وسىدان بىرنەشە جىل بۇرىن تۇماندى البيوندا «بولاشاق» باعدارلاماسى ارقىلى ءبىلىم الۋدىڭ ءساتى تۇسكەن. سول كەزدە تىلدىك كۋرستان ءوتىپ جۇرگەندە ۇستازدارىمىز ءبىزدى پارلامەنت ۇيىنە اپارعان-دى. قاۋىمداستىق پالاتاسىنىڭ كەزەكتى جيىنىن تاماشالاپ, قىزۋ پىكىرتالاستى تىڭدادىق. بۇل ءبىر جاعىنان اعىلشىن ءتىلىن ۇيرەنۋگە كومەكتەسسە, ەكىنشى جاعىنان بىرىككەن كورولدىكتىڭ زاڭ شىعارۋشى مەكەمەسى قالاي جۇمىس ىستەيتىنىن بىلۋگە تاپتىرماس مۇمكىندىك ەدى.
وسىدان كەيىن اتالعان ەلدىڭ پارلامەنت وتىرىستارىن ءاردايىم باقىلاماساق تا, ارا-تۇرا YouTube سەكىلدى الەۋمەتتىك جەلىلەردەن ءتۇرلى قىزىقتى ساتتەرىن كورىپ تۇرامىز. ماسەلەن, ءبىر ۆيدەودا دەپۋتاتتار ۇلىبريتانيانىڭ پرەمەر-ءمينيسترى بوريس دجونسوننىڭ اتقارىپ جاتقان جۇمىسىن مايشاممەن قاراعان. قاۋىمداستىق پالاتاسىنىڭ سپيكەرى ليندسي حويل جيىن كەزىندە ىشكى تارتىپكە باعىنباي, ءسوزدى بولە بەرگەن ەكى دەپۋتاتقا «اۋزىڭدى جاپ تا, شىعىپ كەت!», دەپ ايقايلايدى. كەلەسى كادردا كەزەكتى ساۋالعا جاۋاپ بەرگەن بوريس دجونسوننىڭ سوزىنە دەپۋتاتتار گۋىلدەپ نارازىلىق بىلدىرەدى.
ەندى ءبىر ۆيدەودا لەيبوريستىك پارتيا مەن كونسەرۆاتيۆتىك پارتيا مۇشەلەرى جاعا جىرتىسارداي پىكىر تالاستىرادى. ماسەلە سالىق جۇيەسىنە كەلگەندە لەيبوريستىك پارتيانىڭ مۇشەسى دەننيس سكيننەر سول كەزدەگى پرەمەر-مينيستر دەۆيد كەمەروندى سۇراقتىڭ استىنا الىپ, «پاناما قاعازدارىنا» قاتىسىن, سالىقتان جالتارعانىن العا تارتادى. ءسوزىنىڭ سوڭىن «بۇعان نە ايتاسىڭ, Dodgy Dave? (دۇمشە دەيۆ)», دەپ اياقتايدى. ۇلىبريتانيا پارلامەنتىنىڭ ەرەجەسىنە سايكەس, دەپۋتاتتار ءبىر-ءبىرىنىڭ جەكە باسىنا تيىسۋگە بولمايدى. سوندىقتان سپيكەر دجون بەركوۋ ودان dodgy سوزىنەن باس تارتۋدى سۇرادى. بىراق د.سكيننەر ايتقانىنان قايتپاي, تاعى دا «دۇمشە دەيۆ» دەگەنىنەن تانبادى. اقىرى پالاتا سپيكەرى ونى وتىرىستان شىعارىپ جىبەردى.
قاراي بەرسەڭىز, وسىنداي قىزىقتار وتە كوپ. دەپۋتاتتاردىڭ ءبىرى «وتىرىكشى», دەپ ايقايلايدى, پارلامەنت مۇشەسى سپيكەرمەن ايتىسىپ, كىمنىڭ ارەكەتى دۇرىس, كىمدىكى بۇرىس ەكەنىن انىقتاۋعا تىرىسادى. پالاتانىڭ جۇمىسىن ۋاقىتشا توقتاتقانى ءۇشىن سپيكەرگە «ۇيات, ۇيات, ۇيات», دەپ نارازىلىق بىلدىرەدى. شوتلانديالىق دەپۋتاتتار ءبىر اۋىزدان جيىننان شىعىپ كەتەدى. قويشى, ايتەۋىر بىتپەيتىن ۇرىس-كەرىس. كەز كەلگەن ماڭىزدى ماسەلەنى جان-جاقتى تالقىلاپ, ونىڭ بۇكىل كەمشىلىگىن باسا ايتىپ, قابىلداناتىن زاڭنىڭ ءمىنسىز بولۋىنا بارىن سالادى. ءتىپتى سپيكەرگە «ۇيات» دەپ ايقايلاپ, ۇكىمەت باسشىسىن «وتىرىكشى» دەپ ايتۋعا قىسىلمايدى.
جالپى, الەم ەلدەرىندەگى پارلامەنتتىڭ قىزىق-شىجىعى مۇنىمەن بىتپەيدى. كەي ەلدەردە زاڭ شىعارۋشى ورگان مۇشەلەرى ءتىپتى جاعا جىرتىسۋعا ءازىر. ماسەلەن, ۋكراينا راداسىندا دەپۋتاتتار ءبىر-بىرىنە جۇدىرىق الا جۇگىرگەنىنە تالاي مارتە كۋا بولدىق. گرۋزيا, ارمەنيا سەكىلدى ەلدەردە دە مۇنداي جاعداي كەزدەسىپ تۇرادى. كورشىلەس قىرعىزستانداعى جوعارعى كەنەش دەپۋتاتتارى دا كەيدە جاعاعا جارماساتىنىن بۇقارالىق اقپارات قۇرالدارىنان ەستىپ-ءبىلىپ ءجۇرمىز. تۇركيادا ۇلى ۇلتتىق ءماجىلىس مۇشەلەرى تالاي مارتە جەكپە-جەكتىڭ كەرمەك ءدامىن تاتتى.
مۇحيتتىڭ ارعى بەتىندەگى اقش-تا دا تالاي وقيعا جەتەرلىك. كونگرەسس مۇشەلەرى كاپيتوليدە ءبىر-بىرىنە ءجيى جۇدىرىق الا جۇگىرمەسە دە, وڭىرلىك دەڭگەيدەگى دەپۋتاتتار تالاي مارتە جاعا ۇستاسقانى بەلگىلى. ودان قالا بەردى, سەنات پەن وكىلدەر پالاتاسى – قىزۋ پىكىرتالاستىڭ ناعىز ورداسى. البەتتە, اقش ەندى-ەندى قالىپتاسىپ جاتقاندا كونگرەسستە تالاي تارتىس وتكەن. ءابۇيىر بولعاندا, كەيىنگى جىلدارى مۇحيتتىڭ ارعى بەتىندەگى دەپۋتاتتار سابىرلىق ساقتاپ تۇر.
ءتىپتى قوي اۋزىنان ءشوپ الماستاي كورىنەتىن جاپوندار دا ماڭىزدى زاڭ جوباسىن تالقىلاعاندا بارىن سالادى. ماسەلەن, 2015 جىلى شەتەلدە اسكەري-وقۋ جاتتىعۋ جيىنىن وتكىزۋ تۋرالى زاڭ جوباسىن قاراۋ كەزىندە پىكىرتالاس قىزىپ, اقىر سوڭىندا جاپونيا دەپۋتاتتارى جۇدىرىققا جۇگىنۋىنە تۋرا كەلىپتى. قىسقاسى, دامىعان ەلدەردىڭ قاي-قايسىنا قاراساڭ دا پارلامەنت وتىرىستارى ايتىس-تارتىسقا, داۋ-دامايعا تولى. ۇسىنىلعان زاڭ جوبالارىنىڭ ۇزاق ۋاقىت ەگجەي-تەگجەي تالقىلانباي قابىلدانۋى سيرەك.
قۇدايعا شۇكىر, ءبىزدىڭ سەنات پەن ءماجىلىستىڭ وتىرىستارى تىنىش جاعدايدا وتەدى. دەپۋتاتتاردىڭ ءبىر-بىرىنە قۇرمەتى شەكسىز, ءوزارا ارتىق پىكىر ايتپايدى. سپيكەردىڭ ءسوزىن دە قۇلاق سالىپ تىڭداۋدى ءجون كورەدى. پارلامەنتكە ەنگەن قۇجاتتار ءبىر اۋىزدان قابىلدانادى.
جاڭا جاساقتالعان تومەنگى پالاتا دەپۋتاتتارى دا تاتۋ بولىپ, حالىقتىڭ مۇددەسى ءۇشىن جۇمىس ىستەيدى دەپ سەنەيىك.
