قازاقستان ىشكى نارىقتى تۇراقتاندىرۋ ءۇشىن جانار-جاعارماي باعاسىن قىمباتتاۋعا ءماجبۇر.
«قازاقستاندا ديزەل تاپشىلىعىنىڭ باستى سەبەبى - باعاداعى ديسپروپورتسيا. وتاندىق وتىن باعاسى كورشى ەلدەرمەن سالىستىرعاندا ايتارلىقتاي ارزان. قازاقستان الەم بويىنشا جانارمايى ەڭ ارزان 10 ەلدىڭ قاتارىنا كىرەتىنىن ايتا كەتۋ كەرەك. ماسەلەن, رەسەيدە ديزەل باعاسى (1 ءليترى) - 345 تەڭگە. بۇل بىزدەگى نارىقتان 45 پايىزعا قىمبات. قىرعىزستانداعى باعا 64 پايىزعا جوعارى: 1 ءليترى – 390 تەڭگە. وزبەكستانداعى باعا قازاقستانمەن سالىستىرعاندا 2 ەسە جوعارى: 1 ءليترى – 480 تەڭگە», دەدى بولات اقشولاقوۆ.
ونىڭ ايتۋىنشا, بۇل بۇيىرىققا قاتىستى ءتيىستى جوبا 3 ساۋىردە جاريالانىپ, 12 ساۋىردە كۇشىنە ەنەتىنىن ايتا كەتتى.
«جانار-جاعارماي نارىعىن تۇراقتاندىرۋ ءۇشىن قازاقستان مەن كورشى ەلدەر اراسىنداعى باعا ايىرماسىن تومەندەتۋ قاجەت. سوندىقتان ءبىز كۇردەلى, الايدا ءتيىستى قادامعا بارۋىمىز كەرەك: شەكتى بولشەك ساۋدا باعاسىن كوتەرگەن ءجون», دەدى بولات اقشولاقوۆ.
اقشولاقوۆتىڭ ايتۋىنشا, بۇدان كەيىن بەنزين ءوندىرىسى 70 پايىزعا, ديزەل 30 پايىزعا ارتادى. ال ەكسپورتتان تۇسەتىن تابىس 50 پايىزدان 120 پايىزعا دەيىن كوتەرىلەدى.
«بۇگىندە باعا ايىرماشىلىعىن قىسقارتپاساق, جاقىن ارادا جانارماي تاپشىلىعىنا تاپ بولۋىمىز مۇمكىن. بۇل قادامعا بارماساق, سالانى ودان ءارى دامىتۋ جولدارىن جاۋىپ, ەلدىڭ ەنەرگەتيكالىق قاۋىپسىزدىگىنە قاۋىپ توندىرەمىز», دەدى بولات اقشولاقوۆ.
