ەلوردادا كوركەم گيمناستيكادان استانا قالاسىنىڭ چەمپيوناتى ءوتتى

مەملەكەت باسشىسى ءوز جولداۋلارى مەن تاپسىرمالارىندا بۇقارالىق سپورت ماسەلەسىنە بىرنەشە رەت نازار اۋداردى. ەلوردادا بۇل باعىتتا ناقتى جۇمىستار ءجۇرىپ جاتىر – سپورت نىساندارى سالىنىپ، ءتۇرلى جاستاعى تۇرعىنداردى قامتيتىن سەكتسيالار اشىلىپ جاتىر. جۋىردا عانا ەلورداداعى كوركەم گيمناستيكا شەبەرلەرىنە جاڭا جاتتىعۋ زالى بەرىلىپ، ينرفاقۇرىلىمعا قاتىستى ماسەلە شەشىلگەن بولاتىن. ەندى، مىنە، سول جەردە العاش رەت قالالىق اشىق چەمپينات ۇيىمداستىرىلدى.

«بيىلعى جارىسىمىز جاڭا عيماراتتا ءوتىپ جاتىر. باستىسى بۇل عيمارات كوركەم گيمناستيكانىڭ تالاپتارىنا ساي. بۇل ورتالىقتىڭ عيماراتىن جالعا الدىق. قازىرگى تاڭدا قىزدارىمىز دايىندالىپ جاتىر، بالالار وتە قۋانىشتى. اتالمىش چەمپيونات جىل سايىن ناۋرىز - مامىر ايىندا ءداستۇرلى تۇردە ءوتىپ تۇرادى. وسى جارىستا استانا قالاسىنىڭ قۇراما كومانداسىن انىقتايتىن بولامىز. سۋىرىلىپ شىققان ۇزدىكتەر الداعى كوپتەگەن جارىستارعا قاتىسۋعا جولداما الادى. بۇگىنگى تاڭدا ماقساتىمىز - كوركەم گيمناستيكانى ەلوردادا كەڭىنەن دامىتۋ جانە وليمپيادا تۇرعىسىنان جاس بۋىندى دايىنداۋ»، دەدى استانا قالاسىنىڭ كوركەم گيمناستيكا فەدەراتسياسىنىڭ پرەزيدەنتى سايرانبەك ءابىلحايىر.

ۇمىتكەرلەر بىرنەشە جاس دەڭگەيى مەن گيمناستيكانىڭ بىرنەشە باعىتتارى بويىنشا مەدالدار جيىنتىعىن ساراپقا سالدى. جارىستىڭ ناتيجەسىندە قالالىق قۇراما جاساقتالدى. ىرىكتەۋدەن وتكەن سپورتشىلار الداعى حالىقارالىق، قۇرلىقتىق جانە الەمدىك دودالارعا كەشەندى دايىندىقتى باستايدى.

ەستەرىڭىزگە سالا كەتەيىك، ەلوردالىق گيمناستار جۋىردا عانا گرەكيا استاناسى افينىدا وتكەن كوركەم گيمناستيكادان VIII «افروديتا كۋبوگى» اتتى حالىقارالىق تۋرنيردەن ءتورت بىردەي جۇلدەلى ورىندى يەلەندى.