مەملەكەت باسشىسى قاسىم-جومارت توقاەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى سالاسىنداعى مەملەكەتتىك كورسەتىلەتىن قىزمەتتەردى تسيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى. قۇجاتتاعى تولىقتىرۋلار تۋرالى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين تاراتىپ ايتىپ بەردى.
– ءبىزدىڭ مينيسترلىك جەر ۋچاسكەلەرىن بەرۋدىڭ ەسكىرگەن ەرەجەلەرىن تولىعىمەن وزگەرتۋدى جانە ونى ەلەكتروندى فورماتقا كوشىرۋدى تالاپ ەتەتىن زاڭ جوباسىن ازىرلەۋگە بەلسەندى قاتىستى, سونىمەن قاتار بۇل ۇدەرىستىڭ تيىمدىلىگىن دالەلدەۋ قاجەت بولدى. مەنىڭ ويىمشا, ءبىز بارلىعىن ويداعىداي ىسكە اسىرا الدىق. پارلامەنتتەگى ارىپتەستەرىمە العىس ايتقىم كەلەدى, ويتكەنى ءماجىلىس پەن سەناتتاعى جالپى وتىرىستاردا كوپتەگەن سۇراق كوتەرىلىپ, بۇل زاڭ جوباسىنىڭ ماڭىزدىلىعى اتاپ ءوتىلدى, – دەدى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى.
زاڭعا سايكەس جاۋاپتى ۆەدومستۆو پرەزيدەنت تاپسىرماسىنان كەيىن جەر تەلىمىنە قاتىستى قۇقىقتاردى تىركەۋ راسىمدەرىن جەڭىلدەتەتىن «بىرىڭعاي مەملەكەتتىك جىلجىمايتىن م ۇلىك كاداسترى» جۇيەسىن ازىرلەدى. وعان قول جەتكىزۋ قوعامدىق كاداستر كارتاسى ارقىلى جۇزەگە اسىرىلادى. ال كاداستر كارتاسى جىلجىمايتىن م ۇلىك پەن جەردى ساتىپ الۋ, ساتۋ, اشىق تۇردە جالعا بەرۋ سىندى بەلگىلى ءبىر مامىلەلەردى جۇزەگە اسىرۋ ءۇشىن مەملەكەتتىك كاداستر جۇيەسىنەن ونلاين مالىمەتتەر الۋعا مۇمكىندىك بەرەدى.
– جوبا كەزەڭ-كەزەڭمەن كەڭەيتىلدى. بيىلدان باستاپ, جەر تەلىمىن بەرۋ جونىندەگى ەلەكتروندى فورماتقا 89 قالانىڭ جەرى تۋرالى دەرەكتەر كوشىرىلەدى. قازىر يندۋستريا جانە ينفراقۇرىلىمدىق دامۋ مينيسترلىگىمەن جانە جەرگىلىكتى اتقارۋشى ورگاندارمەن بىرلەسە وتىرىپ, اتالعان جوبانى تولىققاندى ىسكە قوسۋ جۇمىستارى جۇرگىزىلىپ جاتىر, – دەپ ناقتىلادى ب.مۋسين.
