جىل سايىن بۇل اكتسياعا الەمنىڭ 180-نەن استام ەلى قاتىسادى. قازاقستان ءۇشىن «جەر ساعاتى» بيىل 14-ءشى رەت وتكىزىلىپ وتىر.
دۇنيەجۇزىلىك جابايى تابيعات قورىنىڭ (WWF) باستاماسىمەن 2007 جىلدان بەرى بۇكىل الەمدە «جەر ساعاتى» ەڭ اۋقىمدى ەكولوگيالىق اكتسياسى وتكىزىلىپ كەلەدى.
ءداستۇر بويىنشا ءارتۇرلى ەكولوگيالىق تاقىرىپتارعا نازار اۋدارۋ ءۇشىن ناۋرىز ايىنىڭ سوڭعى سەنبىسىندە بۇكىل الەم بويىنشا ميلليونداعان ادامدار 20:30-دان 21:30-عا دەيىن ۇيلەرى مەن پاتەرلەرىندەگى جارىقتى سيمۆولدىق تۇردە وشىرەدى. سونىمەن قاتار الەمنىڭ مىڭداعان ساۋلەت ەسكەرتكىشتەرى مەن ماڭىزدى عيماراتتارى ءوز جارىقتارىن سوندىرەدى. اكتسياعا ەلدەردىڭ مەملەكەتتىك جانە جەكە ۇيىمدارى دا قولداۋ كورسەتەدى.
سوڭعى جىلدارى قازاقستاندا اكتسيا ەكولوگيالىق بەلسەندىلىككە, سيرەك كەزدەسەتىن جانۋارلار تۇرلەرىن قورعاۋعا جانە ەكوتۋريزمگە كوڭىل ءبولدى. 2023 جىلى رەسپۋبليكادا «جەر ساعاتى» ەلىمىزدىڭ تابيعاتىن ساقتاۋدىڭ ماڭىزدىلىعىنا ارنالعان.
قازاقستاندا «جەر ساعاتى» WWF ورتالىق ازيا باعدارلاماسى, قازاقستاننىڭ ەكولوگيالىق ۇيىمدارىنىڭ قاۋىمداستىعى, «جاسىل ەكونوميكا جانە دامۋ ءۇشىن G-Global كواليتسياسى» جانە «جەر ساعاتى» تۇراقتى دامۋ قورىمەن ۇيىمداستىرىلادى.
قر ەكولوگيا جانە تابيعي رەسۋرستار مينيسترلىگىنىڭ قولداۋىمەن 25 ناۋرىزدا ساعات 20:30-دان 21:30-عا دەيىن (استانا ق.) «جەر ساعاتى» اكتسياسى وتەدى. اكتسيا تۋرالى تولىق اقپارات earthhour.kz سايتىندا بەرىلگەن.
