بارلىق سايلاۋ ۋچاسكەلەرى جەرگىلىكتى ۋاقىتپەن تاڭەرتەڭ 07.00-دە اشىلدى. تەك 14 جابىق سايلاۋ ۋچاسكەسىندە داۋىس بەرۋ 06.00-دە باستالسا, 33 سايلاۋ ۋچاسكەسىندە داۋىس بەرۋ مەرزىمىنەن بۇرىن اياقتالدى. نەگىزىنەن ەلدەگى ساياسي وزگەرىسكە بەيجاي قارامايتىن بەلسەندى ازاماتتار تۇسكە دەيىن داۋىس بەرىپ ۇلگەردى. سولاردىڭ ءبىرى – قازاقستان ءبىلىم بەرۋ ءىسىنىڭ ۇزدىگى, ى.التىنسارين اتىنداعى توسبەلگىنىڭ يەگەرى مارتا ەسىركەپقىزى اقتوبەدەگى №11 سايلاۋ ۋچاسكەسىندە ءوز تاڭداۋىن جاسادى. بۇل كىسىنىڭ پەداگوگيكالىق ءوتىلى – 40 جىل. ول اقتوبە قالاسىنداعى №32 مەكتەپ-گيمنازياسىن ۇزاق جىل باسقارىپ, وسى وقۋ ورنىن وبلىستاعى ەڭ ۇزدىك مەكتەپ قاتارىنا قوستى. كەزىندە قاتارىنان ەكى رەت اۋداندىق ءماسليحات دەپۋتاتى بولىپ سايلانعان بەلسەندى. ول ءماجىلىس جانە ماسليحاتقا ەلدىڭ مۇڭ-مۇقتاجىن ءادىل جەتكىزەتىن ازاماتتار بارۋى كەرەك دەيدى.
«حالىق ءادىل سايلاۋدى كۇتىپ وتىر. وكىنىشكە قاراي, سايلاۋعا ءتۇسىپ جاتقان كەي ازاماتتاردى تانىمايمىز. دەپۋتات – ءوز سالاسىن جاقسى مەڭگەرگەن, قوعامنىڭ تىنىسىن جاقسى ۇعىناتىن, حالىق پەن اتقارۋشى بيلىكتىڭ اراسىندا التىن كوپىر بولا بىلەتىن ازامات. دەپۋتات – حالىققا قازىرگى ناقتى جاعدايدى جەتكىزە بىلەتىن ەلگە شىن جاناشىر بولۋى كەرەك», دەيدى مارتا ەسىركەپقىزى.
اقتوبە وبلىسىنان ماجىلىسكە پارتيالىق ءتىزىم بويىنشا 7 پارتيا, ءبىر مانداتتىق وكرۋگتەن 11 ۇمىتكەر ءتۇستى. وبلىستىق ءماسليحات دەپۋتاتتىعىنا ءبىر مانداتتىق وكرۋگتەن 67 ۇمىتكەر تۇسسە, پارتيالىق تىزىممەن بەس پارتيا سايلاۋشىلار داۋىسى ءۇشىن باق سىناستى. قالالىق ماسليحاتقا ءبىر مانداتتىق وكرۋگ بويىنشا 128 كانديدات تىركەلدى. وڭىردەگى سايلاۋ بارىسىن باقىلاۋعا 14 ۇكىمەتتىك ەمەس ۇيىم, 5 قوعامدىق بىرلەستىك تىركەلدى. وڭىرلىك سايلاۋ كوميسسياسىنىڭ مالىمەتىنە قاراعاندا, سايلاۋ الدى ۇگىت-ناسيحات جۇمىسى كەزىندە زاڭ بۇزۋشىلىققا بارعان ءبىر ۇمىتكەرگە اكىمشىلىك ايىپپۇل سالىنعان. دەپۋتات بولۋعا ۇمتىلعان 616 ۇمىتكەردىڭ 3 083 سەنىم بىلدىرگەن تۇلعاسى تىركەلدى. ورتا ەسەپپەن ءبىر كانديداتقا 5 سەنىم بىلدىرگەن وكىلدەن كەلدى. ءماسليحات دەپۋتاتتىعىنا سايلاۋعا تۇسكەن ەڭ جاس ۇمىتكەر 2001 جىلى دۇنيەگە كەلگەن بولسا, ەڭ جاسى ۇلكەن ۇمىتكەر 1949 جىلى تۋعان. سايلاۋ كۇنى ۋچاسكەلەردە زاڭ بۇزۋشىلىق تىركەلگەن جوق.
اقتوبە وبلىسى
