ەرلەر اراسىندا جەكەلەي سىندا ەلوردالىق كيريلل گەراسيمەنكو قاراعاندىلىق الان قۇرمانعاليەۆتەن باسىم ءتۇستى. فينال 4-1 ەسەبىمەن تاجىريبەلى ويىنشىنىڭ پايداسىنا اياقتالدى. ال ايەلدەر اراسىندا زاۋرەش اكاشەۆا (قاراعاندى وبلىسى) توپ جاردى. ول فينالدا تاعى ءبىر ۇلتتىق قۇراما وكىلى سارۆينوز ميركاديروۆاعا (شىمكەنت) ەش مۇمكىندىك بەرمەدى (4-1).
ءبىر قىزىعى, بىلتىر پاۆلودار قالاسىندا وتكەن قازاقستان چەمپيوناتىنىڭ جەكەلەي سىنداعى فينالىنا وسى 4 سپورتشى شىققان.
ارالاس جۇپتىق سىندا زاۋرەش اكاشەۆا مەن ۆلاديسلاۆ زاحاروۆ دۋەتى كيريلل گەراسيمەنكو مەن اناستاسيا لوۆروۆاعا توتەپ بەرە المادى. ەسەپ 0-3.
ۇزدىك ۇشتىكتى تۇيىندەگەن جۇپتار:
بەكۇلان جامال/سارۆينوز ميركاديروۆا (شىمكەنت);
الان قۇرمانعاليەۆ/اراي اشكەەۆا (قاراعاندى وبلىسى).
ايەلدەر اراسىندا شىمكەنتتىك سارۆينوز ميركاديروۆا مەن انەل باقىت جۇبى باتىس قازاقستان وبلىسىنان كەلگەن گۇلچەحرا حۋسەينوۆا مەن السۋ ساپاروۆانى ۇتتى.
3-ورىن – يۋليا دانياروۆا/الينا دۋبروۆسكايا (قوستاناي وبلىسى);
ايا الىمباەۆا/ۆالەنتينا ۋسپانوۆا (الماتى).
الان قۇرمانعاليەۆ پەن ۆلاديسلاۆ زاحاروۆ ەكەۋى فينالدا اعايىندى كيريلل جانە الەكساندر گەراسيمەنكودان باسىم ءتۇستى. قولا مەدال دەنيس جولۋدەۆ/ساگانتاي قۇرمامباەۆ (شقو) پەن باقداۋلەت اكىمالى/بەكۇلان جامال (شىمكەنت).
كوماندالىق سايىستا قاراعاندى وبلىسى فينالدا شىعىس قازاقستان وبلىسىن 3-1 ەسەبىمەن جەڭدى. الان قۇرمانعاليەۆ, ۆلاديسلاۆ زاحاروۆ, تەمىرلان كيم, ءامىر تورعايبەكوۆ, رايىمبەك كەلبۇعانوۆ چەمپيون اتاندى. كۇمىس مەدال دەنيس جولۋدەۆ, ساعانتاي قۇرمامباەۆ, سەرگەي كونوۆالوۆ, كيريلل سوتنيك, ارنۇر ورالحانوۆتىڭ ەنشىسىندە.
ايەلدەر اراسىندا دا قاراعاندى وبلىسىنىڭ قۇراماسى قارسىلاس شاق كەلتىرگەن جوق. زاۋرەش اكاشەۆا, اراي اشكەەۆا, جانەركە كوشكىمباەۆا, الەكساندرا سميرنوۆا, ۆيكتوريا موچالكينا بەستىگى فينالدا شىمكەنت كومانداسىن سەنىمدى ۇتتى. ەسەپ 3-1.
كۇمىس جۇلدەگەرلەر – انەل باقىت, سارۆينوز ميركاديروۆا, گۇلنوز كاميلجانوۆا, ماليكا راسۋلمەتوۆا, اقنيەت امانگەلدى.
وسى سپارتاكيادا كەزىندە تەمىرلان كيم (قاراعاندى), اراي اشكەەۆا (قاراعاندى) مەن تيموفەي گەراسيمەنكو (استانا) «قازاقستاننىڭ سپورت شەبەرى» اتاعىن الدى.
جالپى ەسەپتە قاراعاندى وبلىسى چەمپيون اتانسا, استانا قالاسى 2-ءشى, شىمكەنت قالاسى 3-ورىنعا تۇراقتادى.
ۇلتتىق قۇرامانىڭ باس باپكەرى ەلميرا اليەۆا سپارتاكيادانى بىلاي قورىتىندىلادى:
«سپارتاكيادا قورىتىندىسى بويىنشا ۇلتتىق قۇراما جاساقتالادى. ەلىمىزدەگى بارلىق ويىنشى وسىندا كەلدى. ءبارىنىڭ ناتيجەسىن باقىلاپ وتىرۋعا تىرىستىم. قازىر ۇستەل تەننيسىنىڭ بارلىق وڭىردە دامىپ كەلە جاتقانى قۋانتادى. بۇرىن تارتىس الماتى, استانا مەن پاۆلودار اراسىندا وتەتىن. بۇل جولى 7-8 كوماندا ءبىر دەڭگەيدە جۇلدەگە تالاستى. ۇلتتىق قۇراما جاساقتايتىن كەزدە قينالايىن دەپ تۇرمىز. ءبىرىنشى جانە ەكىنشى نومەرلى سپورتشىلار فينالدا ونەر كورسەتتى. ال شەبەرلىگى شىڭدالعان الماتىلىق ايدوس كەنجەعۇلوۆ پەن اناستاسيا لوۆروۆا سىندى ويىنشىلاردى اتاپ وتە الام. ولاردىڭ اراسىنان ۇلتتىق قۇرامانىڭ 3-نومەرلى تەننيسشىسىن تاڭدايمىز», دەدى ەلميرا اليەۆا.
سپورتشىلاردى ماراپاتتاۋ راسىمىنە قر مسم سپورتتى دامىتۋ ديرەكتسياسى ديرەكتورىنىڭ ورىنباسارى ازامات يماشەۆ, قازاقستان ۇستەل تەننيسى فەدەراتسياسىنىڭ اتقارۋشى حاتشىسى دانيل پاك, قاراعاندى وبلىسى دەنە شىنىقتىرۋ جانە سپورت باسقارماسىنىڭ باسشىسى تەمىرحان ابىلاەۆ قاتىستى.
ايتا كەتەيىك, 20 ناۋرىزدا باستالعان ۇستەل تەننيسى باسەكەسىنە 20 وڭىردەن كەلگەن 180-نەن استام سپورتشى قاتىستى.
