ساياسي ناۋقانعا قاتىسۋدى پارىزىم دەپ بىلگەن 100 جاساعان كەيۋانا سايرا باعىمبەكوۆا الا تاڭنان №41 سايلاۋ ۋچاسكەسىنەن تابىلدى. بۇل ساياسي ناۋقاندى ادىلەتتى قازاقستان قۇرۋداعى جارقىن قادام دەپ باعالاعان عاسىر قۇرداسى ۋچاسكەگە كەلىپ جاتقان جاستارعا اق باتاسىن بەردى. ءوڭىر باسشىسى نۇرجان نۇرجىگىتوۆ تە العاشقىلاردىڭ ءبىرى بولىپ داۋىس بەردى. ول «استانا» شاعىن اۋدانىنداعى №53 مەكتەپتە ورنالاسقان سايلاۋ ۋچاسكەسىنە بارىپ, تاڭداۋ جاسادى.
سايلاۋعا ءار سالانىڭ ۇزدىكتەرى دە بەلسەندى تۇردە قاتىستى. ولاردىڭ قاتارىندا اۋليەاتا وڭىرىندە ۇلتتىق سپورت كوكپاردىڭ قارقىندى دامۋىنا سۇبەلى ۇلەس قوسقان نۇرداۋلەت مومىنوۆ تا بار. جامبىل اۋدانىنا قاراستى ايشا ءبيبى ەلدى مەكەنىندە ورنالاسقان №159 سايلاۋ ۋچاسكەسىندە داۋىس بەرگەن ايگىلى شاباندوز ساياسي ناۋقاننىڭ ەل ەرتەڭى ءۇشىن ماڭىزى زور ەكەنىن اتاپ ءوتتى.
«ساياسي دوداعا كىل مىقتى ۇمىتكەرلەر قاتىسىپ جاتىر. ولاردىڭ بارلىعىنىڭ ماقساتى ايقىن. ەل ازاماتى رەتىندە مەن دە سايلاۋعا قاتىسىپ, ەلىمىزدىڭ جارقىن كەلەشەگى ءۇشىن داۋىس بەردىم. ءماجىلىس مىنبەرىنەن تابىلعان حالىق قالاۋلىلارى مەن جەرگىلىكتى ماسليحاتتارعا سايلاناتىن دەپۋتاتتار ۇلتتىق سپورتتى نازاردان تىس قالدىرمايدى دەگەن سەنىم زور», دەدى ول.
تاراز قالاسىنداعى №12 سايلاۋ ۋچاسكەسىندە ءوز تاڭداۋىن جاساعان وبلىستىڭ قۇرمەتتى ازاماتى, مەديتسينا عىلىمدارىنىڭ دوكتورى ساعىندىق وردابەكوۆ بيىلعى سايلاۋعا جاڭا پارتيالاردىڭ ات قوسقانى ساياسي دودادا باسەكەلەستىكتى ارتتىراتىنىنا سەنىمدى.
«بيىلعى دوداعا «Amanat», «اق جول» پارتيالارىنان بولەك «Respublika», «بايتاق» سەكىلدى جاڭا پارتيالاردىڭ قاتىسىپ جاتقانى باسەكەنى ارتتىرا تۇسەدى. دەپۋتاتتىق مانداتقا ارى تازا, مەملەكەتشىل, حالىقتىڭ مۇڭىن تۇسىنەتىن ازاماتتار يە بولاتىندىعىنا سەنەمىن. بۇل – ادىلەتتى قازاقستاننىڭ تالابى», دەيدى ول.
بۇل كۇنى سارىسۋ جەرىنە سوناۋ ماڭعىستاۋ وبلىسىنان كەلگەن قۇدالار دا ءوز تاڭداۋىن جاسادى. جاڭاتاس قالاسىنا قىز بەرىپ, قۇدالىققا كەلگەن ماڭعىستاۋلىق قۇدالار سايلاۋدىڭ ماڭىزدى ەكەنىن ايتىپ ءوتتى. قۇدالار جاڭاتاس قالاسىنداعى سپورت كەشەنىندە ورنالاسقان №363 سايلاۋ ۋچاسكەسىنە بارىپ, داۋىس بەردى.
جامبىل وبلىسى
