بۇل جوبا وتكەن جىلى باستالعان. الماتى ستوماتولوگيالىق كوللەدجىنىڭ ديرەكتورى ساتباەۆ ۋنيۆەرسيتەتىنە جۇمىس ساپارىمەن بارىپ, جاس عالىمدارمەن كەزدەسكەن. جيىندا ستوماتولوگيا سالاسىنىڭ قيىنشىلىقتارى تالقىلانعان ەدى.
«بۇل كەزدەسۋ ءالى ەسىمدە. سول كەزدە ءبىز ءتىس پروتەزىن ورناتۋ كەزىندە قىزىل يەكتىڭ اۋىرسىنۋ پروتسەسىن تالقىلادىق. بۇرىن ءتىستىڭ اۋىرسىنۋىن دارىگەر ءوز قولىمەن انىقتايتىن. بىراق ءار ادامنىڭ اۋرۋى ءارتۇرلى عوي. جاساندى ءتىس سالدىرعان ادامداردىڭ جاق سۇيەكتەرى قاتتى اۋىرىپ, دارىگەرگە قايتادان كەلەدى ەكەن. سوندىقتان ءتىس ماماندارىنا ناۋقاستىڭ قىزىل يەگىنىڭ سەزىمتالدىعىن, ونىڭ اۋىرسىنۋىن انىقتايتىن قۇرال قاجەت بولدى. وسىنى ەستىگەننەن كەيىن مەن بىردەن مۇنداي قۇرىلعىنى قالاي جاساۋ كەرەكتىگى تۋرالى ويلانىپ, شابىتتانا ءتۇستىم», دەيدى اقجول.
اقجولدىڭ نەگىزگى ماماندىعى – ەلەكتروندى مەديتسينالىق قۇرىلعىلاردى قۇراستىرۋ. جوبا «قىزىل يەك سەزىمتالدىعىن ولشەيتىن قۇرىلعى» دەپ اتالدى. قۇرىلعىنىڭ جۇمىسى دەنە قىزۋىن ولشەۋگە ارنالعان قۇرىلعىلارعا ۇقساس بولىپ كەلەدى. دەگەنمەن, بۇل قۇرىلعى سەزىمتالدىق دەڭگەيىن ولشەپ, ءتىس دارىگەرىنە ناۋقاستىڭ قانشالىقتى اۋىراتىنى تۋرالى ناقتى اقپارات بەرەدى.
جوبامەن اينالىساتىن عالىمدار توبى نارىقتى زەرتتەپ, ءارى شەتەلدە جاسالعان قۇرىلعىلاردى سالىستىرىپ, ءبىزدىڭ ەلدە دە وسىنداي ءونىم ءوندىرۋدى ۇيىمداستىرۋ ماقساتىمەن جۇمىس ىستەدى. دەگەنمەن, قاجەتتى قۇرىلعى نارىقتان تابىلماي, كوماندا قۇرىلعىنى جاڭادان قۇراستىرىپ جاسادى. وسىلايشا, الەمدە تەڭدەسى جوق قۇرال پايدا بولدى.
قازىرگى ۋاقىتتا جاس عالىمدار ءوز ونەرتابىستارىن سىناقتان وتكىزىپ, جان-جاقتى جەتىلدىرىپ جاتىر. اقجول ءنۇردانالىنىڭ ويلاپ تاپقان ونەرتابىسىنىڭ ءساتتى شىعۋى تەك الماتىدا عانا ەمەس, تۇتاس قازاقستاننىڭ ستوماتولوگيا سالاسىنداعى جاڭالىق بولماق.
