اۋىلداعى ينتەرنەتتىڭ اۋجايى

قازىر ءار مەملەكەت حالىقتى ينتەرنەت­پەن قامتۋدى ارتتىرۋ ءۇشىن ءتۇرلى شارا­لاردى قولعا الىپ جاتىر. قاجەتتى ينفراقۇرىلىممەن قامتاماسىز ەتۋ قيىندىق تۋدىراتىن اۋىلدىق جەرلەرگە ەرەكشە نازار اۋدارىلادى. 2022 جىلدىڭ سوڭىندا الەمدە قالا تۇرعىندارىنىڭ ينتەرنەتپەن قامتىلۋى 78 پايىزدان 82 پايىزعا، ال اۋىلداردىڭ ۇلەسى 42 پايىز­دان 46 پايىزعا وسكەن. دۇنيەجۇزىلىك جەلىگە قولجەتىمدىلىك بويىنشا اۋىل مەن قالا تۇرعىندارىنىڭ اراسىنداعى الشاقتىق وتە ۇلكەن.

Finprom.kz-ءتىڭ حابارلاۋىنشا، اي­ماق­تار بويىنشا ەڭ از ايىرماشىلىق ەۋرو­پادا بايقالادى: قالالىق جەرلەردەگى كور­سەتكىش – 91 پايىز، اۋىلدىق جەرلەردە­ – 83 پايىز. جالپى، ماكرووڭىرلەر بو­يىنشا اۋىل تۇرعىندارىن ينتەرنەتپەن­ قامتۋ تمد ەلدەرىندە 74 پايىزعا، امەريكادا 68 پايىزعا، اراب ەلدەرىندە 56 پايىزعا تەڭ. قازاقستاندا اۋىل تۇرعىندارىن ينتەرنەتپەن قامتۋ ەرەكشە­ باقىلاۋعا الىنىپ، رەسپۋبليكا دامۋىنىڭ باستى مىندەتتەرىنىڭ ءبىرى سانا­لادى.­ ەسكە سالا كەتەيىك، ەل حالقىنىڭ 7،5 ملن-ى نەمەسە 38،2 پايىزى اۋىلدىق جەر­دە تۇرادى.

قازىرگى تاڭدا ەلىمىزدە اۋىل تۇر­عىن­دارىن ينتەرنەتپەن قامتيتىن بىرقاتار باعدارلاما بار. سونىڭ ەڭ باس­تىسى – «250+»­ باعدارلاماسى. باع­دار­لا­مانى 250-دەن­ كوپ تۇرعىنى بار اۋىلدار­دى ينتەرنەت­پەن قامتاماسىز ەتەتىن «Kcell» اق (Kcell جانە اسtiv ساۋدا­ بەلگىلەرى)، Tele2/Altel جانە «كار-تەل» جشس (Beeline ساۋدا بەلگىسى) ۇيالى بايلانىس وپەراتورلارى جۇزەگە اسىرىپ كەلەدى.

مىسالى، 2020-2022 جىلدارى Kcell ۇيالى بايلانىس وپەراتورى مىندەتتى باعدارلامالار بويىنشا 468 بازالىق ستان­سانى جانە اۋىلدىق جەرلەردە جە­لىنى دامىتۋدىڭ جەكە باعدارلاماسى بو­يىنشا 550-گە جۋىق بازالىق ستانسانى­ ورناتقان. كومپانيا كەڭ جولاقتى ءموبيلدى قولجەتىمدىلىكتى قامتۋدى كەڭەيتۋ جانە بايلانىس ساپاسىن ارتتىرۋ­ بويىنشا بەلسەندى جۇمىس جۇرگىزىپ كەلەدى. بىلتىر Kcell اۋىلدىق ەلدى مەكەن­دەردە 258 بازالىق ستانسانى ىسكە قوستى.

«بارلىعى 900 مىڭعا جۋىق ادامعا 3G تەحنولوگياسىن پايدالانا وتىرىپ، ال 660 مىڭنان استام ادامعا 3G/4G تەحنو­لو­گياسىن پايدالانا وتىرىپ ينتەرنەت بەرىلدى. بيىل وپەراتور LTE جەلىسىن ورناتۋ ارقىلى تاعى 142 اۋىلدىق ەلدى مەكەندى كەڭ جولاقتى ءموبيلدى ينتەرنەتپەن قامتاماسىز ەتۋدى جوسپارلاپ وتىر. قازىرگى كۇنى وسى تىزىمدەگى 31 ەلدى مەكەنگە LTE جەلىسى قوسىلدى. سونداي-اق كومپانيا 2023-2024 جىلدارعا ارنالعان ءوزىنىڭ جەكە باعدارلاماسى بو­يىنشا اۋىلدىق جەرلەردە كەڭ جولاقتى ءموبيلدى قولجەتىمدىلىك جەلىسىن دامىتۋ­دى جوسپارلاپ وتىر. وسى جىلدىڭ 6 ناۋرىزىنداعى جاعداي بويىنشا بازالىق ستانسالار 7 ەلدى مەكەندە ىسكە قوسىلعان جانە تاعى 10-ىندا جۇمىس جۇرگىزىلىپ جاتىر»، دەپ حابارلادى Finprom.kz.

باعدارلامالاردى جۇزەگە اسىرۋ جاعدايعا وڭ اسەرىن تيگىزىپ جاتىر. ماسەلەن، حالىقارالىق ەلەكتربايلانىس وداعىنىڭ (ITU) دەرەگىنشە، قازاقستانداعى ينتەرنەتتىڭ قولجەتىمىلىگى مىناداي: اۋىلدىق جەردە – 94 پايىز، قالا­دا – 95 پايىز. ەلدەگى جاعداي ورتاشا­ الەم­دىك دەڭگەيدەن عانا ەمەس، سونىمەن­ قاتار ەاەو ەلدەرىمەن، سونداي-اق كوپ­تە­گەن دامىعان ەلمەن سالىستىرعاندا الدە­قايدا جاقسى. ماسەلەن، ارمەنيادا اۋىلدا­ ينتەرنەت قولجەتىمدىلىگى 90 پايىزعا، بەلارۋستە – 79 پايىزعا، رەسەيدە 78 پايىزعا تەڭ. كەيبىر دامىعان ەلدەردە اۋىلدا ينتەرنەتپەن قامتاماسىز ەتىلگەن پايدالانۋشىلاردىڭ ۇلەسى كەلەسىدەي: شۆەيتساريادا – 95 پايىز، جاپونيادا – 87 پايىز، يتاليادا – 74 پايىز، كانادادا – 77 پايىز، بەلگيادا – 93 پايىز، فرانتسيادا – 85 پايىز.

سەكتوردىڭ وسىنداي قارقىندى دامۋى ءۇشىن بايلانىس وپەراتورلارى بۇرىن-سوڭدى بولماعان كولەمدە قاراجات سالىپ جاتىر. 2022 جىلدىڭ قورىتىندىسى بو­يىن­شا، اقپارات جانە بايلانىس سالاسىنا­ سا­لىنعان ينۆەستيتسيا ءبىر جىلدا 39،1 پا­يىزعا ءوسىپ، 178،9 ملرد تەڭگەگە جەتتى. بۇل­ تاريحي كورسەتكىش. ۇزاقمەرزىمدى ديناميكادا ينۆەستيتسيا كولەمى بىرتىندەپ ۇلعايا بەرمەك.