ادەتتەگىدەي وزدەرىنىڭ كەزەكشىلىك مىندەتىن اتقارىپ جۇرگەن وبلىستىق مامانداندىرىلعان كۇزەت قىزمەتى باسقارماسى مەملەكەتتىك مەكەمەسىنىڭ 2 پوليتسيا باتالونىنىڭ پوليتسيا اعا سەرجانتتارى — نۇربول جانعاليەۆ پەن ارمان ورىنباساروۆ ساعات 11:30 شاماسىندا بەينەباقىلاۋ كامەراسى ارقىلى بەلگىسىز ازاماتشانىڭ كوپىردىڭ استىمەن ءوتىپ بارا جاتقانىن بايقاپ قالادى.
كامەرادان كورىنبەي قالعان ازاماتشانى ىزدەگەن پوليتسەيلەر كوپىردىڭ استىڭعى جاعىنا شىعادى.
سول مەزەتتە جاس كەلىنشەكتىڭ كوپىردەن سەكىرەيىن دەپ جاتقانىن بايقاپ, بىرەۋى الدىڭعى جاقتان شىعىپ, «سەكىرمە!» دەپ ايقايلاپ, توقتاتۋعا تىرىسادى.
ەكىنشىسى كوپىردىڭ استىنان شىعىپ, ازاماتشانى قۇتقارىپ قالادى.
«جالپى سۋ ەرىپ, مۇز كەتكەن سوڭ وسىنداي وقىس وقيعالاردىڭ جيىلەيتىنىن بايقاپ ءجۇرمىز. بيىل ءبىرىنشى رەت ورىن الىپ تۇر. ءبىز وقىس وقيعا جايلى وبلىستىق پوليتسيا دەپارتامەنتىندەگى كەزەكشى بولىمگە بايانداپ, سۋيتسيد جاساماق بولعان ازاماتشانى امان-ەسەن اباي پوليتسيا بولىمىنە تاپسىردىق. ءبىزدىڭ جىگىتتەر ومىرمەن قوشتاسپاق بولىپ, قامىققان جانداردى بۇدان بۇرىن دا بىرنەشە رەت قۇتقارعان. بۇل - ءبىزدىڭ جۇمىسىمىز», دەيدى پوليتسيا كاپيتانى باقجارات ماكاروۆ.
