2009 جىلدان بەرى ەرلى-زايىپتىلار 18 اتا-اناسىز ءسابيدى بالالار ۇيىنەن پاتروناتتىق تاربيەگە العان. ون ءتورت جىلدان بەرى تاعدىردىڭ ءتۇرلى قيىندىعىنا تاپ بولعان بالالاردى باۋىرلارىنا باسىپ قانا قويماي, ولارعا جاقسى ءبىلىم مەن تاربيە بەرىپ كەلەدى. بۇگىندە ەرەسەكتەرىن ۇيادان ۇشىرا باستادى. ەڭ ۇلكەن قىزى ايگۇل وتكەن جىلى تۇرمىسقا شىعىپ, جاقىندا نارەستەلى بولدى. بىلتىر شاما-شارقىنشا تويىن وتكىزىپ, جاساۋىن بەرىپ ۇزاتتى. قازىر ءومىرحان مەن امانگۇل قۇدا-قۇداعيلارىمەن جاقسى ارالاسىپ تۇرادى. سونداي-اق وسى شاڭىراقتىڭ توعىز ەرەسەگى اقتوبەدەگى احمەت جۇبانوۆ اتىنداعى مۋزىكالىق كوللەدجدە وقىپ جاتىر.
جەتەس ۇلى اۋلەتىنىڭ وتباسىلىق بالالار ءۇيى 2009 جىلى اشىلدى. سول جىلى ەلىمىزدە وتباسىلىق ۇلگىدەگى بالالار ۇيلەرى قۇرىلعان بولاتىن. امانگۇل مۋزىكا ءپانى مۇعالىمى, سول ۋاقىتتا مەرەكە كەزىندە شىعارماشىلىق ۇيىمدارمەن بىرلەسە كونتسەرت وتكىزەدى. مەرەكە قارساڭىندا ء«ۇمىت» سابيلەر ۇيىنە مەرەكەلىك ءىس-شارا وتكىزۋگە بارعاندا, بەس جاستاعى ءسابي الماگۇل جىلاپ جابىسىپ, قولىنان تۇسپەي قويعان. شارا اياقتالىپ انشىلەر كەتەر كەزدە الگى ءسابي الماگۇلدىڭ ەتەگىنە جابىسىپ, تاربيەشىگە بارمايدى. ۇيگە كەلگەن سوڭ دا الگى ءسابيدىڭ جىلاعان ءۇنى قۇلاعىنان كەتپەيدى. تۇنىمەن ۇيىقتاي الماعان سوڭ, ەرتەڭىنە بالالار ۇيىنە قايتا بارادى. قولى بوساعاندا وسى جەرگە ءجيى كەلىپ تۇراتىن بولدى.
اتا-اناسى جوق سابيلەر ء«ۇمىت» بالالار ۇيىندە بەس جاسقا دەيىن تاربيەلەنىپ, مەكتەپ جاسىنا جەتكەندە باسقا جاققا اۋىستىرىلادى. اقىرى الماگۇل وتاعاسىمەن, ءۇش بالاسىمەن كەڭەسە وتىرىپ, وسى ءسابيدى اسىراپ الۋعا شەشىم قابىلدايدى. بىراق بالا اسىراپ الۋ – وڭاي شارۋا ەمەس. امانگۇلگە جابىسقان ءسابي جەتىمدەر ۇيىنە ۋاقىتشا ورنالاستىرىلعان, تۋعان اناسى بار ەكەن. امانگۇل كوپ جۇگىرىستەن سوڭ, ءسابيدى ۇيىنە اكەلدى. وسىدان كەيىن تاعى بىرنەشە ءسابيدى پاتروناتتىق تاربيەگە الدى. ءبىر بالانى الىپ كەتەيىن دەپ جاتقاندا, سابيلەر ۇيىندە قالىپ بارا جاتقان بىرگە تۋعانىن قالدىرعىسى كەلمەدى. جەتەسوۆتەر اۋلەتىنە ون سەگىز بالا وسىنداي جولمەن كەلدى. سول كەزدە وتاعاسى ومىرحانعا شاعىن بالالار ءۇيىن اشۋ تۋرالى ۇسىنىس تۇسكەن. «بىراق مەن وعان قارسى بولدىم. ويتكەنى ءبولىپ-جارماي باعىپ-قاعىپ وتىرعان بالامىزدى باسقا بىرەۋدىڭ اسىراپ الىپ كەتكەنىن قالامادىم», دەيدى ءومىرحان جەتەسوۆ.
ءومىرحان مەن امانگۇل اتا-اناسىز قالۋدىڭ قانداي ەكەندىگىن وتە جاقسى بىلەدى. ەكەۋى دە جاستايىنان جەتىم وسكەن. ولار العاش شاڭىراق كوتەرگەندە جىلى سوزبەن دەمەپ, قينالعان كەزدە قولداپ جىبەرەتىن اتا-انانىڭ كومەگىنە تالاي ءزارۋ بولعان. الماگۇل قىزداردىڭ تاربيەسىنە وتە قاتتى قارايدى. كۇندەلىكتى كەشكىلىك اكەسى ەر بالالارمەن, اناسى قىز بالالارمەن كەڭەس وتكىزەدى.
بۇل ۇيدە ۇلتتىق تاربيەنىڭ ءيىسى اڭقىپ تۇر. بالالاردىڭ بوس ۋاقىتى جوق. قىزدارى دا, ەر بالالارى دا ءۇي شارۋاسىنا پىسىق. ۇلگەرمەي جاتسا, ءبىر-بىرىنە كومەكتەسەدى. بالالار ساباقتان كەلگەن سوڭ اس ءىشىپ, ءۇي شارۋاسىنا قولعابىس جاسايدى. تۇستەن كەيىن قوسىمشا دارىستەرگە, سپورتتىق سەكتسيالارعا بارادى. كوبىنەسە بالالار بوس ۋاقىتتارىندا كەزەكتى مەرەكەلىك كونتسەرتكە دايىندالادى.
ونەرلى ۇلدارىنىڭ ەرەسەگى تەمىرحان جەتەسوۆ دومبىرادا شەبەر ويناپ قانا قويماي, «ەدىگە» داستانىن, ابۋباكىر كەردەرىنىڭ تەرمەلەرىن ايتۋعا ماشىقتانعان. اتا-اناسى بارلىعىنا دا دەمەۋشىلەر كومەگىمەن مۋزىكالىق اسپاپتار الىپ بەرىپ, مەرەكەلىك كوستيۋمدەر تىكتىردى.
«بالا – اللانىڭ اماناتى. اتا-اناسى جوق ءسابيدى باۋىرىڭا باستىڭ با, كىم نە دەسە, و دەسىن, شىن كوڭىلمەن ءسۇي, تاربيەسىنە مۇقيات قارا. باسىندا ۇركەكتەپ كەلگەن ءسابي اتا-انا مەيىرىمىن كورگەننەن كەيىن سەنى شىن كوڭىلمەن جاقسى كورىپ كەتەدى. تەك ونى الداۋشى بولما, سول كەزدە بار ىشكى سىرىن اقتارادى, قينالعاندا, جانى جابىرقاعاندا سەنىمەن كەڭەسەدى. وزىڭنەن تۋعان بالا مەن اسىراپ العان بالاڭدى ءبولىپ-جارۋعا بولمايدى. باستاپقىدا ءوز بالاڭا دا وسىنى ۇعىندىراسىڭ», دەيدى امانگۇل. قازىر بالالاردىڭ ۇلكەنى 25 جاستان اسسا, كىشكەنتايلارى 9-10 جاستا. وتباسىنداعى بەس بالانىڭ ۇلتى ورىس.
ءبىر اكە-شەشەدەن ورگەن ەكى-ءۇش بالانىڭ باسىن قوسۋ قيىنعا تۇسكەن مىنا زاماندا جيىرما ءبىر بالاعا ءبىر ۇلگىدە تاربيە بەرۋ وڭاي ەمەس. الماگۇل كوپ بالانى اسىراپ العاندا قيىندىق بولعانىن جاسىرمايدى. الايدا ەرلى-زايىپتىنىڭ كوزقاراسى مەن ۇستانىمى بىردەي بولعاندا الىنبايتىن قامال جوق. 21 بالانى سىيعىزىپ, ولارعا مەيىرىم مەن ماحاببات بەرىپ, ونەرگە باۋلىپ, ارقايسىسىنىڭ تۇلعا بولىپ قالىپتاسۋىنا ۇلەس قوسىپ جۇرگەن جەتەسوۆتەر ءار بالانىڭ ورنى بولەك ەكەنىن ايتادى.
«بالالاردى ارنايى مۋزىكالىق مەكتەپتەردە وقىتۋدى ماقسات ەتكەنىمىز راس. ويتكەنى بالالار ءبىر ماماندىققا يە بولىپ, ەرجەتكەندە وزدەرىن وزدەرى اسىراي السا, ەكىنشى جاعىنان وتباسىلىق انسامبل ارقىلى تابىس تابۋدى دا ويلاستىردىق. سەبەبى ەرجەتكەن سايىن بالالاردىڭ قاجەتتىلىگى كوبەيە بەرەدى عوي. ولارعا جاقسى ءبىلىم بەرۋ – ءبىزدىڭ پارىز. ۇيادان ۇشىرعاندا ولار ءوز وزدەرىنە سەنىمدى بولۋى كەرەك. وتباسىلىق ءانسامبلىمىز وسى ويىمەن قۇرىلدى. مەن ارمانىمىز ورىندالعانىنا قۋانىشتىمىن», دەيدى امانگۇل ەشپانوۆا.
«ەرەسەك اعا-اپايلارى كىشكەنتايلارىنا ۇلگى. 21 بالام الدىمنان جۇگىرىپ شىققاندا, ءوزىمدى الەمدەگى ەڭ باقىتتى جان سەزىنەمىن», دەپ قۋانىشىن جاسىرمادى كوپبالالى اكە.
اقتوبە وبلىسى
