اۋا رايىنىڭ قولايسىزدىعىنان بىرقاتار ەلدى مەكەندەر ەلەكتر جارىعىنان اجىراتىلىپ, باعانالار مەن كوشە بويىنداعى اعاشتار وپىرىلىپ ءتۇستى. وڭىرلىك كوممۋنيكاتسيالار قىزمەتىندە وتكەن بريفينگتە سالا ماماندارى ەكى كۇن ىشىندەگى جاعدايدان تولىق ماعلۇمات بەردى.
– سەكۋندىنا 15-28 مەتر جىلدامدىقپەن سوققان داۋىل سالدارىنان وبلىس, اۋدان جانە بىرقاتار اۋىلدار ءىشىنارا ەلەكتر جارىعىنان اجىراتىلدى. «كرەك» اق ماماندارىنان اقاۋ ەلەكتر جەلىلەرىن قالپىنا كەلتىرۋ ءۇشىن بارلىق اۋدانعا 260 ادامنان تۇراتىن 64 بريگادا جاساقتالدى, 54 تەحنيكا جۇمىس ىستەدى, – دەدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى قايسار ماقسۇت ۇلى.
دۇلەي داۋىل «قازالى-تەمىرجولجىلۋ» فيليالىنا قاراستى بۋ قازاندىعىنىڭ 40 مەترلىك مۇرجاسىن قۇلاتىپ, اپاتتىق جاعداي ورىن الدى. ايتەۋىر, ادام امان, قازاندىق عيماراتىنا دا زاقىم كەلمەگەن. اۆاريالىق جاعدايدى قالىپقا كەلتىرۋ ءۇشىن 2 كران, 1 جىلجىمالى دانەكەرلەۋ اگرەگاتى, فيليالدىڭ 15 مامانىنان قۇرالعان توپ جۇمىس جاسادى. «قىزىلورداجىلۋەلەكترورتالىعى» مەملەكەتتىك كوممۋنالدىق كاسىپورنىنىڭ ديرەكتورى مەدەت ۋسايننىڭ ايتۋىنشا, بۇگىندە مۇرجانىڭ جارامدى بولىگى قايتا ورناتىلىپ, № 2,4 قازاندىقتار ىسكە قوسىلىپ, جىلۋ بەرىلۋدە.
– وسى جىلدىڭ 1-2 ساۋىرىندە وبلىس اۋماعىندا قالىپتاسقان مەتەورولوگيالىق قۇبىلىس سالدارىنان 24 نىسانعا زاقىم كەلدى. شاتىرى ۇشقان 22 نىساننىڭ بارلىعى دەرلىك جارتىلاي نەمەسە ءىشىنارا زاقىمدانعان. قازىر قالا جانە اۋدانداردا كەلتىرىلگەن شىعىن كولەمى ەسەپتەلىپ جاتىر, – دەيدى وبلىس اكىمى اپپاراتى توتەنشە جاعدايلاردىڭ الدىن الۋ جانە جويۋ ءبولىمىنىڭ باسشىسى اعايشا سماتوۆا.
شاتىرسىز قالعان عيماراتتار قاتارىندا 6 مەكتەپ, 1 كوللەدج, 3 اۋىلدىق مادەنيەت ءۇيى, 9 مەملەكەتتىك مەكەمە, 2 كوپقاباتتى تۇرعىن ءۇي, 3 جەكە باسپانا بار.
بريفينگتە «قازگيدرومەت» رمك قىزىلوردا وبلىسى بويىنشا فيليالىنىڭ ءبولىم باسشىسى ايگەرىم جوكەلوۆا الداعى كۇندەرى جەل ەكپىنى تومەندەپ, اۋا تەمپەراتۋراسى تۇندە 7+12, كۇندىز 15+23 گرادۋسقا دەيىن كوتەرىلەتىنىن ايتتى.
قىزىلوردا
