جانسايا ابدىمالىك ءبيبىسارا اساۋباەۆانىڭ سىنىنا جاۋاپ بەردى

ء«بيبىسارانىڭ ماعان قاراتا ايتقان سوزدەرىنە ءمان بەرە بەرگىم كەلمەيدى، بىراق وسى جولى جاۋاپ بەرمەسىمە بولمادى. ۇندىستانداعى تۋرنيردەگى كەلەڭسىز جاعداي مەنىڭ عانا ەمەس، ب. اساۋباەۆانى قوسا العاندا، وزگە ارىپتەستەرىمنىڭ دە كوڭىلىنەن شىققان جوق. بۇل ارينە ۇيىمداستىرۋشىلار تاراپىنان كەتكەن قاتەلىك. بىز اقىلداسا كەلە، فيدە پرەزيدەنتى مەن اپپارات باسشىلىعىنا بۇعان قاناعاتتانبايتىنىمىزدى ءبىلدىرىپ، ۇجىمدىق حات جازدىق. جارىستى كەيىنگە قالدىرۋ نەمەسە ونى وتكىزبەۋ جونىندە ۇسىنىس جاسادىق. ول حاتقا ب. اساۋباەۆانى قوسا العاندا، تۋرنيرگە قاتىسۋشىلاردىڭ بارلىعى دەرلىك قول قويدى»، دەپ جازدى ج. ابدىمالىك Instagram پاراقشاسىندا.

ونىڭ ايتۋىنشا، ول مۇنداي جاعدايدا ويناي المايتىنى جونىندە فيدە پرەزيدەنتى اركادي دۆوركوۆيچ پەن اتقارۋشى ديرەكتور ەميل سۋتوۆسكيگە جەكە ءوزى حاباردار ەتكەن. ج.ابدىمالىك ۇيىم باسشىسىنىڭ جاۋاپ حاتىن قوسا ۇسىنىپ، شاحماتشىلار قاۋىپسىز جانە دۇرىس جاعدايدا ويناۋعا لايىقتى ەكەنىن جازعان.

«مەن ءوز ەلىمنىڭ اتىنان قاشان دا ماقتانىشپەن جانە ابىرويمەن وينايمىن. ۇندىستانداعى وليمپيادانى ءالى كۇنگە دەيىن جىلى ەسكە الامىن. بىراق دەليدە جاسالعان جاعداي شىنىمەن اقىلعا قونىمسىز بولدى. ءبيبىسارا اساۋباەۆانىڭ وسىناۋ جالعان وتىرىگى مەن ەكىجۇزدىلىگىنە قاراماستان، مەن ءوز شەشىمىمە وكىنبەيمىن»، دەلىنگەن جازبادا.

ەسكە سالا كەتەيىك، بليتستەن ەكى دۇركىن الەم چەمپيونى ءبيبىسارا اساۋباەۆا ءوزىنىڭ Instagram پاراقشاسىندا جانسايا ابدىمالىككە قاتىستى سىني پىكىر جازدى. كەيىنىرەك FIDE پرەزيدەنتى گران-پريگە قاتىسۋشىلاردان كەشىرىم سۇرادى.