بۇرىمدىلار اراسىنداعى باسەكەنىڭ ەكىنشى كۇنى التىن شاعاەۆا (53 كيلو) مەن يرينا كۋزنەتسوۆا (62 كيلو) العاشقى كەزەڭدەردە ءسۇرىندى. التىن تايپەيلىك مەنگ حسۋان حسيەننەن جەڭىلسە, يرينا قىتايلىق حياجۋان لۋونىڭ وسال تۇسىن تابا المادى. بۇل سپورتشىنىڭ ەكەۋى دە سارى قۇرلىقتىڭ باستى دوداسىنا ناشار بابىندا كەلگەندەرى بىردەن بايقالدى. ولاردىڭ بويىنان جەڭىسكە دەگەن ەرىك-جىگەر مەن ەرەكشە قۇلشىنىستى بايقاي المادىق. سونىڭ سالدارىنان شاعاەۆا مەن كۋزنەتسوۆا قالىڭ توپتىڭ اراسىندا قالىپ قويدى.
ەكى جەرلەسىمىز قولا مەدال ءۇشىن تالاستى. 57 كيلو سالماقتاعى نۋلۋفار رايموۆا تۇساۋكەسەر كەزدەسۋىندە تايپەي وكىلى يۋ حان چەنگتى شاڭ قاپتىرعانىمەن, ىلە-شالا وزبەكستاندىق ءلايلياحون سوبيروۆاعا جول بەردى. ال ءۇشىنشى ورىن ءۇشىن سايىستا قىرعىزستاندىق بەرمەت نۇريدينقىزىن قاپى قالدىردى. ءسويتىپ, بىلتىر رەسەيدىڭ وفە قالاسىندا وتكەن جاستار اراسىنداعى الەم بىرىنشىلىگىندە التىننان القا تاققان 21 جاستاعى دارىندى بالۋان ايەلدەر دوداسىنداعى ءوزىنىڭ تىرناقالدى تابىسىنا قول جەتكىزدى.
كوپ كەشىكپەي 65 كيلوداعى ءالبينا قايىرگەلدينوۆا مانيشا مانيشامەن بەلدەستى. بىلتىر ءدال وسى ءۇندىستاننىڭ مىقتىسى الماتىدا وتكەن بولات تۇرلىحانوۆتىڭ رەيتينگتىك تۋرنيرىندە باس جۇلدەنى ولجالاعان ەدى. سول كەزدە ونىڭ ونەرىنە بارشا جۇرت تامساندى. بيىل دا ءۇندى قىزى بابىندا ەكەن. بۇل باسەكەدە مانيشانىڭ شەبەرلىك دەڭگەيى قانداسىمىزدان الدەقايدا جوعارى ەكەنى انىق اڭعارىلدى. ءالبينانى ول ءبىرىنشى كەزەڭدە-اق ەڭسەردى.
ەڭ سوڭىندا 72 كيلو سالماق دارەجەسىندە بەلدەسكەن بالۋاندار ءتۇرلى-ءتۇستى جۇلدەلەردى ساراپقا سالدى. بوزكىلەمگە ءجاميلا باقبەرگەنوۆا شىققان سايىن كورەرمەندەر ايعايعا باسىپ, بارىنشا قولداۋ كورسەتتى. قازاقتىڭ قىزىنا ونداي قۇرمەتتىڭ كورسەتىلۋى تەگىن ەمەس-ءتى. الماتى وبلىسىنداعى جامبىل اۋدانىنىڭ تۋماسىن تاريحتا قالاتىنداي تالاي ءىس تىندىردى. ول سوڭعى ەكى الەم چەمپيوناتىندا كۇمىس مەدالدى موينىندا جارقىراتتى. جاميلاعا دەيىن وسى سپورت ءتۇرىن سەرىك ەتكەن ەشبىر قىزىمىز ونداي ناتيجەگە قول جەتكىزە العان جوق ەدى.
ەلوردا تورىندە تايپەي مەن موڭعوليانىڭ سپورتشىلارىن ەڭسەرۋ باقبەرگەنوۆا ءۇشىن ايتارلىقتاي قيىندىق تۋعىزعان جوق. فينالدا ول جاپونيالىق سۋميرە نيكۋرامەن كۇش سىناستى. بىلتىر ۇلانباتىردا وتكەن ازيا چەمپيوناتىنىڭ فينالىندا ەكەۋىنىڭ جولى قيىسقان ەدى. ول كەزدە ءجاميلا جەڭىسكە جەتتى. بۇل جولى دا ءدال سولاي بولدى. جاپون بالۋانى «قارىمتا قايتارامىن» دەپ قانشا جانتالاسقانىمەن, جەرلەسىمىز وعان ادىم اشتىرمادى. ول ونىڭ ءار شابۋىلىنىڭ بەتىن قايتارىپ وتىردى. وڭتايلى ساتتە ءوزى دە تاۋەكەلگە بارىپ, ۇپايلارىن ەسەلەي ءتۇستى. ناتيجەسىندە, بۇل تارتىس ءجاميلانىڭ جەڭىسىمەن اياقتالىپ, ول ءۇش دۇركىن ازيا چەمپيونى دەگەن مارتەبەلى اتاقتى يەلەندى. ودان بولەك, باقبەرگەنوۆانىڭ اتالعان جارىستا جەڭىپ العان ءبىر كۇمىس پەن ءبىر قولا مەدالى بار.
جالپىكوماندالىق ەسەپتە قازاقستاننىڭ ايەلدەر قۇراماسى ءۇشىنشى ورىنعا تابان تىرەدى. بۇل جارىستا ءجاميلا باقبەرگەنوۆا (72 كيلو) مەن ەلميرا سىزدىقوۆا (76 كيلو) التىننان القا تاقسا, مارينا سەدنەۆا (55 كيلو), نۋلۋفار رايموۆا (57 كيلو) جانە ەلەنا شالىگينا (68 كيلو) قولا مەدال ەنشىلەدى. ال ءبىرىنشى ورىندا – جاپونيا قۇراماسى. كۇنشىعىس ەلىنىڭ بالۋان قىزدارى 5 التىن, 2 كۇمىس جانە 2 قولانى ولجالادى. قورجىنىندا 2 التىن, 1 كۇمىس جانە 3 قولاسى بار قىتاي سپورتشىلارى ەكىنشى ساتىعا جايعاستى. ءتۇرلى-ءتۇستى مەدالدەردى ءبىر-بىردەن يەمدەنگەن قىرعىزستاننىڭ بۇرىمدىلارى ءتورتىنشى ورىنعا تۇراقتادى. سونداي-اق ءۇندىستان (2 كۇمىس, 5 قولا), موڭعوليا (2 كۇمىس, 2 قولا), وزبەكستان (2 كۇمىس, 1 قولا) جانە وڭتۇستىك كورەيا (1 قولا) بالۋاندارىنا جۇلدە الۋ باقىتى بۇيىردى.
