پرەزيدەنت عىلىمنىڭ مۇمكىندىكتەرىنە توقتالىپ, قازىرگى جەتىستىكتەر مەن عىلىم الىپ كەلگەن وزگەرىستەر تۋرالى ايتتى. عىلىم يندۋسترياسىنىڭ قارقىنىنا توقتالىپ قاۋىپ-قاتەرى جايلى دا اتاپ ءوتتى.
ء«بىز, ەڭ الدىمەن, جۇمىستىڭ نەگىزگى باعدارى مەن باسىمدىقتارىن ايقىنداپ الۋىمىز كەرەك. قازىر الەمدە تۇبەگەيلى وزگەرىستەر بولىپ جاتىر. گەوساياسات, ەكونوميكا جانە قوعامدىق قاتىناستار بۇرىن-سوڭدى بولماعان سىن-قاتەرلەرگە تاپ بولدى. عىلىم مەن تەحنولوگيا وتە قارقىندى دامۋدا. عىلىم سالاسى قارجى اينالىمى ميللياردتاعان دوللاردى قۇرايتىن الىپ يندۋسترياعا اينالدى. تەحنولوگيالىق ءىرى كورپوراتسيالاردىڭ قۇنى تريلليون دوللارعا جەتتى. نەيروجەلى جانە جاساندى ينتەللەكت رەۆوليۋتسيالىق ۇدەرىستەرگە باستاۋ بولىپ جاتىر. سوعان سايكەس مۇلدە بولەك, جاڭا ءومىر سالتى قالىپتاسۋدا. ونىڭ پايدالى جاقتارىمەن قاتار زور قاتەر تۋعىزۋى مۇمكىن زياندى تۇستارى دا بار», دەدى قاسىم-جومارت توقاەۆ.
سونىمەن قاتار, عىلىمداعى سوڭعى جاڭالىق جاساندى ينتەللەكتىڭ پايدا بولۋى تۋرالى دا ءسوز قوزعادى.
«جاساندى ينتەللەكتىگە بايلانىستى, ءتىپتى, يلون ماسكتىڭ ءوزى الاڭداۋشىلىق ءبىلدىرىپ, ونىڭ دامۋىن ازىرشە توقتاتۋ كەرەك دەپ ايتقان ەكەن. ويتكەنى جاساندى ينتەللەكت بۇكىل ادامزاتقا ۇلكەن قاۋىپ ءتوندىرۋى مۇمكىن دەپ ەسكەرتكەن. ەنەرگەتيكا, مەديتسينا, بيو جانە گەندىك ينجەنەريا سالاسىندا ىرگەلى جاڭالىقتار اشىلدى. ونىڭ ءبارى ادامزات ومىرىنە تۇبەگەيلى وزگەرىستەر اكەلە باستادى», دەدى مەملەكەت باسشىسى.
