YouTube-ءتىڭ سەگمەنتىندە بالالارعا ارنالعان قازاق ءتىلدى مۋلتفيلمدەر, سەريالدار, ءتۇرلى بلوگتار مەن جوبالار جوققا ءتان. بارلارىنىڭ ىرعاعى باسەڭ, ساپاسى تومەن, وندايدى قازىرگى بالالار كورمەي, لەزدە ودان الدەقايدا قىزىقتى شەتەلدىك ارنالارعا اۋىستىرىپ جىبەرەدى.
وسى رەتتە قىرعىزستاندىق «D Billions» جوباسىن ايتار ەدىك. جوبانىڭ اۆتورى ەرنيست ۇمەتاليەۆتىڭ ايتۋىنشا, ولار كونتەنتتى ادەپكىدە قىرعىز كورەرمەندەرىنە ارناعان. قىسقا مەرزىم ىشىندە كورۋشىلەر سانى ارتىپ, ورىس جانە اعىلشىن ءتىلدى سەگمەنتكە دە ارناپ ۆيدەولار تۇسىرە باستاعان. قازىر ولاردىڭ الەۋمەتتىك جەلىدە 13 كانالى بار, جيىنتىق كورىلىم سانى 35 ملرد-تان اسادى. تۇسىرىلىمدەردە ورىندالاتىن اندەردىڭ بارلىعى اۆتورلىق شىعارمالار. ال مازمۇنى مەن ۆيزۋالدى ساپاسى, ءتىپتى كەرەمەت. قىسقاشا ايتقاندا, ولار وزدەرىنىڭ الدىنا ناقتى ماقسات قويىپ, ساپالى كونتەنت دايىندادى, بالالارعا نە قاجەت ەكەنىن الدىن الا ويلاستىرا ءبىلدى, سونىڭ ارقاسىندا ۇلكەن جەتىستىككە قول جەتكىزدى. قازىر «D Billions-ءتىڭ» كەز كەلگەن شىعارىلىمىن ەرەكشە ىقىلاسپەن كورۋگە بولادى. ەرەسەكتەردىڭ اڭسارى وسىلاي اۋىپ وتىرعاندا, بالالاردىڭ ودان قانشالىقتى كوز ايىرمايتىنىن باعامداي بەرىڭىز.
بىزدىڭشە, بالالار كونتەنتىن دايىنداۋعا جەكە سەكتور دا, مەملەكەت تە ىقىلاستى بولۋى ءتيىس. ءتىپتى مەملەكەتتىك دەڭگەيدە ارنايى باعدارلاما قابىلدانىپ, كوڭىل بولىنسە دە ارتىق ەمەس. بالكىم مۇنى مەملەكەت-جەكەمەنشىك سەرىكتەستىك ارقىلى جۇزەگە اسىرۋعا بولاتىن شىعار. ايتەۋىر, نيەت بولسا, ىسكە اسىرۋدىڭ تەتىگى كوپ قوي. جەكە دەمەۋشى تابىلىپ, ول ءبىر شىعارماشىلىق توپ قۇرىپ اينالىسسا دا كوپ شارۋا تىندىرىلۋشى ەدى.
مۇنىڭ ماڭىزى نەدە؟ ماڭىزى شىن مانىندە وراسان. YouTube-تە ارنايى برەندتىك اتاۋمەن جوبا قۇرىپ, ونىڭ اياسىنا بىرنەشە كانالدى ەنگىزگەن ابزال. جاسالاتىن كونتەنتتى بىرنەشە تارماققا ءبولىپ تاستاۋعا:
- سالت-ءداستۇردى تانىستىرىپ, ۇلتتىق قۇندىلىقتاردى ۇلىقتايتىن;
- ونەرتابىس يدەيالاردى ناسيحاتتاپ, الەمنىڭ جانە قازاقتىڭ تانىمال تۇلعالارىن تانىستىراتىن;
- بىلىمگە باۋلىپ, عىلىم قۇپيالارى مەن جەتىستىكتەرىن بالا تىلىمەن لايىقتاپ تۇسىندىرەتىن;
- سپورتپەن اينالىسۋدىڭ پايداسىن ۇعىندىرىپ, دەنساۋلىعىن كۇتۋگە ۇندەيتىن;
- كىتاپ وقىپ, ءتۇرلى تاقىرىپتاعى ادەبيەتتىڭ ماڭىزدىلىعىن ناسيحاتتايتىن;
- اتا-انا قادىرى جانە وتباسى مادەنيەتىن قالىپتاستىراتىن;
- تاريحتى تۇگەلدەپ, جەتى اتا سياقتى ۇلتتىق قۇندىلىقتاردى دارىپتەيتىن ۆيدەولار تۇسىرىلسە ارينە, بالا تىلىنە بەيىمدەپ, ويىن, ءتۇرلى اقىل-كەڭەس فورماتىندا.
ودان كەيىن بالالاردىڭ جاي عانا كوڭىل كوتەرۋىنە ارنالعان مۋلتسەريالدار جوباسى دا ءسوزسىز قىزىقتى بولۋشى ەدى.
وسىلاي جاساعان كۇندە بالانىڭ ءتىلى قازاقشا شىعىپ قانا قويمايدى, ونىڭ جان-دۇنيەسىندە قازاقى دۇنيەتانىم قالىپتاسادى. ۇلتتى ۇيىستىراتىن قوعامدىق قۇندىلىقتار دا سولاردىڭ باسىندا ومىرگە كەلىپ, جالپاق جۇرتقا تاراپ, ارادا 15-20 جىل وتكەندە ءوزىمىز ارماندايتىن ادىلەتتى قوعامنىڭ ىرگەسى قالانادى. قازىرگىدەي مەملەكەتتىڭ قازبا بايلىعىن تالان-تاراجعا سالىپ ەمەس, ءبىلىم مەن عىلىمنىڭ, تالانت پەن قابىلەتتىڭ ارقاسىندا بايىعان ميللياردەرلەر ارامىزدان شىعا باستايدى.
تيتىمدەي دۇنيەنىڭ تاۋداي پايداسى بار ەكەنىن تۇسىنبەي وتىرمىز. نە تۇسىنسەك تە, ىستەمەي وتىرمىز. ءيا, «D Billions» جانە سول سياقتى بىرقاتار جوبالار شىعانداپ تىم-تىم الىسقا كەتىپ قالدى. بىراق ءبىز ءالى دە كەش قالعان جوقپىز. قازىر, بۇگىن باستاپ كەتسەك, ءتىپتى ورىندى. مۇنى بالالار الدىنداعى پارىزىمىز دەپ ۇعىنعان ءجون بولار. سول پارىزدى ورىنداۋعا تەك قاجەتى – يدەيا مەن اقشا. قالعانىن وسكەلەڭ ۇرپاقتىڭ وزىنە قالدىرىڭىز.
