پرەمەر-مينيستر ەنەرگەتيكا مينيسترلىگىنە شىمكەنت مۇناي وڭدەۋ زاۋىتىنىڭ قۋاتتىلىعىن بۇرىن جوسپارلانعانداي جىلىنا 9 ملن توننا ەمەس, قازىرگى 6 ملن توننادان 12 ملن تونناعا دەيىن ارتتىرۋ تاسىلدەرىن قايتا قاراۋ قاجەتتىگىن اتاپ ءوتتى. سونداي-اق بۇل جۇمىستى جاڭادان سالىناتىن قايتا وڭدەۋ كاسىپورىندارىنىڭ قۇرىلىسىمەن قاتار جۇرگىزۋ كەرەك.
«بىزگە شالا-شارپى جۇمىستىڭ كەرەگى جوق. بۇل جوباعا قوماقتى قارجى قۇيىلادى, سوندىقتان قۋاتتىلىقتى جىلىنا 6 ملن تونناعا دەرەۋ ارتتىرۋ قاجەت. ججم-گە دەگەن سۇرانىس جىلدان جىلعا ارتىپ كەلەدى. ەكونوميكا وسۋدە, حالىق سانى كوبەيىپ, كاسىپورىندار وزدەرىنىڭ اينالىمىن ارتتىرۋدا. بۇل پروتسەستەردىڭ ءبارىن, ونىڭ ىشىندە ججم ءوندىرىسىن ۇلعايتۋ ارقىلى قولداۋ قاجەت», دەدى ءاليحان سمايىلوۆ.
سونداي-اق كەڭەستە جاڭا مادەني-اعارتۋ نىساندارىن اشۋ, نەسيەلىك تۇرعىن ۇيلەردى ساتۋ, ساتىپ الۋداعى جەرگىلىكتى قامتۋ ۇلەسىن ارتتىرۋ, «قايناربۇلاق» تۇرعىن الابىن گازبەن قامتاماسىز ەتۋ, ينۆەستيتسيالىق جوبالاردى جۇزەگە اسىرۋ ءۇشىن الەۋمەتتىك-كاسىپكەرلىك كورپوراتسيالاردىڭ جەر تەلىمدەرىن بەرۋ تەتىگىن جەتىلدىرۋ جانە تاعى باسقا بىرقاتار شارالار قارالدى.
«مەملەكەتتىك ورگاندار قالا اكىمدىگىمەن بىرلەسە وتىرىپ, وسى تاپسىرمالاردى ۋاقىتىلى ءارى ساپالى ورىنداۋ ءۇشىن بارلىق ءتيىستى شارالاردى قابىلداۋى قاجەت», دەپ تۇيىندەدى ءسوزىن پرەمەر-مينيستر.
