ەلەنا رىباكينا مايامي ماستەرس ءتۋرنيرىنىڭ ءۇشىنشى اينالىمىنا ءوتتى

ماستەرس جارىسىنىڭ 10-راكەتكاسى بولىپ تىركەلگەن ە.رىباكينا دودانى ەكىنشى اينالىمنان باستاپ، دۇنيەجۇزىلىك رەيتينگتە 64-ورىندا تۇرعان رەسەيلىك اننا كالينسكايامەن شەبەرلىك بايقاستى.

قارسىلاستار وسىعان دەيىن 2019 جىلى پلەيفورد (اۋستراليا) فينالىندا كەزدەسىپ، وندا ا.كالينسكايا جەڭىسكە جەتكەن ەدى. ەسەپ – 6:4، 6:4.

ءبىرىنشى پارتيادا رەسەيلىك سپورتشى برەيكپەن العا كەتتى. دەگەنمەن ە.رىباكينا تارازى باسىن تەڭەستىرە الدى – 5:5. سوسىن سەتتى تاعى ءبىر برەيكپەن ءبىتىردى – 7:5.

ەكىنشى سەتتە قازاقستاندىق تەننيسشى برەيكپەن العا شىقتى – 3:1. الايدا كالينسكايا ەسەپ 2:4 بولعان مەزەتتە قاتارىنان ءتورت گەيمدى الدى – 6:4.

ءۇشىنشى، شەشۋشى پارتيادا ە.رىباكينا برەيك جاساپ، ەسەپتى 4:2-گە جەتكىزدى. كالينسكايا دا قالىسپاعانىمەن، ەلەنا قايىرا برەيك جاسادى – 5:3. سودان كەيىن ماتچقا دوپ بەرگەندە، ءوز مۇمكىندىگىن جىبەرگەن جوق – 6:3.

ەكى ساعات 14 مينۋتقا سوزىلعان تارتىستى ماتچتا ە.رىباكينا 14 ەيس جاساپ، 13 برەيك-پوينتتىڭ بەسەۋىن پايدالاندى. ا.كالينسكايا 1 ەيس، 4 برەيكپەن (6 برەيك-پوينت) كوزگە ءتۇستى.

ەلەنا رىباكينا ءۇشىنشى اينالىمدا الەمنىڭ 29-راكەتكاسى، يسپانيالىق پاۋلا بادوسامەن كەزدەسەدى. ول ەكىنشى اينالىمدا ءۇش ساعاتقا جۋىق ۋاقىتقا سوزىلعان تارتىستى باسەكەدە رەيتينگتە 114-ساتىداعى گەرمانيالىق لاۋرا زيگەمۋندتى 7:6 (7:2)، 4:6، 6:2 ەسەبىمەن تىزە بۇكتىردى.

ە.رىباكينا ينديان-ۋەللس ماستەرس دوداسىندا پ.بادوسانى 6:3، 7:5 ەسەبىمەن ۇتقان ەدى.