«بۇگىن ءبىز ءۇشىن مەرەكە. تاڭەرتەڭ تۇرىپ, ەڭ ادەمى كيىمدەرىمدى كيىپ, ورال قالاسىنىڭ مەدكوللەدج ايماعىنداعى №436 سايلاۋ ۋچاستوگىنە كەلىپ تاڭداۋىمدى جاسادىم. زەينەت دەمالىسىندا جۇرسەم دە ەلىمىزدىڭ قوعامدىق ومىرىنەن تىس قالعىم كەلمەيدى. بيىل جايىق وزەنى كوتەرىلىپ, ءبىزدىڭ جاقسى اۋىل شاعىناۋدانىنداعى كولگە سۋ قۇيىپ جاتىر. 2018 جىلدان بەرى سۋ بولماي, كەۋىپ قالعان جەر ەدى. وسى كولدىڭ جاعدايىن ايتىپ, نەشە جىلدان بەرى شىر-پىر بولىپ جۇرگەنىمدى اينالام بىلەدى عوي. بيىل كولدە اققۋ-قاز ءجۇزىپ, ول جاقتان جاز بويى سامال جەل ەسەتىنىن ويلاسام, كوڭىلىم كوتەرىلە تۇسەدى. بۇگىنگى سايلاۋ دا قازاق قوعامىنا تىڭ سەرپىلىس, ەرەكشە لەپ بەرسە ەكەن», دەيدى 71 جاستاعى اقساقال قايرەدەن جاقسىعۇلوۆ.
قايرەدەن اعا سايلاۋ ۋچاستوگىندە جايىلعان شاعىن داستارحان باسىنا جايعاسىپ, باۋىرساقتان اۋىز ءتيىپ, كوميسسيا مۇشەلەرىنە اق باتاسىن بەرىپ كەتتى.
ورال قالاسىنداعى №407 سايلاۋ ۋچاسكەسىندە بەلگىلى ونەرپاز ارمان بيعاليەۆ بۇكىل وتباسىمەن ۇلتتىق كيىم كيىپ داۋىس بەرگەن.
ء«بىزدىڭ باستى بايلىعىمىز – بەيبىتشىلىك, ەلدىڭ اماندىعى. جەرلەستەرىمدى ۇيىمشىلدىقپەن سايلاۋعا قاتىسۋعا شاقىرامىن. ءوز تاڭداۋىمىزدى جاسايىق. ەرتەڭگى كۇنىمىز ءار وتباسىنا باق پەن بەرەكە سىيلاسىن», دەيدى ءانشى.
ورال قالاسىنداعى وسى ءۇردىس باتىس قازاقستان وبلىسىنىڭ اۋداندارىندا دا جالعاسىن تاپقان. ال سىرىم اۋدانى, جوسالى اۋىلدىق وكرۋگىنىڭ ورتالىعى قوڭىر اۋىلىنداعى №308 سايلاۋ ۋچاسكەسىندە ءتىپتى قىزىق وقيعا بولدى. سايلاۋ كوميسسياسى ۇلىستىڭ ۇلى كۇنى قارساڭىندا ءوتىپ جاتقان ساياسي شاراعا ەڭ ءبىرىنشى كەلگەن سايلاۋشىعا شاپان جابامىز دەپ ۇيعارعان ەكەن. كەرەمەت سىيلىق اۋىل شارۋاشىلىعى سالاسىنىڭ ارداگەرى, اۋىل اقساقالى باقتىعالي احمەدياروۆقا بۇيىردى.
