ۇقك شەكارا قىزمەتىنىڭ قوستاناي وبلىسى بويىنشا دەپارتامەنتى حابارلاعانداي, 17 ساۋىردە «قايراق» اۆتوكولىك وتكىزۋ بەكەتىندە «تويوتا لاند كرۋزەر» اۆتوكولىگىن تەكسەرۋ كەزىندە 33 ميلليون رۋبل سوماسىندا (404 858 دوللار) قولما-قول اقشا تابىلعان. اۆتوكولىكتى قازاقستان ازاماتى باسقارعان.
«قازاقستان رەسپۋبليكاسى پرەزيدەنتىنىڭ 2022 جىلعى 14 ناۋرىزداعى «قازاقستان رەسپۋبليكاسىنىڭ قارجىلىق تۇراقتىلىعىن قامتاماسىز ەتۋ جونىندەگى شارالار تۋرالى» جارلىعىنا سايكەس قازاقستان رەسپۋبليكاسىنان شەتەل ۆاليۋتاسىن, التىن قۇيمالارى مەن مونەتالاردى اكەتۋگە تىيىم سالىندى. قازاقستان ازاماتىنىڭ شەتەلگە شىعۋىنا رۇقسات ەتىلمەدى. بۇل فاكتى بويىنشا تەرگەۋ جۇمىستارى جۇرگىزىلەدى», دەلىنگەن دەپارتامەنت تاراتقان حابارلامادا.
ەسكە سالا كەتەيىك, بۇعان دەيىن شەكاراشىلار قوستاناي وبلىسىنداعى «قايراق» باقىلاۋ-وتكىزۋ بەكەتىندە جالپى قۇنى 11 ميلليون تەڭگەنى قۇرايتىن تەمەكى كونترابانداسىنىڭ جولىن كەسكەن ەدى.
