوز كاسىبى بويىنشا جۇمىس تاپپاي سەندەلىپ ءجۇر. ولاردىڭ اراسىندا وققاعار مەن كۇزەتشى, كولىك جوندەۋشى مەن جۇرگىزۋشى, ساۋداگەر مەن بروكەرلەر جانە تاعى باسقا سان قىرلى ماماندىق يەلەرى كوپتەپ كەزدەسەدى. ال تەرىس جولعا تۇسكەندەر قانشاما؟ قازاقتىڭ تالاي تەپسە تەمىر ۇزەتىن جىگىتتەرى قىلمىس الەمىنە كەتكەنى دە بەلگىلى. مىنە, وسى ازاماتتاردىڭ بارلىعىنىڭ دا ەل سپورتىنا بەرەرى كوپ ەدى عوي.
وركەنيەتتى مەملەكەتتەردە اتاقتى سپورتشىلار ۇلكەن سپورتتان قول ۇزگەننەن كەيىن قۇزىرلى ورگاندار ولارعا بىردەن جۇمىس تاۋىپ بەرەدى. جاس مامان الدىمەن جاسوسپىرىمدەر مەن جاستار قۇراماسىن جاتتىقتىرادى. سول سۇزگىدەن ءوتىپ, تاجىريبەسى تولىققان مىقتىلار ۇلتتىق قۇرامانىڭ تىزگىنىن ۇستايدى نەمەسە جاقسى ءبىر قىزمەتكە تاعايىندالادى. وسىلايشا, ساتىلاپ وسەدى. دالادا قالىپ جاتقان ەشكىم جوق. بارىنە ءوز دەڭگەيىنە ساي قىزمەت تابىلادى. وسى ءۇردىستى ەلىمىزدە دە قالىپتاستىرۋ قاجەت. جاتتىقتىرۋشىعا اركىمگە ءبىر الاقان جايعىزىپ قويماي, لايىقتى ەڭبەكاقى تاعايىندالۋى كەرەك. شىنى كەرەك, قازىرگى كەزدە ولاردىڭ الىپ وتىرعان جالاقىلارى ماردىمسىز. وسى ولقىلىقتىڭ ورنى تولسا, باپكەر دە, بالۋان دا ەشكىمگە جالتاقتاماي جۇمىس ىستەيدى. ولاردىڭ تاسىپ-توگىلگەن تاجىريبەسىن ءبىز بارىنشا مولىنان پايدالانۋىمىز كەرەك.
