– مەنىڭ بىلۋىمشە, ءسىز سوناۋ باتىس قازاقستاننىڭ تۋماسىسىز. شىعىسقا جولىڭىز قالاي ءتۇستى؟
– الماتىداعى ت.جۇرگەنوۆ اتىنداعى ونەر اكادەمياسىندا وقىدىم. كەيىن ديپلومدىق جۇمىس جازۋ كەزىندە وسكەمەننىڭ تەاتر وكىلدەرى كەلىپ, ۇسىنىس جاسادى. اۋەلدە جوسپارىمىز باسقا ەدى. بىراق وسىندا, شىعىسقا كەلەتىن بولىپ شەشتىك. مەن عانا ەمەس, بىرگە وقىعان قۇربى-دوستارىم بىرگە كەلدىك. ءيا, ءوزىم سىرىم اۋدانى, جىمپيتى اۋىلىندا دۇنيەگە كەلدىم. سىرىم دات ۇلى, قادىر مىرزاليەۆ تۋعان اۋىل. قادىر مەنىڭ تۋعان اتاممەن دوس بولعان. بىراق, ورال قالاسىندا ءوستىم. ءسويتىپ, جۇمىس بابىمەن وسكەمەنگە كەلىپ, وسىندا تۇرمىسقا شىقتىم. ەكى بالامىز بار. قازىر جاستار تەاترىندا جۇمىس ىستەپ جاتىرمىن.
– ونەر ورداسى الماتىدا نەگە قالمادىڭىز؟
– شىعىس ءۇش ۇيىقتاسام, تۇسىمە كىرمەپتى. الماتىدا جۇمىس ىستەگىم كەلدى. بىراق, ول جاقتا باستى رولگە كەزەڭ-كەزەڭىمەن عانا جەتەسىڭ. ال مۇندا قازاق حاندىعىنىڭ 550 جىلدىعىنا بايلانىستى قويىلعان «كەرەك-جانىبەك» سپەكتاكلىندە باستى رولدەردىڭ بىرىندە بولدىم. ارينە, وقۋ بىتىرە سالا ۇلىقبەك حاكىمنىڭ قىزى, ءامىر تەمىردىڭ نەمەرەسى ءرابيا بەگىم سۇلتاننىڭ ءرولىن سومداۋ وڭاي بولمادى.
– تاعى قانداي ايتۋلى رولدەردى سومدادىڭىز؟
– 2021 جىلى تۇڭعىشباي جامانقۇلوۆ وسكەمەنگە كەلىپ, «قازاقتار» سپەكتاكلىن قويدى. سوندا مۇحاممەد ءشايبانيدىڭ بالدىزى ناگيۋر حانىمنىڭ ءرولىن الدىم. سونىمەن قاتار, كوپشىلىك كورەرمەننىڭ كوڭىلىنەن شىققان «الجير» قويىلىمىندا تۇرار رىسقۇلوۆتىڭ جۇبايى ءازيزا رىسقۇلوۆانى سومدادىم. جالپى ءار ءرولىم مەن ەرەكشە.
– وبرازعا كىرۋ, سپەكتاكلدەن سوڭ ودان شىعۋ قيىن ەمەس پە؟
– جوعارى وقۋدان سوڭ ءبارىن ءبىلىپ تۇرعانداي بولاسىڭ. بىراق, تاجىريبەنىڭ ورنى بولەك ەكەن. العاشىندا ءبىلىم عانا بولسا, قازىر تاجىريبە بار. ونىڭ ۇستىنە, ۋاقىت وتە شىڭدالادى ەكەنبىز. قازىر رولگە كىرۋ, ودان شىعۋ وڭاي. ۇستازدارىمىز «وبرازدان شىعا الماۋ, كاسىبيلىك ەمەس» دەيتىن. كورەرمەن قول سوعىپ, ساحنا شىمىلدىعى جابىلعاندا كەيىپكەر رولىنەن شىعامىز.
– دەمەك, ۇستازداردىڭ ەڭبەگى ەش كەتپەگەنى عوي.
– ءيا, ۇستازدارىمىزعا مىڭ العىس! ۇزاق جىلدار م.اۋەزوۆ اتىنداعى دراما تەاتردا جۇمىس ىستەگەن ورازحان كەنەباەۆ اعامىز «اكتەرگە قىزمەت ەتەتىن وتىز نەگىزگى قۇرال» دەپ, سونى ۇيرەتتى بىزگە. سول داپتەرىمدى ءالى ساقتاپ ءجۇرمىن. ول كىسى «اكتەردىڭ بولدىم, تولدىم دەگەن كۇنى – ولگەن كۇنى» دەيتىن. وتە دۇرىس ايتقان. ۇنەمى ىزدەنىستە بولۋىمىز كەرەك.
– جالپى تەاتر ونەرىنە قالاي كەلدىڭىز؟ بالا كۇننەن قىزىعۋشىلىق بولدى ما؟
– شارا جيەنقۇلوۆانىڭ بيوگرافيالىق كىتابىن وقىپ, تەاترعا قىزىعۋشىلىعىم وياندى. كۇلاش بايسەيىتوۆا ەكەۋى كيىم تاپشى زاماندا ءبىر كيىمدى كەزەك كيىپ, ساحناعا شىعادى ەكەن. ولار قازاق تەاترىنىڭ ىرگەسىن قالاۋعا ۇلەس قوسسا, ءبىز دايىن ساحنادا ءجۇرمىز. ارمانىم, تەاتر ونەرىندە ءىزىم قالسا ەكەن. تەاتر مەن ءۇشىن سيقىرلى, ءمولدىر ونەر سەكىلدى بولىپ كورىنەدى.
– ءسىزدىڭ ويىڭىزشا, تەاتر قوعامدى تاربيەلەي الىپ جاتىر ما؟
– ء«وزىم بولىپ, ءوزىڭدى كورسەتەيىن وزىڭە» دەگەن ابايدىڭ ءسوزى بار عوي. سول سەكىلدى قازىرگى قوعامدى وزدەرىنە كورسەتۋدىڭ ءبىر قۇرالى تەاتر دەپ ويلايمىن. بىراق, تەاترعا كەلسە ەكەن دەگەن ادامداردىڭ كاتەگورياسى كەلمەيدى. ماسەلەن, «ۆا-بانك» سپەكتاكلىنە وتباسىلىق قۇندىلىقتىڭ باعاسىن بىلمەيتىندەردى الىپ كەلىپ كورسەتسە عوي دەيمىن.
– اڭگىمەڭىزگە راحمەت! كورەرمەندەرىڭىز كوپ بولسىن!
