مادەني-ويىن-ساۋىق باعدارلاماسى «ناز» بي ۇجىمىنىڭ, «ارت دومبىرا» مۋزىكالىق ۇجىمىنىڭ, «قورقىت» ەتنوانسامبلىنىڭ, «ارنا» جانە «رويال» كۆارتەتتەرىنىڭ, «شابىت» دومبىراشىلار ءانسامبلىنىڭ جانە باسقا دا ارتىستەردىڭ ونەرلەرىن قامتيدى. سونداي-اق «قارا جورعا» بي فلەشموبى ۇيىمداستىرىلادى. قوناقتاردى باتىرلار مەن بۇركىتشىلەر, ال بالالاردى انيماتورلار قارسى الادى.
ۇلتتىق ويىندار: اسىق اتۋ, ارقان تارتۋ, سونداي-اق سپورتتىق جارىستار – فۋتبول فريستايلى, ساداق اتۋ جانە الەمنىڭ ءتورت دۇركىن رەكوردشىسى, گيننەسس كىتابىنىڭ رەكوردشىسى جانە قازاقستاننىڭ التى دۇركىن رەكوردشىسى سەرگەي تسىرۋلنيكوۆتىڭ قاتىسۋىمەن كۇش يزومەترياسى وتكىزىلەدى.
بۇدان بولەك بولاشاق ەنەرگياسى مۇراجايىندا ەتنوانسامبلدەردىڭ, بي ۇجىمدارىنىڭ جانە «ناۋرىز» ميۋزيكلىن ورىندايتىن تەاتر ترۋپپاسىنىڭ قويىلىمدارى جوسپارلانعان. سونداي-اق كەلۋشىلەرگە ناۋرىز كوجە مەن باۋىرساق تاراتىلادى. 21-23 ناۋرىز ارالىعىندا مۇراجايعا كىرۋ تەگىن بولادى.
EXPO حالىقارالىق كورمە ورتالىعىندا 21-23 ناۋرىز ارالىعىندا وتەتىن شىعىس بازارى ۇيىمداستىرىلادى. مۇندا دا اۋقىمدى مەرەكەلىك باعدارلاما وتكىزىلەدى. قوناقتاردى كوپەس, باتىر, بۇركىتشى جانە حان سياقتى كەيىپكەرلەر قارسى الادى. ساۋدا دۇكەندەرى شىعىس ستيلىندە بەزەندىرىلىپ, وندا ساۋداگەرلەر وتاندىق وندىرۋشىلەردىڭ تاۋارلارىن ساتادى, ال قولونەرشىلەر مەن شەبەرلەر ءوز قولدارىمەن جاسالعان بۇيىمدارىن ۇسىنادى.
