31 جاستاعى سولتۇستىك قازاقستان وبلىسىنىڭ تۋماسى بۇعان دەيىن دە ءوز جانكۇيەرلەرىن تالاي رەت قۋانتقان ەدى. ەلميرا 2016 جىلى برازيليانىڭ ريو-دە-جانەيرو قالاسىندا الاۋى تۇتانعان وليمپيا ويىندارىندا قولا مەدالدى موينىندا جارقىراتتى. 2018 جىلى جاكارتاداعى ازيا ويىندارىندا دا ءدال سول مەجەدەن كورىندى. 2014-2021 جىلدار ارالىعىندا وتكەن قۇرلىق چەمپيوناتتارىندا 1 التىن, 2 كۇمىس جانە 3 قولانى قورجىنعا سالدى. ول باسقا دا كوپتەگەن حالىقارالىق تۋرنيردە توپ جاردى.
استاناداعى جارىستا سىزدىقوۆا جاقسىلىق ۇشكەمپىروۆ اتىنداعى جەكپە-جەك سارايىنا جينالعان جۇرتتى تەڭدەسسىز ونەرىمەن تامساندىردى. العاشىندا وزبەكستاندىق وزودا زاريپبوەۆانى ايقىن باسىمدىقپەن جەڭسە, ىلە-شالا قىتايلىق جۋان ۆاندى وڭاي ەڭسەردى. فينالدا ونىڭ جولى ايپەرى مەدەتقىزىمەن قيىستى. قىرعىز قىزى قانداسىمىزدان التى جاس كىشى. ونىڭ ۇستىنە, مەدەتقىزى سوڭعى كەزدەرى حالىقارالىق ارەنادا تولاعاي تابىستارعا قول جەتكىزىپ ءجۇر. اتاپ ايتساق, جاكارتاداعى ازيا ويىندارىندا, بەلگرادتاعى الەم كۋبوگىندە جانە وسلوداعى الەم چەمپيوناتىندا ءۇشىنشى تۇعىرعا كوتەرىلدى. سوڭعى ءۇش قۇرلىق بىرىنشىلىگىندە جۇلدە الدى. ماسەلەن, 2020 جىلى نيۋ-دەليدە, 2021 جىلى الماتىدا كۇمىسپەن كۇپتەلسە, 2022 جىلى ۇلانباتىردا الدىنا جان سالمادى.
كورشىلەس ەكى ەلدىڭ بەلدى بالۋاندارى ۇزاق ۋاقىت تىرەستى. ەكەۋى قانشا تىرىسسا دا, ءبىر-ءبىرىن الا المادى. باسەكە بەل ورتادان اۋعان تۇستا قارسىلاسىنىڭ ءسال بوساڭسىعان ءساتىن ءساتتى پايدالانعان ەلميرا ونى جەرگە الىپ ۇردى دا, ۇستىنە قونا كەتتى. ايپەرى قاۋىپتى جاعدايدان قۇتىلۋدىڭ بارلىق امالىن جاسادى. بىراق ول قازاق بالۋانىنىڭ تەمىر قۇرساۋىنان شىعا المادى. ءسويتىپ, ەلميرا سىزدىقوۆا ازيا چەمپيونى اتاندى.
55 كيلو سالماقتاعى مارينا سەدنەۆا جارتىلاي فينالدا موڭعوليالىق وتگونتۋيا شينبولدتان ۇتىلعانىمەن, قولا مەدال ءۇشىن تارتىستا شەبەرلىكتىڭ شىنايى ۇلگىسىن كورسەتتى. تورەشى بەلگى بەرگەن بەتتە بىردەن شابۋىلداعان ول بىرنەشە ۇپاي ەنشىلەدى. ۆەتنامدىق تي ميۋ ترانگ نگۋەن دە وسال ەمەس ەكەن. ول دا لەزدە لايىقتى جاۋاپ قايتاردى. باسەكەنىڭ باستالعانىنا نەبارى 30 سەكۋند وتكەندە تابلوداعى ەسەپ 9:6-عا جەتتى. سول مەزەتتە مارينا وڭتايلى ءتاسىلىن جۇزەگە اسىرىپ, قارسىلاسىنىڭ اياعىن كوكتەن كەلتىردى. ناتيجەسى – تازا جەڭىس جانە قولا مەدال.
جانكۇيەرلەر 68 كيلو سالماق دارەجەسىندە كۇش سىناسقان ەلەنا شالىگينانىڭ بوزكىلەمگە شىققان ءساتىن تاعاتسىزدانا كۇتتى. 36 جاستاعى ارداگەر سپورتشى كەزىندە وليمپيا ويىندارى مەن ءۇش بىردەي الەم چەمپيوناتىندا جەڭىس تۇعىرىنا كوتەرىلگەن. ازيا چەمپيوناتتارىندا 2 التىن, 2 كۇمىس جانە 1 قولانى ەنشىلەگەن.
شالىگينا استاناداعى جارىستى جەڭىسپەن باستادى. بىراق شيرەك فينالدا وزىنەن 15 جاس كىشى, جالىنداپ تۇرعان جاس جاپونيالىق امي يشيگە ءالى جەتپەدى. شىنى كەرەك, ءۇشىنشى ورىن ءۇشىن تارتىستا دا ءبىز جەرلەسىمىز جەڭىلەتىن شىعار دەپ ويلادىق. ويتكەنى بۇل مەجەدە ونىڭ جولى توكيو وليمپياداسى مەن ازيادانىڭ قولا جۇلدەگەرى, الەم چەمپيونى, الەم كۋبوگىنىڭ يەگەرى, قۇرلىق چەمپيونى مەيىرىم جۇمانازاروۆامەن قيىستى. وسى اتاقتىڭ بارلىعىنا قىرعىز قىزى 23 جاسقا تولماي-اق قول جەتكىزدى. بىراق مەيىرىمنىڭ جاراقات الۋىنا بايلانىستى باسەكە مەرزىمىنەن بۇرىن توقتاتىلىپ, جەڭىس ەلەنا شالىگيناعا بەرىلدى.
وسىلايشا, ايەلدەر كۇرەسىنەن وتكەن جارىستىڭ العاشقى كۇنىن قازاقستان قۇراماسى 1 التىن جانە 2 قولا مەدالمەن قورىتىندىلادى. ءبىزدىڭ بالۋاندار اراسىنان ەللادا ماحياددينوۆا (50 كيلو) مەن ديانا كايۋموۆا (59 كيلو) ەل سەنىمىن اقتاي المادى.
