بۇگىندە ەلىمىزدىڭ جانە الەمنىڭ جەتەكشى عىلىمي ورتالىقتارىمەن تىعىز بايلانىستا جۇمىس ىستەي وتىرىپ, زاماناۋي ماتەريالتانۋ عىلىمىنىڭ جاڭا باعىتتارىن بەلسەندى تۇردە دامىتۋعا كىرىستىم.
اسپيرانتۋرانى بىتىرگەننەن كەيىن عىلىمي قىزمەتىم ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ يادرولىق فيزيكا ينستيتۋتىندا باستالدى.
العاشىندا ىقىلاسىم اۋدى. DC-60 اۋىر يوندى ۇدەتكىشتىڭ تسيكلوتروندىق زالى ديسسەرتاتسيالىق زەرتتەۋ تاقىرىبىم بويىنشا زەرتتەۋلەر جۇرگىزۋ ءۇشىن تاجىريبە الاڭىنا اينالدى. سول كەزدىڭ وزىندە, ال بۇل 2006 جىل بولاتىن, ەلىمىزدە تەڭدەسى جوق تەحنولوگيالىق كەشەننىڭ زور الەۋەتى ايقىن كورىندى.
العاشقى جىلدارى يادرولىق فيزيكا ينستيتۋتىنىڭ استانا فيليالى قالىپتاسۋدىڭ قيىن كەزەڭىن باستان كەشىردى. فيزيكا-ماتەماتيكا عىلىمىنىڭ دوكتورى, پروفەسسور, قازاقستان ينجەنەرلىك اكادەمياسىنىڭ جانە حالىقارالىق ينجەنەرلىك اكادەمياسىنىڭ اكادەميگى قايرات قادىرجانوۆ پەن تەحنيكا عىلىمدارىنىڭ كانديداتى, اتوم سالاسىنىڭ ەڭبەك سىڭىرگەن قايراتكەرى ءادىل تولەۋشەۆتىڭ قامقورلىعىندا بولدىم. كوپ ءتالىم الدىم, تاجىريبە جيناقتادىم.
سونىڭ ناتيجەسىندە, قازىر ترەك مەمبرانالارىن ازىرلەۋ جانە وزگەرتۋ, ولاردى عىلىم مەن تەحنولوگيانىڭ عىلىمدى قاجەت ەتەتىن سالالارىندا قولدانۋدىڭ عىلىمي مەكتەبىنىڭ ىرگەسىن قالادىق. ترەك (يادرولىق) مەمبرانالار – تازارتۋدى جۇزەگە اسىراتىن سۇزگىلەردىڭ ءبىر ءتۇرى. ولار سول تسيكلوتروندا الىنعان پوليمەرلى پلەنكالاردان جاسالعان.
بۇگىنگى تاڭدا ترەك مەمبرانالارىنا نەگىزدەلگەن سۇزگى ماتەريالدارى مەن مەتالل نانوقۇرىلىمدارىن قۇرۋ كوممەرتسيالىق جوباسى اياسىندا سۋدى تازارتۋعا ارنالعان جەكە سۇزگىلەردىڭ قولدانىستاعى ءوندىرىسى جۇمىس ىستەي باستادى. ناتيجەسىندە, عالىمدار سۋدى تازارتۋعا ارنالعان سۇزگىلەردى وندىرىسكە ەنگىزىپ, پايدا تاۋىپ جاتىر. بارلىق زەرتتەۋ DC-60 اۋىر يوندىق ۇدەتكىشتە جۇرگىزىلەدى. بۇل ەلىمىزدەگى العاشقى سۇزگىلەر, ولاردى دايىنداۋ ۇلكەن شىعىنداردى قاجەت ەتپەيدى. بۇل باعىتتا عالىمدارىمىز ءالى دە تىنىمسىز جۇمىستار جۇرگىزىپ جاتىر.
ارينە, عالىم بولۋ وڭاي ەمەس. ول ءۇشىن ءوز كاسىبىڭدى قۇلاي ءسۇيۋىڭ كەرەك. سوندا عانا عىلىم ءسىز ءۇشىن بۇكىل الەمنىڭ ەسىگىن اشادى.
ارمانىمدى بولجاۋ مۇمكىن ەمەس شىعار, ءسىرا. دەگەنمەن مەن مەملەكەتىمىزدى الەمدىك كونتەكستە پايدالى قازبالار قازىناسى دەپ ەمەس, بۇكىل كونتينەنتتەگى جانە جالپى الەمدەگى عىلىمنىڭ فلاگمانى رەتىندە كورسە ەكەن دەيمىن. بۇعان شىنىمەن دە قول جەتكىزۋگە بولادى. تەك كوپ جانە ۇنەمى جۇمىس ىستەۋ كەرەك.
ماكسيم زدوروۆەتس,
ينجەنەرلىك بەيىندەگى زەرتحانا جەتەكشىسى, PhD
