19 ناۋرىز كۇنى ساعات 18:15-تە قاراعاندى وبلىسىنىڭ بالقاش قالاسىنداعى مۇحامەدجانوۆ شاعىن اۋدانىندا ەكى جاسار بالا 5-قاباتتا ورنالاسقان پاتەردىڭ تەرەزەسىنەن قۇلاپ كەتكەن. وقيعا كەزىندە بالانىڭ اناسى باسقا بولمەدە بولعان. اۋىر جاراقات العان بالا بالقاش قالاسىنداعى ورتالىق اۋرۋحاناعا جەتكىزىلدى. سول جاق جامباسىندا اشىق سىنىعى بار. دارىگەرلەردىڭ ايتۋىنشا, بالانىڭ جاعدايى اۋىر.
شىمكەنتتە كوپپاتەرلى تۇرعىن ۇيلەردىڭ ءبىرىنىڭ تەرەزەسىنەن بەس جاسار قىز قۇلاپ ءتۇستى. جازاتايىم وقيعا تۋرالى اقپارات 23 ناۋرىزدا ساعات 14:50-دە «103» قىزمەتىنەن شىمكەنت قالاسى, تج دەپارتامەنتىنىڭ داعدارىس جاعدايلاردا باسقارۋ باسقارماسىنا ءتۇستى. وقيعا شىمكەنت قالاسى, ءال-فارابي اۋدانى, 16 شاعىن اۋدانىنداعى كوپقاباتتى № 18 تۇرعىن ۇيدە بولعان. كوپپاتەرلى 5-قاباتتى تۇرعىن ءۇيدىڭ 4-قاباتىندا ورنالاسقان پاتەردىڭ تەرەزەسىنەن اتا-اناسىنىڭ قاراۋىنسىز قالىپ, 2018 جىلى تۋعان قىز تەرەزەدەن قۇلاپ قالعان. ول تەز ارادا اۋىر جاعدايدا اۋرۋحاناعا جەتكىزىلدى.
وقيعانىڭ ءمان-جايىن شىمكەنت قالاسى پوليتسيا دەپارتامەنتىنىڭ قىزمەتكەرلەرى انىقتاپ جاتىر. دارىگەرلەر قىزعا وتا جاسادى.
سونداي-اق 21 ناۋرىزدا استانا قالاسىندا تۇرعىن ءۇيدىڭ تەرەزەسىنەن بالانىڭ قۇلاپ تۇسكەنى تۋرالى حابارلاما كەلىپ ءتۇستى.
21 ناۋرىز كۇنى ساعات 18:55-تە اۋەزوۆ كوشەسىندە بەس قاباتتى تۇرعىن ءۇيدىڭ ءتورتىنشى قاباتىنان ەرەسەكتەردىڭ قاراۋىنسىز قالعان 2014 جىلى تۋعان قىز تەرەزەدەن قۇلاپ ءتۇستى. قىز بالا اۋرۋحاناعا جاتقىزىلدى, جاعدايى ورتاشا.
«جوعارىدا اتالعان جاعدايلاردىڭ بارلىعى ەرەسەكتەردىڭ, اتا-انالاردىڭ سالعىرت قاراۋىنىڭ, بالالاردىڭ ءجۇرىس-تۇرىسىن باقىلاماۋىنىڭ, تەرەزەلەردە بلوكاتورلاردىڭ بولماۋىنىڭ, جيھازدى دۇرىس ورنالاستىرماۋدىڭ سالدارىنان بولدى. ۇيدەگى جيھازدى دۇرىس ورنالاستىرماۋ بالالارعا تەرەزەلەرگە ءوز بەتىنشە كوتەرىلۋىنە مۇمكىندىك بەرەدى», دەپ جازادى تجم ءباسپاسوز قىزمەتى.
وسىعان بايلانىستى تجم بالالاردىڭ تەرەزەلەر مەن بالكونداردان قۇلاۋىنا جول بەرمەۋ ءۇشىن كەلەسى قاۋىپسىزدىك شارالارىن ساقتاۋدى سۇرايدى
- كىشكەنتاي بالالاردى قاراۋسىز قالدىرماڭىز;
- كىشكەنتاي بالا تەرەزەنىڭ الدىنا شىعا الماۋ ءۇشىن جيھازدىڭ بارلىق تۇرلەرىن تەرەزەنىڭ جانىنان الىپ تاستاڭىز;
- موسكيت تورىنا سەنبەڭىز. ولار قۇلاۋدان قورعاۋعا ارنالماعان;
- بالاعا تەرەزەنى بىرنەشە سانتيمەتردەن ارتىق اشۋعا مۇمكىندىك بەرمەيتىن ارنايى بەكىتكىشتەردى قويىڭىز;
- اشىق تەرەزەنىڭ جانىندا بولۋ قاۋپى تۋرالى بالالارعا ءتۇسىندىرىڭىز;
- ەگەر بەكىتكىش قۇرىلعى ورناتۋ مۇمكىندىگى بولماسا, تەرەزەنىڭ تۇتقاسىن الىپ تاستاپ, ونى تەك قاجەت بولعان جاعدايدا ورناتىڭىز.
