قىلمىستىڭ وسى تۇرىمەن كۇرەسۋ ءۇشىن ءىىم «CyberPol» پيلوتتىق جوباسىن ىسكە قوستى. بۇل جوبا تسيفرلىق تەحنولوگيالار ارقىلى جاسالاتىن زاڭسىزدىقپەن كۇرەسۋ, مەملەكەتتىك ورگاندارمەن ءوزارا ءىس-قيمىل جاساۋ جانە حالىق اراسىندا قۇقىقتىق ساۋاتتىلىقتى ارتتىرۋدى كوزدەيدى.
پيلوتتىق جوبا وتكەن جىلدىڭ 1 جەلتوقسانىنان باستاپ ەلوردانىڭ «ەسىل» اۋدانى پب جانىنداعى پوليتسيا ءبولىمىنىڭ اۋماعىندا ىسكە اسىرىلۋدا.
قۇرامىندا بەس تەرگەۋشى, بەس جەدەل ۋاكىل جانە ءبىر ءىت-كريميناليست بار «CyberPol» توبى از ۋاقىت ىشىندە 234 ينتەرنەت-الاياقتىقتى اشىپ, سوتقا 184 قىلمىستىق ءىس جىبەرگەن.
«قازىرگى ۋاقىتتا بىزدە ءوتىنىش قابىلداۋ جەڭىلدەتىلگەن. ادام كەلگەننەن كەيىن ءبىز ونىڭ ارىزىن قابىلدايمىز. سول قابىلداعان تەرگەۋشى بۇل ءىستى سوڭىنا دەيىن ءوزى جۇرگىزەدى. بىرىنشىدەن, ادام ۋاقىت جوعالتپايدى, ەكىنشىدەن, ول ارقاشان تەرگەۋشىمەن بايلانىستا بولادى», دەيدى «CyberPol» سوققى-نىسانالى توبىنىڭ اعا تەرگەۋشىسى نۇرتاس ساتتار.
ورتالىقتا تسيفرلىق زەرتحانا جۇمىس ىستەيدى, وندا ماماندار گادجەتتەرگە تەحنيكالىق تەكسەرۋلەر جۇرگىزىپ, الاياقتىق ارەكەتتەر جاسالعان باعدارلامالاردى انىقتايدى.
ء«بىرىنشى كەزەكتە ءىىم تاراپىنان كيبەرقىلمىستاردى تەرگەۋگە ەرەكشە نازار اۋدارىلىپ جاتقانىن اتاپ وتكىم كەلەدى. سونىڭ ارقاسىندا «CyberPol» پيلوتتىق جوباسى قۇرىلدى. بۇل – كيبەرپوليتسيا. شىن مانىندە, كيبەرقىلمىستاردى تەرگەۋمەن اينالىساتىن جەكە بولىمشەنى جاساقتاۋ شەشىمىن دۇرىس دەپ ويلايمىن. سەبەبى بۇل ۇلكەن ءبىلىمدى, رەسۋرستاردى جانە بەلگىلى ءبىر اقپاراتتى الۋ ءۇشىن ءارتۇرلى قۇرىلىمدارمەن, ۇيىمدارمەن ءوزارا ءىس-قيمىل جاساۋدى قاجەت ەتەدى», دەدى كيبەرشابۋىلداردى تالداۋ جانە تەرگەۋ ورتالىعىنىڭ كيبەرقاۋىپسىزدىك سالاسىنداعى مامانى ۆيتالي پەروۆ.
