وبلىس اكىمدىگىنىڭ قولداۋىمەن, مادەنيەت, ارحيۆتەر جانە قۇجاتتاما باسقارماسىنىڭ ۇيىمداستىرۋىمەن وتكەن رەسپۋبليكالىق ايتىسقا ەلىمىزدىڭ ءار قيىرىنان جيىرما اقىن قاتىسىپ, ءسوز بارىمتاسىندا كىمنىڭ دەسى باسىم دەگەن ساۋالعا جاۋاپ ىزدەدى. رەسپۋبليكالىق جىر دوداسىندا باق سىناعانداردىڭ تەڭ جارتىسى جەرگىلىكتى ايتىسكەرلەر ەكەنىن ايتا كەتكەن ءجون. جامبىلدىق اقىندار وڭىردە وتكەن ىرىكتەۋ ايتىستارىنىڭ قورىتىندىسىنا سايكەس رەسپۋبليكالىق دوداعا جولداما العان بولاتىن.
ايتىستىڭ اقتاڭگەرى, قازاقستاننىڭ ەڭبەك سىڭىرگەن قايراتكەرى امانجول التاەۆ تىزگىندى قولعا العان, مەملەكەتتىك سىيلىقتىڭ لاۋرەاتى, الاشتىڭ ارداكۇرەڭ اقىنى عالىم جايلىباي توراعا بولعان, مەملەكەتتىك سىيلىقتىڭ لاۋرەاتى, جازۋشى روزا مۇقانوۆا, اقىن, ءماجىلىس دەپۋتاتى جاناربەك ءاشىمجان, ايتىسكەرلەر احمەتجان وزبەكوۆ, كۇمىسكۇل سارسەنباەۆا, بەلگىلى جۋرناليست ورالحان ءداۋىت قازىلىق ەتكەن جىر دوداسى ءوز دەڭگەيىندە ءوتتى.
ون جۇپتى قۇراعان جيىرما اقىننىڭ العاشقى اينالىمداعى ءسوز سايىسى كوپشىلىكتىڭ كوڭىلىنەن شىقتى. ال اباي وبلىسىنان كەلگەن بەلگىلى ايتىسكەر رۇستەم قايىرتاي ۇلى مەن جامبىل اۋدانىنىڭ ۇزدىگى, 10-سىنىپ وقۋشىسى الينا ايدارالىنىڭ اراسىنداعى تارتىستى ءسوز بارىمتاسىنا بالاساعۇن اتىنداعى ورتالىق كونتسەرت زالعا جينالعان جۇرتشىلىق قوشەمەتتى ايامادى. سونداي-اق جايىقتىڭ جاعاسىنان كەلگەن جانسايا مۋسينا مەن جامبىلدىق ديدار اپباسوۆتىڭ اراسىنداعى ايتىس تا جوعارى دەڭگەيدە وتكەنىن ايتا كەتكەن ءلازىم.
ءبىرىنشى اينالىم اياقتالعاننان كەيىن قازىلار القاسى ويلاسا كەلە ءتورت اقىندى فينالدىق كەزەڭگە وتكىزۋدى ءجون كورىپتى. ولاردىڭ قاتارىندا وسى ايتىستىڭ جاڭالىعىنا اينالعان جامبىلدىق ءجاسوسپىرىم الينا ايدارالى دا بار. فينالدىق كەزەڭدە ءبىرىنشى بوپ ساحناعا شىققان رۇستەم قايىرتاي ۇلى مەن ورالدىق جانسايا مۋسينا اراسىنداعى ايتىس كوپشىلىك تاراپىنان جوعارى باعاعا يە بولدى. اسىرەسە رۇستەمنىڭ: «حالىق – مەنىڭ شىن اتىم» دەگەن ادام, حالىقتى مۇقاتۋى مۇمكىن ەمەس» دەپ جىرلاعانى جۇرتتىڭ كوڭىلىنە قونعانى انىق.
قىزىلوردالىق نۇرمات مانسۇروۆپەن ءسوز سايىسقا شىققان الينا ايدارالى تاجىريبەلى قارسىلاسىنان ءبىر مىسقال كەم تۇسپەي, تەڭ دارەجەدە ايتىس كورسەتكەنىن دە ايتا كەتكەن ءجون. «جەر كىندىگىن قولىما ۇستاتسا دا, جامبىل جۇرتىن كەتپەسپىن الماستىرىپ» دەپ جىرلاعان مەكتەپ وقۋشىسىنا جەرلەستەرى تولاسسىز قوشەمەت كورسەتتى.
الا تاڭنان ىمىرت ۇيىرىلگەن شاققا دەيىن سوزىلعان رەسپۋبليكالىق جىر دوداسىنىڭ قورىتىندىسىندا الينا ايدارالى باس جۇلدەگە لايىق دەپ تانىلسا (1 ملن تەڭگە قارجىلاي سىيلىق), اباي وبلىسىنان كەلگەن ادۋىندى اقىن رۇستەم قايىرتاي ۇلى ءبىرىنشى ورىندى, باتىس قازاقستان وبلىسىنىڭ اقىنى جانسايا مۋسينا ەكىنشى ورىندى, قىزىلوردالىق نۇرمات مانسۇروۆ ءۇشىنشى ورىندى يەلەندى. سونداي-اق ءبىرجان بايتۋوۆ, راۋان حايدار, جارقىن جۇپارحان, دارحان ءابدىمانات, مۇحتار قونارباەۆ, شاپاعات سابيتقىزى ارناۋلى جۇلدە يەگەرى اتاندى. ايتىسقا قاتىسقان وزگە اقىندار دا قارجىلاي سىيلىقتان قۇر قالعان جوق.
جامبىل وبلىسى
