ادەتتە, الاياقتار باعدارلامالىق قامتىلىم ارقىلى اۋىستىرىلاتىن نومىرلەردى پايدالانادى. سوندىقتان بىلتىر بايلانىس وپەراتورلارى تەلەكوممۋنيكاتسيا جەلىلەرىندەگى رۇقسات ەتىلمەگەن ارەكەتتەردى, ونىڭ ىشىندە الاياقتىق ارەكەتتەردى (انتيفرود جۇيەسى) بولدىرماۋ ءۇشىن ىنتىماقتاستىق تۋرالى كەلىسىمگە قول قويدى. ماسەلەن, 2022 جىلى اتالعان جۇيەنىڭ ناتيجەسىندە بايلانىس جەلىلەرىندەگى اۋىسىمدىق نومىرلەردەن شامامەن 18 ملن شەتەلدىك قوڭىراۋ بۇعاتتالدى, 2023 جىل باستالعالى بۇل كورسەتكىش 8,5 ملن قوڭىراۋدى قۇراعان.
سونداي-اق ۆەدومستۆو ىشكى ىستەر مينيسترلىگىمەن جانە بايلانىس وپەراتورلارىمەن بىرلەسىپ, بىلتىر الاياقتىق جاعدايلارىنىڭ جيىلەپ كەتۋىنە بايلانىستى ەل تۇرعىندارىنىڭ حاباردارلىعىن ارتتىرۋ جۇمىسىن ۇيىمداستىرىپ, ەسكەرتۋ سيپاتىنداعى SMS-حابارلامالاردى جىبەرىپ وتىرۋدى قولعا الدى. ماسەلەن, «كسەلل» اق الاياقتىق نومىرلەردى انىقتاۋ جانە بۇعاتتاۋ, سونداي-اق كەلىپ تۇسەتىن الاياقتىق قوڭىراۋلاردى شەكتەۋ جۇيەسىن ەنگىزدى. جۇيەنىڭ تيىمدىلىگىن ارتتىرۋ جانە باسقا ءموبيلدى وپەراتورلاردى نومىرلەي وتىرىپ, قوڭىراۋلاردى بۇعاتتاۋ ءۇشىن «موبايل تەلەكوم-سەرۆيس» جانە «كار-تەل» سەرىكتەستىكتەرىمەن بىرلەسىپ, قوڭىراۋ كەلىپ تۇسەتىن ءنومىردى اۋىستىرۋ مانىنە حالىقارالىق ترافيكتى ءوزارا تەكسەرۋ ءۇشىن ينتەگراتسيالىق ورتا ەنگىزىلدى.
قازىر تىركەلگەن بايلانىس وپەراتورلارىمەن ءموبيلدى نومىرلەردەن قالالىق نومىرلەرگە جانە قالالىق نومىرلەردەن ءموبيلدى نومىرلەرگە اۋىستىرۋدى بولدىرماۋ بويىنشا شارالار پىسىقتالىپ جاتىر.
سونىمەن قاتار مينيسترلىك ازاماتتاردى الاياقتاردىڭ قۇربانى بولماس ءۇشىن قاۋىپسىزدىكتىڭ نەگىزگى ەرەجەلەرىن ساقتاۋعا شاقىردى. ياعني ينتەرنەت-بانكينگتەگى نەمەسە ءموبيلدى قوسىمشاداعى جەكە كابينەتتىڭ ءپارولىن ەشكىمگە ايتپاۋ كەرەك. «دەربەس دەرەكتەرىڭىزدى, بانك كارتاڭىزدىڭ دەرەكتەمەلەرىن, كارتانىڭ قولدانىلۋ مەرزىمىن, CVC/CVV-كودىن (بانك كارتاسىنىڭ ارتىنداعى ءۇش سان, كارتانىڭ تۇپنۇسقالىعىن تەكسەرۋ كودى), كود ءسوزىن جانە قاراجاتتىڭ قالدىعىن بەيتانىس جاندارعا ايتۋعا بولمايدى. جاسالعان وپەراتسيانى راستاۋ ءۇشىن SMS-كودتى ەشكىمگە كورسەتپەگەن ابزال», دەلىنگەن مينيسترلىك حابارلاماسىندا.
ۆەدومستۆو ەلىمىزدە ۇرلانعان ابونەنتتىك قۇرىلعىلاردىڭ ء(ىىم دەرەكتەرى) تىزىلىمىندە بولۋى ءۇشىن IMEI كودتارىن تەكسەرۋدىڭ تسيفرلىق سەرۆيسى قۇرىلعانىن, سونداي-اق https://imei.rfs.gov.kz سايتىنان ۇرلىق ءۇشىن پايدالانىلعان تەلەفونداردى قايدا تەكسەرۋگە بولاتىنىن ەسكە سالدى. مينيسترلىك قىزمەتىنىڭ بۇل باعىتتاعى جۇمىسى تۇراقتى نەگىزدە جالعاسا بەرمەك.
