سىرلى سازعا تولى كەشتە الدىمەن بەلگىلى كۇيشى, قازاقستاننىڭ ەڭبەك سىڭىرگەن قايراتكەرى جانعالي ءجۇزباي جينالعاندارعا تۇعىرلى تۇلعانىڭ شىعارماشىلىعىنا توقتالىپ, مازمۇندى ءسوز قوزعادى. ودان كەيىن ايتىسكەر اقىن ەركەبۇلان قاينازاروۆ كۇي اتاسىنا ارناپ, جىردان شاشۋ شاشتى.
جالپى, ۇلى تۇلعانىڭ شىعارمالارىندا ۇلتتىق رۋح اتويلاپ تۇرادى. ونى تىڭداعاندا ءوزىڭىزدىڭ دە دەلەبەڭىز قوزىپ, ات ۇستىندە شاۋىپ كەلە جاتقانداي اسەرلەنەسىز. ونەرتانۋشىلار قۇرمانعازىنىڭ كۇيلەرىن ۇلت تاريحىن اۋەن تىلىمەن جازعان ەپوپەياعا تەڭەيدى. شىنىندا دا, كۇيشىنىڭ ءاربىر شىعارماسىنان ەل ومىرىنە قاتىسى بار وقيعالار كوز الدىڭىزدان تىزبەكتەلىپ ءوتىپ جاتادى.
كونتسەرتتە قازاقستاننىڭ ەڭبەك سىڭىرگەن قايراتكەرى ايتجان توقتاعان ورىنداعان كۇيشىنىڭ «ايدا بۇلبۇل, ايجان-اي» تۋىندىسىن تىڭدارماندار ۇيىپ تىڭدادى. سونداي-اق كۇي اتاسىنىڭ «اقباي», «بايجۇما», «قايران شەشەم, «كۇرەڭشە», «اربا سوققان», تەرىسقاقپاي» جانە تاعى باسقا دا شىعارمالارى ۇسىنىلدى. سونىمەن قاتار كەش بارىسىندا قۇرمانعازىنىڭ كۇيلەرىمەن بىرگە باسقا دا ونەر تارلاندارىنىڭ شىعارمالارى وينالدى. ماسەلەن, قازاقستاننىڭ ەڭبەك سىڭىرگەن قايراتكەرى عالىم احمەدياروۆ تارلان كۇيشى ابىكەن حاسەنوۆتىڭ «قوڭىرىن» شەبەر ورىندادى.
قىسقاسى, كۇي اتاسىنىڭ شىعارماشىلىعىن دارىپتەگەن كونتسەرتتە ونەر كورسەتكەن ورىنباي دۇيسەن, تۇرار الىپباەۆ, ابىلعازى احماديەۆ, مارات نۇكەەۆ, ەدىل باسىعاراەۆ, باقىتجان دۇيسەنعازينوۆ, قايرات ايتباەۆ, المات سايجان, باتىرلان ابەنوۆ, جۇمابەك قادىرقۇلوۆ, اقجۋسان يمانعازىقىزى, باۋىرجان مۇحامەتباي, باۋىرجان بەكمۇحانبەت, ابىلايحان ورمانبەك سەكىلدى ونەرپازدارعا جينالعان قاۋىم ءدان ريزا بولدى.
