كاسىپكەرلەر جانارماي بولعان كەزدە ونى بەلگىلەنگەن باعا بويىنشا ۋاقىتىلى وتكىزۋگە مىندەتتى. بۇل تۋرالى ءماجىلىس دەپۋتاتتارى الدىندا جاڭا زاڭ جوباسىن تانىستىرعان ەنەرگەتيكا ءمينيسترى ايتتى. بۇل رەتتە الماسادام ساتقاليەۆ جانار-جاعارماي باعاسىن وسىرۋگە تۇرتكى بولعان سەبەپتەرگە توقتالا كەتتى.
«قازاقستان قازىردىڭ وزىندە قورى تاۋسىلۋعا شاق قالعان كەن ورىندارىنان مۇناي الىپ جاتىر. تاپشىلىقتىڭ سەبەبى دە وسى», دەدى مينيستر.
ول ءوز سوزىندە قوسىمشا ۇڭعىمالاردى بۇرعىلاۋ ءۇشىن ەكسپلۋاتاتسيالىق جانە بازالىق شىعىندار كوپ بولاتىنىن جەتكىزدى.
«مۇناي بار, بىراق ونى وڭدەۋ كەزىندە پايدا بولعان شىعىنداردى ساتىلىم باعاسى جابۋى ءتيىس. بىزدەگى ءىرى كەن ورىندارىنا كەلەتىن بولساق, ەكسپورت كولەمىن رەتتەيتىن حالىقارالىق جانە ءونىم ءبولىنىسى تۋرالى كەلىسىمدەر بار. ولارعا قوماقتى قارجى, ينۆەستيتسيا قۇيىلدى. ەندى ونىڭ ناتيجەسىن كۇتىپ وتىرمىز. تاريفتەر مەن باسقا شىعىنداردى قوسقاندا, وزىندىك قۇن قالىپتاساتىنى بەلگىلى. قازىر ساتۋ قۇنى وزىندىك قۇننان تومەن بولعاندىقتان ءبىز شىعىنعا باتىپ وتىرمىز», دەدى مينيستر.
