ءمۇفتيات جانات باقىتتىڭ جازبالارىنا قاتىستى مالىمدەمە جاسادى

«الەۋمەتتىك جەلىدەگى جانات باقىت دەگەن ءجۋرناليستىڭ اللا تاعالا تۋرالى ايتقان اۋىر سوزدەرى مۇسىلماندار اراسىندا تۇسىنىسپەۋشىلىك تۋدىردى. وسى ورايدا قازاقستان مۇسىلماندارى ءدىني باسقارماسىنا ءار وڭىردەن ءتۇرلى پىكىر، نارازىلىق بىلدىرگەن حاتتار كەلىپ جاتىر. جالپى اللانىڭ اتىنان جالعان سويلەۋ - وتە اۋىر كۇنا. اللا تاعالا قاسيەتتى قۇراننىڭ ء ان'ام سۇرەسىنىڭ 144-اياتىندا «ادامداردى ناداندىقپەن اداستىرۋ ءۇشىن اللانىڭ اتىنان جالعاندى جالپاعىنان باساتىن پەندەدەن وتكەن زالىم بار ما؟» دەپ بايانداعان. اللا ساقتاسىن، قۇداي اتىنان جالعان سويلەۋدەن اۋىر ءىس جوق. اسىرەسە رامازان ايىندا وسىنداي كەلەڭسىز ءسوزدى ايتۋ مەن ءۇشىن دە اۋىر»، دەدى قمبد توراعاسىنىڭ ورىنباسارى، نايب ءمۇفتي ەرشات وڭعار.

ەرشات وڭعار حالىق تاراپىنان سۇراق ءجيى قويىلىپ، نارازىلىق ءبىلدىرىپ جاتقاننان كەيىن ءمۇفتيات اتىنان رەسمي مالىمدەمە جاساۋعا ءماجبۇر بولعانىن ايتتى.

«حاكىم اباي «اللا تاعالا - ولشەۋسىز، ءبىزدىڭ اقىلىمىز - ولشەۋلى. ولشەۋلىمەن ولشەۋسىزدى بىلۋگە بولمايدى» دەپ ايتقان. وسى رەتتە بارشا مۇسىلمان قاۋىمىن، بارشا وتانداسىمىزدى جۋرناليست جانات باقىتتىڭ سوزىنە ەرىپ، ءداستۇرلى سەنىمىمىزگە سەلكەۋ ءتۇسىرىپ، ەل ىشىندە ارانداتۋشىلىق تۋدىرۋدان ساق بولۋعا شاقىرامىز. قاسيەتتى رامازان ايىندا مۇنداي اۋىر ءسوز ايتىپ، ەل ىشىندە نارازىلىق تۋدىرىپ الۋدان ساق بولايىق. تۇتقان ورازا قابىل بولسىن. ەلىمىز امان، جۇرتىمىز تىنىش بولسىن. اللا تاعالا تاۋەلسىزدىگىمىزدى باياندى ەتسىن»، دەدى ول.