عىلىم • 30 ناۋرىز، 2023

قازاقستاندا 3D پرينتەرلەر ءوندىرىسى ىسكە قوسىلادى

بيىل العاش رەت ەۋرازيا ۇلتتىق ۋنيۆەرسيتەتىندە ءارتۇرلى فورماتتاعى 3D پرينتەرلەر قۇراستىراتىن شاعىن ءوندىرىس اشىلادى. ءادديتيۆتى تەحنولوگيانى قۇرىلىس جانە باسقا يندۋستريالاردا قولدانۋعا بولادى. جوسپارلانعان جىلدىق وندىرىستىك قۋاتتىلىق - 300 پرينتەرگە دەيىن.

مارجان تىلەۋبەك

ۋنيۆەرسيتەتتىك عىلىم وندىرىسپەن ساباقتاستىقتى بەلسەندى دامىتىپ جاتىر. ەۇۋ عالىمدارى وندىرۋشىلەرمەن بىرلەسە 3D پرينتەرلەر شىعارۋدىڭ يننوۆاتسيالىق تەحنولوگيالارىن قولدانۋعا نيەتتى. ءوندىرىس «ENU-Lab» عىلىمي-وندىرىستىك ورتالىعىنىڭ بازاسىندا قۇرىلادى.

«3D پرينتەرلەردى شىعارۋ باستاپقىدا قۇرىلىس جانە باسقا سالالاردا جوسپارلانعان. بولاشاقتا «ENU-Lab» عىلىمي-وندىرىستىك ورتالىعىنىڭ بازاسىندا 3D پرينتەردى گەوپوليمەر نەگىزىندەگى جاڭا قۇرىلىس ماتەريالدارىن شىعارۋ ءۇشىن پايدالانىپ، ودان ءارى كوممەرتسيالاندىرۋ جوسپاردا بار. وسى سەگمەنتتەگى جاڭا تەحنولوگيالار قولدانىلاتىن ەسكەرسەك، ءوندىرىس قازاقستاندا ءبىرىنشى رەت ىسكە قوسىلادى»، دەپ ءتۇسىندىردى ەۇۋ يننوۆاتسيالاردى دامىتۋ دەپارتامەنتىنىڭ ديرەكتورى اسەل دجەكسەمباەۆا.

شىعارىلاتىن تاۋاردىڭ نەگىزگى تاپسىرىس بەرۋشىلەرى ەلىمىزدىڭ جانە شەت مەملەكەتتەردىڭ تەحنوپاركتەرى، ءبىلىم بەرۋ، عىلىمي مەكەمەلەرى، يندۋستريالىق كاسىپورىندارى بولماق. ءونىمدى ەكسپورتتاۋ مۇمكىندىگى بار.

«قازىر ءبىز ەلىمىزدىڭ اۋماعىندا جەتكىزۋ جانە تەحنيكالىق قولداۋ تەحنولوگيالارىن ازىرلەيمىز. ال كەيىن سىرتقى نارىققا شىعۋدى جوسپارلاپ وتىرمىز. 3D پرينتەرلەرىمىزدى ساتىپ الۋعا دايىن وزبەكستان، قىرعىزستانمەن بايلانىس ورناتتىق»، دەدى «SpaceLab» جشس ديرەكتورى ارمان بەكەمباەۆ.

جوباعا ەۇۋ ستۋدەنتتەرى دە قاتىسىپ، پراكتيكالىق تاجىريبەلەرىن شىڭداۋ جانە عىلىمي زەرتتەۋلەر جۇرگىزۋگە مۇمكىندىك الادى.

ايتا كەتەيىك، 2022 جىلدىڭ قىركۇيەگىندە ەۇۋ زەرتتەۋ ۋنيۆەرسيتەتى مارتەبەسىن الدى. ۋنيۆەرسيتەت ءبىلىم، عىلىم جانە ءوندىرىستىڭ ءوزارا ساباقتاستىعىن بەلسەندى دامىتىپ كەلەدى.