ونەر • 21 ناۋرىز، 2023

ەلوردادا «جىرشى-تەرمەشىلەر» فەستيۆالى ءوتتى

مادەنيەت جانە سپورت مينيسترلىگىنىڭ ۇيىمداستىرۋىمەن ناۋرىز مەيرامى اياسىندا استانادا العاش رەت حالىقارالىق «جىرشى-تەرمەشىلەر» فەستيۆالى ءوتتى. فەستيۆالگە قازاقستان، وزبەكستان جانە قىرعىز ەلىنەن جىرشى-جىراۋلار قاتىستى، دەپ حابارلايدى Egemen.kz.

ايتولعان ءجۇنىسحان

اتاپ ايتقاندا، قازاقستاننىڭ ەڭبەك سىڭىرگەن قايراتكەرلەرى: الماس الماتوۆ، ايگۇل قوسانوۆا، ەلمۇرا جاڭابەرگەنوۆا، مادەنيەت قايراتكەرى ەربولات شالدىبەكوۆ، مادەنيەت سالاسىنىڭ ۇزدىكتەرى: ەلىكباي يسا، فارحات ورازوۆ، قايرات كاكىموۆ، حالىق جىرشىسى جانىبەك پيازوۆ، توعاەۆ باحشيكۋل (وزبەكستان رەسپۋبليكاسى)، قىرعىزستان رەسپۋبليكاسىنىڭ ەڭبەك سىڭىرگەن ءارتيسى سىدىكوۆ دوولوتبەك جانە تاعى دا باسقا ونەر مايتالماندارى تانىمال جىر، تەرمە، تولعاۋ، داستانداردى ورىندادى.

«جىراۋلىق، جىرشىلىق ونەر – حالقىمىزدىڭ مىڭجىلدىق مادەني مۇراسى. فەستيۆالدى ۇيىمداستىرۋداعى باستى ماقسات - اتادان بالاعا ميراس بولىپ جەتكەن ۇلتتىق ونەردى دارىپتەۋ، باۋىرلاس تۇركى حالىقتارىمەن مادەني ىنتىماقتاستىقتى نىعايتۋ بولىپ تابىلادى. مادەنيەت جانە سپورت مينيسترلىگى جاستاردى جىراۋلىق ونەرگە باۋلىپ، ونىمەن عىلىمي تۇرعىدا اينالىسۋى ءۇشىن بارلىق مۇمكىندىكتەردى جاسايتىن بولادى»، دەدى مادەنيەت جانە سپورت ۆيتسە-ءمينيسترى نۇرعيسا داۋەشوۆ.