قاراپ وتىرساق, اينالدىرعان ەكى-ءۇش جىل ىشىندە جاساعان جاقسىلىقتارى از ەمەس ەكەن. مۇقتاج جانداردى ازىق-ت ۇلىكپەن قامتىپ, ۇساق-تۇيەك الەۋمەتتىك كومەك كورسەتىپ وتىرعاندارى بىلاي تۇرسىن, كوپتەپ-كومەكتەپ, تۇرعىن ۇيگە دەيىن تۇرعىزىپ بەرگەن. بىراق قايىرىمدىلىقتارىن جارنامالاپ, كەۋدە سوعۋ ولار ءۇشىن جات. ايتپەسە, بەس ليتر سۇيىق ماي اپارىپ, الەۋمەتتىك جەلىگە بەس بەت پوست جازىپ جۇرگەن مەكەمەلەردى دە بىلەمىز. ولاردىڭ قاسىندا تارباعاتايدىڭ قامقور ازاماتتارى قاراپايىم. ەسەپ ءۇشىن ەمەس, ەل ءۇشىن ەڭبەك قىلۋدى ءجون كورەدى. ۇندەمەي-اق ۇلكەن ءىس تىندىرىپ, اعايىنداردىڭ العىسىنا بولەنىپ ءجۇر.
«جاقسىنىڭ جاقسىلىعىن ايت, نۇرى تاسىسىن» دەپ, اتقارىپ جاتقان يگى شارۋالارى جونىندە ءباسپاسوز بەتىندە جاريالاۋعا نيەتتەنىپ, «تارباعاتايدىڭ جومارت جاندارى» قورى مۇشەلەرىن اڭگىمەگە تارتقانبىز. اۋەلدە تارتىنشاقتادى, قاجەتى جوق دەستى. دۇرىس عوي, «وڭ قولىڭ بەرگەندى سول قولىڭ كورمەسىن» دەگەن بار. دەسە دە, بىرەۋگە بولماسا, بىرەۋگە وي سالىپ, ۇلگى بولارى انىق.
– «تارباعاتايدىڭ جومارت جاندارى» قورى قۇرىلا سالا قارجى قۇيىپ, ماقساتتى تۇردە اۋدان حالقىنا كومەك كورسەتە باستادىق. ارينە, اياق-قولى بالعاداي, ەڭبەككە جارامدى ازاماتتارعا ەمەس, كومەككە شىنايى ءزارۋ ادامدارعا قولۇشىن سوزىپ ءجۇرمىز, دەيدى جومارت جانداردىڭ ءبىرى, كاسىپكەر ابزال توقتارعازين.
ءار سالادا جۇمىس ىستەپ ءجۇرىپ, كەيىن كاسىپكە كەتكەن ابزال از قامتىلعان وتباسىلارعا ۇنەمى جاردەمدەسەدى. بىردە ازىق-ت ۇلىكتەي بەرسە, ەندى بىردە اقشالاي كومەك كورسەتەدى. كەرەك-جاراقتارىن جەتكىزىپ بەرەدى, ءۇي-جايلارىن جوندەيدى. «تارباعاتايدىڭ جومارت جاندارى» قورى بىرلەسىپ, اۋىلداعى جالعىزباستى ازاماتقا ءۇي دە كوتەرىپ بەرگەن. الدىن الا قور مۇشەلەرى ءۇيىنىڭ تۇرۋعا جارامايتىنىن انىقتاعان, اقىلداسقان. سونىمەن قاتار ازاماتتىڭ كومەككە شىنايى مۇقتاج ەكەنىنە دە كوز جەتكىزگەن. جالعىزباستى, ونىڭ ۇستىنە قانداي دا ءبىر دەرتكە شالدىققان. الايدا مەملەكەتتەن كومەك الا المايدى. ونىڭ سەبەبى ەشقانداي ساناتقا جاتپايدى ەكەن. ءسويتىپ, ابزال توقتارعازين قور مۇشەسى رەتىندە جاناشىرلىق تانىتىپ, مۇقتاج ازاماتقا لايىقتاپ, شاعىن ءۇي سالىپ بەرەدى. تۇرمىسىنا ىڭعايلى بولسىن دەپ سۋىنا دەيىن تارتقىزادى. ءبىر انىعى, ول جارياعا جار سالماي-اق كومەك جاسادى. بۇگىنگى كۇنگە دەيىن ابزالدىڭ مارتتىگىن اۋىلداستارى بولماسا, سىرت كوز ونشا بىلە بەرمەيدى.
– ءبىز كومەك كورسەتكەننەن, تيىن-تەبەنىمىز كەمىپ قالمايدى. كەرىسىنشە, قۇداي ەكى ەسەلەپ بەرەدى. ەكىنشىدەن, كىشىگە قامقورلىق, ۇلكەنگە قۇرمەت كورسەتۋ – ءاۋ باستا اكە-شەشەنىڭ بەرگەن تاربيەسى. از قامتىلعاندار كوپ عوي. كومەكتەسەمىز. بىراق ايتا بەرمەيمىز, دەيدى ابزال الماز ۇلى.
ابزالدىڭ ايتۋىنشا, بيىل تارباعاتاي اۋدانى, اسۋساي اۋىلىنا كۇمبەزىن كوك تىرەتىپ, مەشىت سالۋدى جوسپارلاپ وتىر. شەكارا بويىندا جاتقان اۋىلدىڭ قازىرگى مەشىتى ەسكىرگەن ەكەن.
– بيىل اسۋسايعا جاڭا مەشىت سالىپ بەرۋدى ويلاستىرىپ وتىرمىز. اۋىلدا بەس ۋاقىت ازان شاقىرىلىپ جاتسا, مەنمۇندالاپ مەشىت تۇرسا, حالىقتىڭ رۋحى كوتەرىلەر ەدى. ونسىز دا حالىق كوشىپ, شەكارا ماڭى بوس قالىپ جاتىر. سوندىقتان جوبا-جوسپارىن جاساپ, مەشىتتىڭ قۇرىلىسىنا كىرىسىپ كەتەتىن شىعارمىز, دەگەن دە ويىن ايتتى.
ودان بولەك, «تارباعاتايدىڭ جومارت جاندارى» قورى اۋداننىڭ ونەرپازدارىنا, سپورتشىلارىنا دا ۇنەمى قولداۋ كورسەتىپ, قولپاشتاپ وتىرادى. ال باسپانامەن قامتۋ سەكىلدى دەمەۋشىلىك كومەكتەر ءبىر عانا ازاماتپەن شەكتەلىپ قالماعان. ايتا بەرسەك, از ەمەس. ونىڭ ءبارىن ءتىزىپ شىعۋدى قورعا قارجى قۇيىپ جۇرگەن ازاماتتار اشىپ ايتۋدى ءجون كورمەدى. ەڭ باستىسى, اۋداننىڭ جاناشىرلارى بار. وسىنداي اۋىزبىرشىلىك, بەرەكە ءار اۋىلدا, ءار اۋداندا بولسا, قازاق باي بولادى.
شىعىس قازاقستان وبلىسى,
تارباعاتاي اۋدانى
