جاڭادان سايلانعان دەپۋتاتتاردى استانا اكىمى جەڭىس قاسىمبەك قۇتتىقتادى.
«ەلوردا ءماسليحاتى دەپۋتاتتارىنىڭ الدىندا ۇلكەن جاۋاپكەرشىلىك تۇر. استانادا 1 ميلليون 300 مىڭنان استام ادام تۇرادى. قالادا سۋ تاپشىلىعى بايقالادى, تاعى دا باسقا قوردالانعان ماسەلەلەر بار. الداعى ۋاقىتتا سولاردى بىرلەسىپ شەشەمىز دەگەن نيەتتەمىن. تۇرعىنداردىڭ سانى وسكەن سايىن قالادا بالاباقشا مەن مەكتەپ جەتىسپەۋشىلىگى بايقالادى. قالا تۇرعىندارىنىڭ سەنىمىن اقتاۋ كەرەك. مەملەكەت باسشىسى بىرقاتار مىندەتتەر جۇكتەدى, سول تاپسىرمالاردى ورتاق ورىنداۋدا ءبىزدىڭ دە قوساتىن ۇلەسىمىز زور», دەدى اكىم.
ءارى قاراي دەپۋتاتتار سەسسيانىڭ كۇن ءتارتىبىن قاراستىرۋعا كىرىستى. ءماسليحاتشىلار تۇراقتى كوميسسيالاردىڭ قۇرامى مەن ولاردىڭ توراعالارىن تاعايىندادى.
ازامات ايتقوجين زاڭدىلىق, قۇقىقتىق ءتارتىپ جانە جۇرتشىلىقپەن جۇمىس ماسەلەلەرى جونىندەگى كوميسسيانىڭ توراعاسى بولسا, بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى كوميسسيانىڭ توراعاسى بولىپ كەندەباي ادامبەكوۆ سايلاندى. قۇرىلىس, ەكولوگيا, كولىك, ساۋدا جانە تكش ماسەلەلەرى جونىندەگى كوميسسياعا ۆلاديسلاۆ سەرگەەۆ, ال الەۋمەتتىك-مادەني دامۋ ماسەلەلەرى جونىندەگى كوميسسياعا اسقار سماعۇلوۆ توراعالىق ەتەدى. سونداي-اق بەرىك جاكەنوۆ Amanat پارتياسى فراكتسياسىنىڭ جەتەكشىسى بولىپ سايلاندى.
ەلوردا ءماسليحاتىنىڭ قۇرامىندا 34 دەپۋتات, Amanat پارتياسىندا 12 ماندات, قحپ پارتياسىندا جانە Baytaq قازاقستاندىق جاسىلدار پارتياسىندا ءبىر ماندات جانە «اق جول» پارتياسىندا ءۇش ماندات بار. تاعى 17 دەپۋتات ءبىر مانداتتى سايلاۋ وكرۋگتەرى بويىنشا سايلاندى. جاڭا ءماسليحات قۇرامىندا 25 ەر ادام جانە 9 ايەل بار. ەڭ جاس دەپۋتات – 22 جاستا, ەڭ ۇلكەنى – 63 جاستا. دەپۋتاتتاردىڭ ورتاشا جاسى – 46 جاس.
