«مەن سايلاۋ الدىندا اۋىلداعى كاسىپكەرلىكتى دامىتۋ قاجەتتىگى تۋرالى انىق ايتتىم. بيىل تاعى 1,5 مىڭنان استام جوباعا بيۋدجەتتەن 143 ميلليارد تەڭگە بولىنەدى. بۇل – ماڭىزدى مىندەتتىڭ ءبىرى. ونى اۋىل شارۋاشىلىعى كووپەراتسياسى ارقىلى جۇزەگە اسىرۋ كەرەك. سول ءۇشىن «اۋىل اماناتى» جوباسى قولعا الىنادى. اۋىل تۇرعىندارىنا 5-7 جىلعا جىلدىق ءوسىمى 2,5 پايىز بولاتىن شاعىن نەسيە بەرىلەدى», دەدى پرەزيدەنت.
اۋىل شارۋاشىلىعى كووپەراتيۆتەرى حالىققا قىزمەت كورسەتۋ جانە ءونىم وتكىزۋ ءۇشىن قۇرىلادى. ولارعا قۇرال-جابدىق جانە تەحنيكا ساتىپ الۋ ءۇشىن سۋبسيديا بەرىلەدى. وسى ماقساتقا 1 تريلليونعا جۋىق تەڭگە بولىنەدى.
«اۋىل – ەل بەسىگى», «اۋىل اماناتى» جوبالارى اۋىلدى دامىتۋعا ارنالعان جاڭا تۇجىرىمداماعا ارقاۋ بولۋعا ءتيىس. توپىراقتىڭ قۇنارىن ساقتاپ, ونى جاقسارتۋ ءۇشىن جۇيەلى شارالار قابىلداۋ قاجەت. اۋىل شارۋاشىلىعى جەرلەرىن ءتيىمدى پايدالانۋ ءۇشىن باقىلاۋدى كۇشەيتۋ ماڭىزدى. ءونىم كولەمىن ارتتىرۋعا جانە ونى ارتاراپتاندىرۋعا باسا ءمان بەرگەن ءجون. اۋىل شارۋاشىلىعى سالاسىنداعى رەفورمالارعا ساپالى زاڭدار قاجەت. بۇل جۇمىسقا ماجىلىستەن ورىن العان «اۋىل» پارتياسى ءوز ۇلەسىن قوسادى دەپ سەنەمىن», دەدى ەل پرەزيدەنتى.
