ساعات 6:00-دە 5573 اسكەري بولىمىندەگى №226 داۋىس بەرۋ ۋچاسكەسىنە العاشقىلاردىڭ ءبىرى بولىپ ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىس جونىندەگى ورىنباسارى پولكوۆنيك قايرات ۇمبەتوۆ كەلىپ, ءوز داۋىسىن بەردى.
«بارلىق ۋاقىتتا قۇقىقتىق ءتارتىپ اسكەرلەرىنىڭ اسكەري قىزمەتشىلەرى جوعارى ازاماتتىق جاۋاپكەرشىلىك پەن پاتريوتتىق رۋحتى كورسەتەدى. ۇلتتىق ۇلان ەلىمىزدىڭ تىنىشتىعى مەن تۇراقتىلىعىنا جاۋاپ بەرەدى. بۇگىن ءاربىر اسكەري قىزمەتشى بەلسەندى قاتىسىپ, داۋىس بەرەتىنىنە سەنىمدىمىن», دەدى پولكوۆنيك قايرات ۇمبەتوۆ.
قر ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى گەنەرال-مايور ەركىن بوتاقانوۆ اسكەري بولىمگە كەلىپ, جەكە قۇرامنىڭ داۋىس بەرۋ بارىسىمەن تانىستى. ول داۋىس بەرگەننەن كەيىن جەكە قۇرامعا ورالدى. سونداي-اق ول باس قولباسشىلىقتىڭ ارنايى شتابىنىڭ قىزمەت اتقارۋىن تەكسەردى. ونىڭ ايتۋىنشا, اسكەري بولىمدەردە اشىلعان سايلاۋ ۋچاسكەلەرىندە داۋىس بەرۋشىلەردىڭ بەلسەندىلىگى وتە جوعارى بولدى. سايلاۋعا تەك اسكەري قىزمەتشىلەردىڭ وزدەرى عانا ەمەس, ولاردىڭ وتباسى مۇشەلەرى دە بەلسەندى قاتىسقان.
اسكەري بولىمدەردىڭ مەرزىمدى قىزمەتىنىڭ اسكەري قىزمەتشىلەرى مەن ۇلتتىق ۇلان اكادەمياسىنىڭ كۋرسانتتارى اسكەري قالاشىقتار اۋماعىنداعى 36 سايلاۋ ۋچاسكەسىندە داۋىس بەردى. اسكەري قىزمەتشىلەردىڭ اراسىندا العاش رەت داۋىس بەرۋگە قاتىسقاندار كوپ. اسكەري بولىمدەردەگى العاشقى سايلاۋشىلارعا ارنايى سىيلىقتار تابىستالدى.
